အခေါက်ရွှေတစ်ကျပ်သားလျှင် ငွေကျပ် သိန်း ၁၁၀ အထိ စံချိန်တင်မြင့်တက်

ရန်ကုန်၊ ဇန်နဝါရီ ၂၈

ပြည်တွင်းစီးပွားရေးစျေးကွက်တွင် အခေါက်ရွှေတစ်ကျပ်သားလျှင် ငွေကျပ် သိန်း ၁၁၀ အထိ စံချိန်တင်မြင့်တက်သွားကြောင်း ရန်ကုန်အခြေစိုက် ရွှေကုန်သည်များက ရန်ကုန်ခေတ်သစ်သတင်းဌာနထံသို့ ပြောဆိုသည်။

နိုင်ငံတကာတွင် ကမ္ဘာ့ချိန်ခွင်လျှာအဖြစ် ထိန်းကျောင်းရပ်တည်နေသော အမေရိကန်သမ္မတဒေါ်နယ်ထရမ့်၏ စီးပွားရေးဆိုင်ရာ မှတ်ချက်များနှင့် မဟာမိတ်များအပေါ် မဆင်မခြင် ရန်လိုသော မှတ်ချက်စကားများကြောင့် အမေရိကန်ဒေါ်လာ၊ အမေရိကန်စီးပွားရေးမူဝါဒနှင့် အမေရိကန်ငွေတိုက်စာချုပ်များအပေါ် ယုံကြည်မှု ကျဆင်းခြင်းတို့၏ နောက် ဆက်တွဲ နိုင်ငံတကာတွင် ရွှေစျေးနှုန်းမှာ တရိပ်ရိပ် ထိုးတက်လာနေကြောင်း၊ ရွှေတစ်အောင်စလျှင် ယခုအခါ အမေရိကန်ဒေါ်လာ ၅၂၉၂ ဒသမ ၆၀ အထိ စံချိန်တင် ထိုးတက်လာကြောင်း၊ ထို့ကြောင့် မြန်မာ့စျေးကွက်အပါအဝင် နိုင်ငံတကာစျေးကွက်အားလုံးတွင် ရွှေစျေးနှုန်းများ တဟုန်ထိုးမြင့်တက်လျက်ရှိကြောင်း သိရှိရသည်။

“ရွှေစျေးတက်တာက မြန်မာတစ်ခုတည်းတော့မဟုတ်ဘူး။ ထိုင်းမှာလည်း ရွှေစျေးတွေ အသားကုန်တက်နေတာပဲ။ မြန်မာမှာက အခုတက်တာ တော်တော်ကြီးထိန်းထိန်းသိမ်းသိမ်း တက်တာလို့တောင် ပြောလို့ရတယ်။ ဒေါ်လာက မတက်ဘဲ အကျပြနေလို့ ဒီလောက်ပဲ တက်တာ။ ဒေါ်လာပါ လိုက်တက်ရင် ရွှေစျေးက အခေါက်ရွှေ တစ်ကျပ်သား သိန်း ၁၅၀ နားလောက်ကပ်သွားမှာ” ဟု ရန်ကုန်အခြေစိုက် မီးလင်းရွှေကုန်သည်တစ်ဦးက ရှင်းပြသည်။

လက်ရှိ ရွှေစျေးကွက်တွင် ရွှေအဝယ်ထက် အရောင်းက ပိုမိုများပြားကြောင်း၊ ရွှေစျေးတက်ချိန် ပြန်လည်ရောင်းချသူများပြားပြီး ဝယ်သူက အသင့်အတင့်သာရှိကြောင်း သိရှိရသည်။

“ငွေပိုငွေလျှံရှိတဲ့သူကတော့ ရွှေဝယ်တယ်။ အခုက ဆိုင်တွေနဲ့ စျေးကွက်ထဲမှာတော့ အရောင်းများတယ်” ဟု ရွှေဆိုင်လုပ်ငန်းရှင်တစ်ဦးကရှင်းပြသည်။

အမေရိကန်ဒေါ်လာမှာမူ စျေးအနည်းငယ် ကျဆင်းသွားပြီး အမေရိကန်တစ်ဒေါ်လာလျှင် ငွေကျပ် ၄၀၀၀ ကျပ်ဝန်းကျင်တွင်သာ ရှိတော့ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar