ဝင်းရေးမြို့နယ်၊ တံခွန်တိုင်ရွာကို စစ်တပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ်မှု နေအိမ်နှင့် ပစ္စည်းများ ထိခိုက်ပျက်စီး
ရန်ကုန်၊ ဇွန် ၂၁
ကရင်ပြည်နယ်၊ ဝင်းရေးမြို့နယ်ရှိ တံခွန်တိုင်ရွာကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ်မှု နေအိမ်နှင့် ပစ္စည်းများ ထိခိုက်ပျက်စီးခဲ့ကြောင်း ကေအဲန်ယူ – ဒူးပလာယာ ခရိုင်က ထုတ်ပြန်ထားသည်။
ဇွန်လ ၁၇ ရက်နေ့ ညနေ ၃ နာရီ ၃၂ မိနစ်ခန့်တွင် အမတ ၃၁၈ အမြောက်တပ် မှ ၁၂၀ မမ လက်နက်ကြီး ၁ လုံးဖြင့် ကေအဲန်ယူ – ကော်သူးလေ အုပ်ချုပ်နယ်မြေ ဒူးပလာယာခရိုင် ဝင်းရေးမြို့နယ် တံခွန်တိုင်ကျေးရွာကို တိုက်ပွဲဖြစ်ပွားခြင်း မရှိဘဲ ပစ်ခတ်ခဲ့ပြီး တံခွန်တိုင်ကျေးရွာ အမှတ် ၁ ရပ်ကွက်နေရှိ နေအိမ် ၁ လုံး လက်နက်ကြီး ထိမှန် ပျက်စီးခဲ့ကာ ပြည်သူပိုင် ပစ္စည်းများလည်း ထိခိုက်ပျက်စီးခဲ့ကြောင်းသိသည်။
တံခွန်တိုင် ကျေးရွာအုပ်စုအတွင်း တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်များက ၂၀၂၃ ခုနှစ် နွေရာသီ မှ စ၍ ၂၀၂၃ ခုနှစ် ဇွန်လ ၁၇ ရက် အထိ လက်နက်ကြီးများဖြင့် ပစ်ခတ်ခြင်းကြောင့် တံခွန်တိုင်ကျေးရွာအုပ်စု အတွင်း နေထိုင်သည့် ပြည်သူ ၃ ဦး သေဆုံးခဲ့ကာ နေအိမ် ၅ လုံး ပျက်စီး ဆုံးရှုံးခဲ့ကြောင်း ဒူးပလာယာခရိုင် – သတင်းနှင့် ပြန်ကြားရေးက ထုတ်ပြန်ထားသည်။
