MNDAA က စစ်သုံ့ပန်း ၅၀၀ ဦးနှင့် အကျဉ်းသား ၉ ဦးကို ပြန်လွှတ်ပေးပြန်

ရန်ကုန်၊ ဇန်နဝါရီ ၂၆

ရှမ်းပြည်နယ်မြောက်ပိုင်း၊ ကိုးကန့်အထူးဒေသ ၁ တွင် MNDAA က စစ်သုံ့ပန်း ၅၀၀ နှင့် အကျဉ်းသား ၉ ဦးကို ပြန်လည်လွှတ်ပေးလိုက်ကြောင်း MNDAA က သတင်းထုတ် ပြန် သည်။

ဇန်နဝါရီလ ၂၅ ရက်နေ့ အာဇာနည်ဝိညာဉ်ပို့ဆောင်ပွဲ (သို့မဟုတ်) “တာကျောင်” မဟာပူဇော်ပွဲ ကာလအတွင်း MNDAA က ယင်းကဲ့သို့ တရားဝင်ခွင့်ပြုချက်နှင့် တရားစီရင်ရေးအာဏာပိုင်များ၏ တင်းကျပ်သော စိစစ်မှုတို့ဖြင့် ပြစ်ဒဏ်လွတ်ငြိမ်းခွင့်ပေးခဲ့ခြင်းဖြစ် ကြောင်း သိရှိရသည်။

MNDAA ၏ ချုပ်နှောင်ဖမ်းဆီးမှုအတွင်း အကျင့်စာရိတ္တ ကောင်းမွန်ကြောင်း ပြသနိုင်ခဲ့သူ အကျဉ်းသား ၉ ဦးကို တရားဝင် လွတ်ငြိမ်းချမ်းသာခွင့် ပေးခဲ့ပြီး ကောင်းမွန်သော အပြု အမူဖြင့် နေထိုင်ခဲ့သည့် စစ်သုံ့ပန်း ၅၀၀ ဦးကိုလည်း ပြန်လည်လွှတ်ပေးခဲ့ကြောင်း၊ ထို့အပြင် အခြားသော အကျဉ်းသား ၄၉ ဦးကိုလည်း ဥပဒေနှင့်အညီ ပြစ်ဒဏ်လျှော့ပေါ့ပေးခဲ့ကြောင်း သိရှိရသည်။

ထိုသို့ စစ်သုံ့ပန်းများကို လွှတ်ပေးမှုမှာ တရားဥပဒေစိုးမိုးမှု၏ အာဏာသက်ရောက်မှုနှင့် စနစ်၏ တိကျခိုင်မာမှုကို ဖော်ပြရုံသာမက မူဝါဒပိုင်းဆိုင်ရာ စေတနာနှင့် လူမှုရေးစောင့်ရှောက်မှုတို့ကိုပါ ပေါ်လွင်စေကြောင်း၊ သက်ဆိုင်ရာ ပုဂ္ဂိုလ်များအနေဖြင့် ရရှိလာသော အခွင့်အရေးကို တန်ဖိုးထားကာ အမှားမှ သင်ခန်းစာယူ၍ လမ်းမှန်သို့ ပြန်လည်ရောက်ရှိပြီး လူ့အဖွဲ့အစည်းအတွင်း ပြန်လည်ဝင်ရောက်ကာ ဒေသတည်ငြိမ်အေးချမ်းရေးနှင့် ရေရှည်ဖွံ့ဖြိုးတိုးတက်ရေးတို့အတွက် အတူတကွ ပူးပေါင်းပါဝင်လာစေရန် လမ်းညွှန်ပေးလိုက်ခြင်းလည်း ဖြစ်ကြောင်း MNDAA က ဆိုသည်။

၁၀၂၇ စစ်ဆင်ရေးအတွက် MNDAA က အရှေ့မြောက်တိုင်းစစ်ဌာနချုပ်၊ ဒစကဌာနချုပ်များ ၊ တပ်ရင်းတပ်ဖွဲ့များ၊ မြို့ကြီးများကို သိမ်းပိုက်ခဲ့ပြီး စစ်သုံ့ပန်းအရေအတွက် ထောင်ချီ၍ ဖမ်းဆီးရရှိခဲ့သည်။ သို့ရာတွင် ဖမ်းဆီးရရှိခဲ့သော စစ်သုံ့ပန်းများနှင့် မိသားစုဝင်များကို MNDAA က ဆက်တိုက် ပြန်လည်လွှတ်ပေးလျက်ရှိသည်။

