မူးမြို့နယ်တွင် စစ်တပ်က ပြည်သူများကို လူသားဒိုင်း အဖြစ် ဖမ်းဆီးပြီး ကျေးရွာများကို စစ်ကြောင်း ထိုးစီးနင်းနေ
ရန်ကုန်၊ မေ ၁၉
ကရင်ပြည်နယ်၊ မူးမြို့နယ်တွင် အကြမ်းဖက် စစ်တပ်က ပြည်သူများကို လူသားဒိုင်း အဖြစ် ဖမ်းဆီးပြီး ကျေးရွာများကို စစ်ကြောင်း ထိုးစီးနင်းနေကြောင်း ကေအဲန်ယူ-ကရင်အမျိုးသား အစည်းအရုံးက သတင်းထုတ်ပြန်ထားသည်။
မေလ ၁၆ ရက်နေ့တွင် ကော်သူးလေအုပ်ချုပ် နယ်မြေ၊ ခလယ်လွီထူခရိုင် တပ်မဟာ ၃ ၊ မူးမြို့နယ် အတွင်းရှိ တမာခေါကျေးရွာနှင့် တောင်စု(အနောက်) ကျေးရွာ အတွင်းသို့ အကြမ်းဖက် စစ်တပ်မှ စစ်ကြောင်းထိုး ဝင်ရောက်လာပြီး ကျေးရွာအတွင်းရှိ အရပ်သားပြည်သူ ၂ ဦးကို လူသားဒိုင်း အဖြစ် ဖမ်းဆီး ခေါ်ဆောင်သွားကြောင်း သိရသည်။
အကြမ်းဖက် စစ်တပ်၏ လူသားဒိုင်းအဖြစ် ဖမ်းဆီးခြင်းခံရသည့် ပြည်သူ ၂ ဦးမှာ တမာခေါရွာသား ဟစောပူးလူ – ၄၀ နှစ် နှင့် တောင်စု (အနောက်) ရွာသား စောဝါးထူး – ၇၀ နှစ် တို့ဖြစ်ကြောင်း၊ အဆိုပါ ပြည်သူ ၂ ဦးကို မေလ ၁၇ ရက်နေ့တွင် အကြမ်းဖက် စစ်တပ်က ပြန်လွှတ် ပေးခဲ့ကြောင်း သိရသည်။
အဆိုပါ အကြမ်းဖက် စစ်တပ် စစ်ကြောင်းသည် တမာခေါ ကျေးရွာနှင့် တောင်စု(အနောက်) ကျေးရွာအတွင်းသို့ စစ်ကြောင်းထိုး ဝင်ရောက်လာခြင်းကြောင့် ဒေသခံပြည်သူများ ကြောက်လန့်ကာ အသက်ဘေးလွတ်ရာသို့ထွက်ပြေးတိမ်းရှောင်နေကြရပြီး လက်ရှိအချိန်ထိ ထွက်ပြေးတိမ်းရှောင်နေရကာ ကျေးရွာ ၂ ရွာပေါင်း အိမ်ခြေ ၂၂၆ လုံးမှ လူဦးရေ ၇၉၀ ဦးရှိကြောင်း ကေအဲန်ယူ-ကရင်အမျိုးသားအစည်းအရုံးက ထုတ်ပြန်ထားသည်။
Photo – ကရင်ပြည်နယ်အတွင်း အကြမ်းဖက် စစ်တပ် စစ်ကြောင်း စီးနင်းမှုကြောင့် ထွက်ပြေးတိမ်းရှောင်နေရသော ပြည်သူများ
