ရန်ကုန်၊ ဧပြီ ၁၀
ကရင်အမျိုးသားအစည်းအရုံး (KNU)က တော်လှန်ရေးကာလအတွင်း ကော်သူးလေဖက်ဒရယ်ယူနစ် တည်ဆောက်ရေးအတွက် အရေးပါသော ကော်သူးလေပဋိညာဉ်ကို အတည် ပြုလိုက်ပြီး ကော်သူးလေအတိုင်ပင်ခံကောင်စီနှင့် အုပ်ချုပ်ရေးကောင်စီတို့ကို စနစ်တကျ ဖွဲ့စည်းလိုက်ကြောင်း ယနေ့ ကြေညာသည်။
မတ်လ ၃၁ ရက်နေ့မှ ဧပြီလ ၂ ရက်နေ့အထိ ကျင်းပခဲ့သော ကော်သူးလေဖက်ဒရယ်ယူနစ် တည်ဆောက်ရေးဆိုင်ရာ တိုင်ပင်ဆွေးနွေးပွဲတွင် ကာလ ၂ နှစ်ကျော်ကြာမျှ အချိန်ယူရေးဆွဲခဲ့သည့် ပဋိညာဉ်မူကြမ်းကို ကိုယ်စားလှယ်ပေါင်း ၅၈ ဦးတို့က အကြေအလည် ညှိနှိုင်းဆွေးနွေးကာ အတည်ပြုခဲ့ကြပြီး ကော်သူလေး အုပ်ချုပ်ရေးကောင်စီနှင့် အတိုင် ပင်ခံကောင်စီကိုပါ တစ်ပါတည်း ဖွဲ့စည်းလိုက်ကြခြင်းဖြစ်သည်။
ယခုဖွဲ့စည်းလိုက်သော ကော်သူးလေအတိုင်ပင်ခံကောင်စီ (Kawthoolei Consultative Council – KCC) သည် ဖက်ဒရယ်ယူနစ် တည်ဆောက်ပုံဖော်ရာတွင် ဒေသန္တရကိုယ်စားပြုမှုများ အားကောင်းလာစေရန်နှင့် လိုအပ်သော အကြံပြုချက်၊ နည်းပညာပံ့ပိုးမှုများပေးရန် လမ်းညွှန်ဆောင်ရွက်သွားမည် ဖြစ်သည်။
အလားတူ ကော်သူးလေအုပ်ချုပ်ရေးကောင်စီ (Kawthoolei Governing Council – KGC) သည်လည်း လက်ရှိ KNU ၏ အုပ်ချုပ်ရေးဌာန ၁၂ ခုအနက်မှ ဌာန ၇ ခုဖြင့် အစပြုကာ လုပ်ငန်းစွမ်းဆောင်ရည် မြှင့်တင်ရေးနှင့် အုပ်ချုပ်ရေးစံနှုန်းများ ကောင်းမွန်စေရေး ဆောင် ရွက်သွားမည်ဖြစ်ပြီး၊ အမျိုးသမီး၊ လူငယ်နှင့် ကလေးသူငယ်ရေးရာဌာနကို ၈ ခုမြောက်ဌာနအဖြစ် အသစ်တိုးချဲ့ဖွဲ့စည်းထားသည်။
အဆိုပါ ကော်သူလေး ဆိုင်ရာကောင်စီနှစ်ရပ်လုံးအတွက် ပါဝင်မည့် လူပုဂ္ဂိုလ်များနှင့် ဌာနမှူးအမည်စာရင်းများကိုလည်း ကနဦးအတည်ပြုပြီး ဖြစ်ကြောင်း၊ အဆိုပါ ပဋိညာဉ်အတည် ပြုပွဲသို့ KNU ဗဟိုနှင့် ခရိုင် ၇ ခုမှ တာဝန်ရှိသူများ၊ လူငယ်၊ အမျိုးသမီးနှင့် လူမျိုး စုကိုယ်စားလှယ်များ တက်ရောက်ခဲ့ကြသော်လည်း၊ ၂၀၂၀ ရွေးကောက်ခံ ကိုယ် စားလှယ်များမှာမူ နယ်မြေအခြေ အနေအရ မတက်ရောက်နိုင်ခဲ့ဘဲ ၎င်းတို့နှင့် သီးခြားတွေ့ဆုံ ၍ အကြံ ပြုချက်များ ရယူခဲ့ကြောင်း သိရှိရသည်။
ကော်သူးလေပဋိညာဉ်သည် “အောက်ခြေမှအထက်သို့” ဖက်ဒရယ်ထူထောင်ရေး မူဝါဒဖြင့် စစ်အာဏာရှင်စနစ်ကို ဘက်ပေါင်းစုံမှ တိုက်ဖျက်ရင်း တော်လှန် ရေးအလွန် အသွင်ကူးပြောင်းရေးကာလသို့ စနစ်တကျ ကူးပြောင်းနိုင်ရန် ရည်ရွယ်ထားခြင်း ဖြစ်သည်။
KNU အနေဖြင့် ယခုအတည်ပြုလိုက်သော ကော်သူးလေပဋိညာဉ်ကို အခြေခံ ၍ ကိုယ်ပိုင်ပြဋ္ဌာန်းခွင့်ရှိသော ကော်သူးလေဖက်ဒရယ်ယူနစ်ကို ဒီမိုကရေစီနည်းလမ်းတကျ ဆက် လက် အကောင်အထည်ဖော်သွားမည်ဖြစ်ပြီး၊ ပဋိညာဉ်အပြည့်အစုံကိုလည်း မကြာမီ အများ ပြည်သူ သိရှိစေရန် ထုတ်ပြန်သွားမည် ဖြစ်ကြောင်း သိရှိရသည်။
ထို့အပြင် နိုင်ငံရေးအခင်းအကျင်း အပြောင်းအလဲများအရ လိုအပ်ပါက ပြန်လည်မွမ်းမံပြင်ဆင်နိုင်ရန်အတွက်လည်း ပဋိညာဉ်ပြင်ဆင်သုံးသပ်ရေးအဖွဲ့ကို ဖွဲ့စည်းဆောင်ရွက်နိုင်ရန် ပြဋ္ဌာန်းထားကြောင်းနှင့် အများပြည်သူအနေဖြင့် သိရှိလိုသည်များကို သတ်မှတ်ထားသော ဆက်သွယ်ရန်လိပ်စာများမှတစ်ဆင့် မေးမြန်းအကြံပြုရန် ဖိတ်ခေါ်ထားသည်။
