ရန်ကုန်၊ ဇန်နဝါရီ ၇
မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့တွင် အကြမ်းဖက် စစ်တပ် စစ်ကြောင်းကို ကြားဖြတ် တိုက်ခိုက်ရာ စစ်သား ၁၀ ဦးသေဆုံးပြီး ၂ ဦးအလင်းဝင်ရောက်ခဲ့ကြောင်း Southern Eagle PDF မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဒီဇင်ဘာလ ၂၆ ရက်နေ့ ကျိုက်ထိုမြို့နယ်၊ သိမ်ဇရပ်မြို့ အတွင်းကျင်းပပြုလုပ်မည့် အတုအယောင် ရွေးကောက်ပွဲကို လုံခြုံရေးပေးရန် စစ်ကြောင်းထိုးလာသော အကြမ်းဖက် စစ်တပ်၏ တပ်မ ၄၄ လက်အောက်ခံ ခမရ ၃ တပ် ရင်းမှ တပ်ရင်းမှူး၊ ဒုတပ်ရင်းမှူးဦးဆောင်လာသည့် အင်အား ၁၀၂ ဦးပါ စစ်ကြောင်းကို တော်လှန်ရေး တပ်ဖွဲ့များက ၉ ကြိမ် ကြားဖြတ် တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၁၀ ဦး ထက်မနည်းသေဆုံးကာ အများအပြား ထိခိုက် ဒဏ်ရာရရှိခဲ့ပြီးနောက် စစ်ကြောင်းသည် သိမ်ဇရပ်မြို့ဘက်သို့ ပြန်လည် ဆုတ်ခွာသွားကြောင်း၊ ထိုသို့ တိုက်ပွဲဖြစ်ပွားရာ နေရာများကို အမတ ၃၁၀ တပ်ရင်းက လက်နက်ကြီးများဖြင့် ရမ်းသမ်း ပစ်ခတ်ခဲ့သောကြောင့် ကျိုက်ထိုမြို့နယ် ဂွေ့ကြီးရွာရှိ ဈေးသည် အမျိုးသမီး ၁ ဦးကို လက် နက်ကြီးကျည် ထိမှန်ခဲ့ပြီး သေဆုံးခဲ့ကြောင်း သိရှိသည်။
ထို့ပြင် ဒီဇင်ဘာလ ၂၇ ရက်နေ့ အဆိုပါ စစ်တပ် စစ်ကြောင်းနှင့် အတူ လိုက်ပါလာသော စစ်မှုထမ်း တပ် သားသစ် ၂ ဦးက MA-1 သေနတ် ၂ လက်နှင့် ခဲယမ်းတချို့ ယူဆောင်လာပြီး တော်လှန်ရေးတပ်ဖွဲ့ဝင်များထံသို့ အလင်းဝင်ရောက်လာခဲ့ကြောင်းသိရသည်။
“စစ်ခွေး သေစာရင်းက ထပ်တိုးသေဆုံးတာမျိုးရှိနိုင်တယ်။ အထိအခိုက်ကတော့ ဒီကောင်တွေများသွားတယ်။ စစ်ခွေးဘက်က ခမရ ၃ ဘက်ကို ပြန်ဆုတ်သွားတာဖြစ်နိုင်တယ်။ အလင်းဝင်ရောက်လာတဲ့သူ ၂ ဦးက လည်း တပ်မ ၄၄ လက်အောက်ခံ ခမရ ၃ တပ်ရင်းကပါ”ဟု Southern Eagle PDF မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော် အမှတ် ၁ စစ်ဆင်ရေးနယ်မြေ ၊ အထူးတိုင်းစစ်ဌာန၊ နည်းဗျူဟာ (၃၆) ကွပ်ကဲမှုအောက်ရှိ Southern Eagle PDF တပ်ရင်း၊ ပူးပေါင်းမဟာမိတ် KNLA နှင့် ဒေသ ကာကွယ်ရေး တပ်ဖွဲ့များက လုပ်ဆောင်ခဲ့ခြင်းဖြစ်ကြောင်း သိရသည်။