ယခုနှစ် ဇန်နဝါရီလ၁၄ရက်နေ့ကလည်း စစ်သုံ့ပန်း ၈၀ ဦးကိုလည်းကောင်း၊ ၂၀၂၄ ခုနှစ် ဩဂုတ်လအတွင်း လားရှိုးအခြေစိုက် အရှေ့မြောက်တိုင်း‌စစ်ဌာနချုပ်မှ ဖမ်းဆီးရမိသည့် ဒဏ်ရာရ စစ်သုံ့ပန်း ၈၀ ဦး အပါအဝင် ၂၉၇ ဦးကိုလည်းကောင်း၊ ၂၀၂၄ ခုနှစ် ဩဂုတ်လအတွင်း MNDAA က စစ်ကောင်စီတပ်မှ မိသားစုဝင် ၃၈၀ ကျော်ကို လည်းကောင်း၊ ၂၀၂၄ ခုနှစ် ဇူလိုင်လအတွင်း လားရှိုးမြို့နယ်ရှိ အမှတ် ၁၁ စစ်အခြေခံလေ့ကျင့်ရေးတပ်ကို သိမ်းပိုက်လိုက်ပြီး တပ်မိသားစုဝင် ကလေးများ၊ အမျိုးသမီးများလည်းကောင်း လွှတ်ပေးခဲ့သည်။

ယင်းအပြင် ၂၀၂၄ ခုနှစ် ဩဂုတ်လအတွင်း လားရှိုး အရှေ့မြောက်တိုင်းစစ်ဌာချုပ်မှ ဖမ်းဆီးရမိသော ပြင်းထန် ဒဏ်ရာရရှိထားသည့် စစ်သုံ့ပန်း ၄၅ ဦး အပါအဝင် မိသားစု ဝင် ၃၃၁ ဦးကိုလည်း ပြန်လွှတ်ပေးခဲ့သည်။

MNDAA က ပြန်လည် လွှတ်ပေးခဲ့သည့် စစ်အရာရှိကြီးအများအပြားလည်းရှိပြီး ၎င်းတို့ထဲတွင် လောက်ကိုင်ဒကစမှူး ဗိုလ်မှူးချုပ်မိုးကျော်သူ၊ ဗိုလ်မှူးချုပ်ထွန်းထွန်းမြင့်၊ ရမခ တိုင်းမှူးဟောင်း ဗိုလ်ချုပ်စိုးတင့်၊ ဗိုလ်မှူးချုပ်မျိုးမင်းထွေး၊ ဗိုလ်မှူးချုပ်သန့်ထင်စိုး စသည့်အရာရှိကြီးများကိုလည်း ပြန်လည် လွှတ်ပေးခဲ့သည်။

MNDAA က ၂၀၂၃ ခုနှစ် အောက်တိုဘာ ၂၇ရက်နေ့ စတင်ခဲ့သော ၁၀၂၇ စစ်ဆင်ရေးအတွင်း အကြမ်းဖက်စစ်တပ်၏ အရှေ့ မြောက်တိုင်းစစ်ဌာနချုပ်နှင့် လားရှိုးမြို့၊ လောက်ကိုင်၊ ချင်းရွှေဟော်၊ မုန်းကိုး၊ ဖောင်းဆိုင်၊ ကုန်းကြမ်း၊ မူဆယ် ၁၀၅ မိုင်၊ ကွမ်းလုံ၊ သန္ဓီ၊ တာမိုးညဲ၊ ပန်ဆိုင်း မြို့များကို တိုက်ခိုက်သိမ်းပိုက်ခဲ့သည်။

တရုတ်အစိုးရ၏ ဖိအားကြောင့် စစ်ကောင်စီနှင့် အပစ်အခတ်ရပ်စဲကာ သိမ်းပိုက်ထားသော လားရှိုးမြို့ကို ၂၀၂၅ ခုနှစ် ဧပြီလတွင် အကြမ်းဖက်စစ်တပ်ထံသို့ ပြန်လည် ပေးအပ်ခဲ့သည်။

ဓာတ်ပုံ – MNDAA က ပြန်လွှတ်ပေးခဲ့သော စစ်သုံ့ပန်းများ။ (ပုံအဟောင်းကို အသုံးပြုထားပါသည်။)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar