ရန်ကုန်၊ ဇန်နဝါရီ ၁၆
ဇန်နဝါရီလ ၁၄ ရက်နေ့တွင် အမေရိကန်အောက်လွှတ်တော်က H.R. 7006 ခေါ် ဘဏ္ဍာ ရေးဝန်ဆောင်မှုများ၊ အထွေထွေအစိုးရနှင့် အမျိုးသားလုံခြုံရေး၊ နိုင်ငံခြားရေးဝန်ကြီးဌာနနှင့် ဆက်စပ်အစီအစဉ်များဆိုင်ရာ ၂၀၂၆ ခုနှစ် ဘဏ္ဍာရေး ခွဲဝေချထားမှု ဥပဒေ ကို ထောက်ခံမဲ ၃၄၁ မဲ၊ ကန့်ကွက်မဲ ၇၉ မဲဖြင့် အတည်ပြုခဲ့သည်။
ယင်းဥပဒေထဲတွင် မြန်မာနိုင်ငံအတွက် အကူအညီအဖြစ် အမေရိကန်ဒေါ်လာ ၁၂၁ သန်းပေးမည်ဖြစ်ကြောင်း သိရှိရသည်။
အမေရိကန်က ပေးမည့် ဒေါ်လာ ၁၂၁ သန်းတွင် ထိုင်းနိုင်ငံနှင့် အိန္ဒိယနိုင်ငံရှိ နယ်စပ်ဖြတ်ကျော် အကူအညီပေးရေး လုပ်ငန်းများအတွက် အမေရိကန်ဒေါ်လာ ၇၅ သန်း ပေးအပ်မည်ဖြစ်ကြောင်း၊ မြန်မာနိုင်ငံအတွင်း အုပ်ချုပ်ရေးနှင့် ဖက်ဒရယ်စနစ် ဖော်ဆောင်ရေးအတွက် အထူးသဖြင့် ဒေသန္တရနှင့် ပြည်နယ်အဆင့် အုပ်ချုပ်ရေးဆိုင်ရာ လုပ်ငန်းများနှင့် ဖက်ဒရယ်စနစ် ဖော်ဆောင်ရေး အစီအစဉ်များအတွက် ဒေါ်လာ ၁၀ သန်း ပေးအပ်မည်ဖြစ်ကြောင်း သိရှိရသည်။
ယင်းအပြင် စစ်တပ်က ကျူးလွန်သော ရာဇ၀တ်မှုများ တားဆီးရေးနှင့် သက် သေခံချက် ထိန်းသိမ်းရေးအဖြစ် လူမျိုးတုန်းသတ်ဖြတ်မှုနှင့် အကြမ်းဖက်မှုများကို တားဆီးရန်နှင့် အထောက်အထားများ မှတ်တမ်းတင် စုဆောင်းရန်အတွက် ဒေါ်လာ ၇ သန်း ထောက်ပံ့မည်ဖြစ်ကြောင်း သိရှိရသည်။
အလားတူ ရိုဟင်ဂျာများအတွက် တရားမျှတမှု ဖော်ဆောင်ရေးအဖြစ် ရိုဟင်ဂျာများအပေါ် ကျူးလွန်သည့် ရာဇ၀တ်မှုများအတွက် တရားမျှတမှုနှင့် တာဝန် ခံမှုရှိစေရေး အစီအစဉ်များအတွက် ဒေါ်လာ ၁ သန်း ပေးအပ်မည်ဖြစ်ကြောင်း သိရှိရသည်။
မြန်မာနိုင်ငံမှ စစ်အာဏာရှင် ဆန့်ကျင်ရေး လှုပ်ရှားမှုများအတွက် လက်နက်မဟုတ်သော အကူအညီများအဖြစ် သတ်မှတ်ထားသော စည်းကမ်းချက်များနှင့်အညီ “လက်နက်မဟုတ်သော အကူအညီများ” (Non-lethal assistance) အတွက် ဒေါ်လာ ၂၅ သန်းပေးအပ်မည်ဖြစ်သည်။
ထို့အတူ နိုင်ငံရေးအကျဉ်းသားများ ကူညီရေးအဖြစ် လက်ရှိနှင့် နိုင်ငံရေးအကျဉ်းသားဟောင်းများအား ထောက်ပံ့ကူညီရန်အတွက် ဒေါ်လာ ၁ ဒသမ ၅ သန်း၊ CDM တပ်မတော်သားများ (သို့မဟုတ်) စစ်တပ်မှ စွန့်ခွာလာသူများ (Deserter) ကို အကူအညီပေးရေးအဖြစ် အမေရိကန်ဒေါ်လာ ၁ ဒသမ ၅ သန်းပေးအပ်မည်ဖြစ်ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