အလားတူ ပဲခူးတိုင်း၊ ပေါင်းတည်မြို့နယ်တွင် အကြမ်းဖက် စစ်တပ် စစ်ကြောင်းကို မိုင်းဆွဲ တိုက်ခိုက်ခဲ့ရာ စစ်သား ၁ ဦးသေဆုံးခဲ့ကြောင်း ၃၆၀၁ တပ်ရင်း စစ်ထောက်လှမ်းရေးနှင့် သတင်းပြန်ကြားတာဝန်ခံ ရဲဘော် Shadow က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၄ ရက်နေ့ နံနက် ၉ နာရီကျော်ခန့်အချိန် ပေါင်းတည်မြို့နယ်၊ ပေါက်တောရွာ ခမရ ၁၀ တပ်ရင်းမှ အင်အား ၄၀ ခန့်ပါ စစ်ကြောင်းသည် နယ်မြေရှင်းလင်းရေး လုပ်ဆောင်ရန် ထွက်လာစဉ် ပေါက်တောရွာနှင့် အဂ္ဂရာပြည်ကွက်သစ် အကြားတွင် ဗျူဟာ ၂၁ ကွက်ကဲမှုအောက်ရှိ ပြည်ခရိုင် အမှတ် ၁ ၃၆၀၁တပ်ရင်း တပ်ခွဲ ၅ က မိုင်းဆွဲတိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်သား ၁ ဦး သေဆုံးကာ ၂ ဦး ထိခိုက်ဒဏ်ရာရရှိခဲ့ကြောင်း၊ တိုက်ခိုက်မှုအတွင်း သေဆုံးသွားသော စစ်သား အလောင်းနှင့် ဒဏ်ရာရသူများကို စစ်တပ်က ပြန်လည် သယ်ဆောင်သွားပြီး ပေါက်တောရွာရှိ ခမရ ၁၀ တပ်ရင်းထဲကို ဝင်ရောက်သွားကြောင်း သိရသည်။
“ကျနော်တို့ မိုင်းဆွဲ တိုက်ခိုက်မှုမှာ စစ်ခွေး ၁ ကောင် သေပြီး ၂ ကောင်ကတော့ ပြင်းထန်ဒဏ်ရာရပါတယ်။ စစ်ခွေးတွေဘက်က လက်နက်ကြီး၊ လက်နက်ငယ်တွေနဲ့ ပြန်လည် ပစ်ခတ်ခဲ့ပေးမည့် တော်လှန်ရေးရဲဘော်တွေ အထိအခိုက်မရှိ ပြန်လည် ဆုတ်ခွာနိုင်ခဲ့ပါတယ်” ဟု ၃၆၀၁ တပ်ရင်း စစ်ထောက်လှမ်းရေးနှင့် သတင်းပြန်ကြားတာဝန်ခံ ရဲဘော် Shadow က ပြောဆိုသည်။
ထို့ပြင် စစ်ကိုင်းတိုင်း၊ ရေဦးမြို့နယ်မြောက်ပိုင်း ရွာသစ်ရွာအနီး အကြမ်းဖက် စစ်တပ် ရှေ့ပြေးကင်းကို မိုင်းဆွဲ တိုက်ခိုက်ရာ စစ်တပ်ဘက်မှ ထိခိုက်သေဆုံးမှုရှိကြောင်း ပြည်သူ့ကာကွယ်ရေးအဖွဲ့- ရေဦးမြို့နယ် ပကဖ တာဝန်ခံက ရန်ကုန်ခေတ်သစ်သတင်းဌာနထံသို့ပြောဆိုသည်။
ဇန်နဝါရီလ ၆ ရက်နေ့ ည ၈နာရီဝန်ကျင်းခန့်တွင် ရေဦးမြို့နယ် မြောက်ပိုင်း ရွာသစ်ရွာအနီးသို့ ထွက်လာသည့် အင်အား ၂၀ ခန့်ပါ စစ်တပ် ရှေ့ပြေးကင်းကို တော်လှန်ရေး တပ်ဖွဲ့များက ရေဦးမြို့အဝင် ဆိုင်းဘုတ်အနီးအရောက်တွင် မိုင်းဆွဲ တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက်စစ်တပ်ဘက်မှ ထိခိုက်သေဆုံးမှု အရေအတွက်ကို အတည်ပြုနိုင်ခြင်းမရှိသေးဘဲ တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။
“စစ်ခွေး သေစာရင်း မသိရသေးဘူး။ စစ်ခွေးတွေဘက်က ရှေ့ဆက်တိုးနေတာမို့လို့ မိုင်းကွင်းထဲရောက်မှ မိုင်းဆွဲခဲ့တာပါ။ ကျနော်တို့ မြို့နယ်ပကဖ စိုးမိုးနယ်မြေအတွင်း နယ်မြေလုံခြုံရေးကို အကောင်းဆုံးဆောင်ရွက်နေတာကို သိစေချင်တာပါ”ဟု ပြည်သူ့ကာကွယ်ရေးအဖွဲ့- ရေဦးမြို့နယ် ပကဖ တာဝန်ခံက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
