ဒလမြို့နယ်တွင် ပြည့်ဝကုန်စုံဆိုင်ပိုင်ရှင် လင်မယားကို သတ်ဖြတ်ခဲ့သည့် ဆိုင်ဝန်ထမ်းဟောင်း ၂ ဦးကို CCTV မှတစ်ဆင့် ခြေရာခံဖမ်းဆီး

ရန်ကုန်၊ ဇွန် ၂၆

ရန်ကုန်တိုင်း၊ ဒလမြို့နယ်၊ ရာဇသင်္ကြန်ရပ်ကွက်ရှိ ပြည့်ဝကုန်စုံဆိုင်ပိုင်ရှင် ဇနီးမောင်နှံကို သတ်ဖြတ်ခဲ့သည်ဟု သံသယရှိသည့် ဆိုင်ဝန်ထမ်းဟောင်း ၂ ဦးကို CCTV မှတ်တမ်းများကို အခြေခံ၍ ခြေရာခံစုံစမ်းခဲ့ရာ ဇွန်လ ၂၆ ရက်နေ့တွင် လှိုင်သာယာမြို့နယ်နှင့် သာကေတမြို့နယ်တို့၌ ဖမ်းဆီးရမိခဲ့ကြောင်း ရဲတပ်ဖွဲ့ထံမှ သိရှိရသည်။

ဇွန်လ ၂၅ ရက်နေ့ ညပိုင်း ဒလမြို့နယ်၊ ရာဇသင်္ကြန်ရပ်ကွက်၊ အုတ်လှငယ်လမ်း၊ အမှတ် (၂၉၀) နေအိမ်တွင် ပြည့်ဝကုန်စုံဆိုင် ဖွင့်လှစ်လုပ်ကိုင်နေသည့် ဦးအောင်ကျော်ကျော်နှင့် ဇနီးဖြစ်သူ ဒေါ်နွယ်နွယ်ထွန်း ၂ ဦးမှာ အသတ်ခံခဲ့ရခြင်းဖြစ်သည်။

ရဲတပ်ဖွဲ့၏ ကနဦးစစ်ဆေးချက်အရ ဦးအောင်ကျော်ကျော်နှင့် ဒေါ်နွယ်နွယ်ထွန်းတို့သည် နေအိမ်ဒုတိယထပ်ရှိ ဘုရားခန်းအတွင်း ထိုးသွင်းဒဏ်ရာများဖြင့် သေဆုံးနေခဲ့ပြီး ရေချိုးခန်းအတွင်း သွေးစွန်းနေသည့် အသွား ၆ လက်မခန့်ရှိ ဓားတစ်ချောင်းနှင့် စကေးဘာတစ်ချောင်းကိုလည်း သိမ်းဆည်းရမိခဲ့သည်။

ထို့နောက် နေအိမ်အတွင်း တပ်ဆင်ထားသည့် CCTV မှတ်တမ်းများကို စစ်ဆေးခဲ့ရာ ဇွန်လ ၂၅ ရက် ည ၁၀ နာရီ ၁၀ မိနစ်ခန့်တွင် လွန်ခဲ့သည့် ၈ လခန့်က အလုပ်မှ ထွက်ခွာသွားခဲ့သည့် ဆိုင်ဝန်ထမ်းဟောင်းများဖြစ်သော ဗိုလ်ထီး (ခ) မျိုးဇော်နှင့် ငမျိုး (ခ) မျိုးဇော်အောင်တို့ နှစ်ဦးသည် နေအိမ်အတွင်းသို့ ဝင်ရောက်လာသည်ကို တွေ့ရှိခဲ့ကြောင်း သိရသည်။

ယင်း CCTV မှတ်တမ်းများကို အခြေခံ၍ ရဲတပ်ဖွဲ့က ခြေရာခံစုံစမ်းမှုများ ဆက်လက်ပြုလုပ်ခဲ့ရာ ဗိုလ်ထီး (ခ) မျိုးဇော်ကို လှိုင်သာယာမြို့နယ်တွင်လည်းကောင်း၊ ငမျိုး (ခ) မျိုးဇော်အောင်ကို သာကေတမြို့နယ်တွင်လည်းကောင်း ဖမ်းဆီးရမိခဲ့ခြင်းဖြစ်သည်။

ဆိုင်ပိုင်ရှင်လင်မယားအသတ်ခံရချိန်တွင် ပျူစောထီးများက လမ်းပေါ်တွင် ကင်းလှည့်နေချိန်ဖြစ်ကြောင်းဒေသပြည်သူများထံမှ သိရှိရသည်။