ကလေးမြို့မှာ ပန်းပန်တဲ့အမျိုးသမီး ၂၀ ဝန်းကျင်ကို စစ်တပ်က ဖမ်းဆီး
ရန်ကုန်၊၊ ဇွန် ၁၉
စစ်ကိုင်းတိုင်း၊ ကလေးမြို့မှာ ပန်းပန်ထားတဲ့အမျိုးသမီး နှစ်ဆယ်ဝန်းကျင်ကို စစ်ကောင်စီက ဒီကနေ့ ဇွန် ၁၉ ရက်နေ့မနက်ပိုင်းမှာ ဖမ်းဆီးခဲ့တယ်လို့ ဒေသခံတွေဆီကသိရပါတယ်။
ကလေးမြို့၊ မြို့မစျေးရှေ့ ဗိုလ်ချုပ်လမ်းပေါ်မှာ ပန်းပန်စျေးရောင်းနေကြတဲ့ လမ်းဘေးစျေးသည်တွေကို ပန်းပန်ထားလို့ စစ်ကောင်စီလက်အောက်ခံရဲတပ်ဖွဲ့ဝင်တွေက လာရောက်ဖမ်းဆီးပြီး ကားတစီးနဲ့ရဲစခန်းကိုခေါ်ဆောင်သွားတာဖြစ်တယ်လို့သိရပါတယ်။
” ကားငါးစီးလောက်နဲ့လာတာ။ ရဲတွေက လမ်းပေါ်ဆင်းဖမ်းပြီး တင်ခေါ်သွားတာ။ စစ်သားတွေကတော့ကားပေါ်ကမဆင်းဘူး” လို့ဒေသခံတဦးကပြောပါတယ်။
ဖမ်းဆီးခံရတဲ့သူတွေထဲမှာ ဗိုလ်ချုပ်လမ်းဘေးမှာ မိုးမလင်းစျေးရောင်းတဲ့စျေးသည်တွေကအများစုဖြစ်တယ်လို့သိရပါတယ်။ ဖမ်းဆီးခံရတဲ့သူနှစ်ဆယ်ဝန်းကျင်ရှိပြီး အရေအတွက်အတိအကျကို အတည်မပြုနိုင်သေးပါဘူး။
” ပန်းပန်တဲ့သူတွေဖမ်းတယ်။မြို့ထဲမှာလည်း မနက်ပိုင်းစစ်ဆေးရေးကြမ်းတယ်။ ရွာဘက်တွေကိုလက်နက်ကြီးတွေနဲ့ထုတယ်။ ပြည်သူကိုအကြောက်တရားသွင်းတဲ့အလုပ်တွေလုပ်နေတာပါပဲ” လို့ ဒေသသတင်းရင်းမြစ်က ပြောပါတယ်။
ဓါတ်ပုံ- စစ်ကိုင်းတိုင်း ဒေါ်အောင်ဆန်းစုကြည်မွေးနေ့ ပန်းသပိတ်လှုပ်ရှားမူတစ်ခု။
