ရန်ကုန်၊ မတ် ၉
ချင်းပြည်နယ်နှင့် မကွေးတိုင်းအစပ်၊ ဆောမြို့နယ်၊ ကံချောင်းရွာထိပ်တွင် အကြမ်းဖက်စစ်ကောင်စီတပ်နှင့် CDF ကန်ပက်လက်၊ ယောဒေသကာကွယ် ရေးအဖွဲ့ (The Youth Force) ကြား ယနေ့ မတ်လ ၉ ရက် နံ နက် ၁၀ နာရီခွဲမှ ၁၁ နာရီ ၄၀ မိနစ်အထိ တိုက်ပွဲဖြစ်ပွားပြီး စစ်သား ၅ ဦးသေဆုံးကာ ၉ ဦး ခန့် ဒဏ်ရာရကြောင်း CDF ကန်ပက်လက်က သတင်းထုတ်ပြန်သည်။
တိုက်ပွဲအတွင်း အကြမ်းဖက်စစ်ကောင်စီတပ်ဖွဲ့များသည် အပြေးအလွှားနေရာယူရင်း ယောဒေသကာ ကွယ်ရေးတပ်ဖွဲ့ ထောင်ထားသည့် မိုင်းများ နင်းမိပေါက်ကွဲပြီး စစ်ကောင်စီဘက်မှ အထိနာကြောင်း၊ ယင်းနောက် ပြည်သူ့ကာကွယ်ရေးတပ်ဖွဲ့များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
အလားတူ စစ်ကိုင်းတိုင်း၊ ချောင်းဦးမြို့နယ်၊ ကံကြီးကုန်းရွာတွင် တပ်စွဲထားသော အကြမ်းဖက်စစ်ကောင်စီတပ်ဖွဲ့နှင့် လက်ပါးစေ ပျူစောထီးအဖွဲ့ကို ဒေသကာကွယ်ရေးမဟာမိတ်တပ်ဖွဲ့များက ယနေ့ မတ်လ ၉ ရက်နေ့တွင် ဝင်တိုက်ပြီး ပျူစောထီးအဖွဲ့ဝင် ၄၀ နီးပါး သေဆုံးကြောင်း မြင်းခြံ 35 ပြောက်ကျားတပ်ဖွဲ့က သတင်းထုတ်ပြန်သည်။
MGN 35 ပြောက်ကျားတပ်ဖွဲ့၊ Zero ပြောက်ကျားတပ်ဖွဲ့၊ The Value of Young Men၊ MRA (မြောင်) ပူးပေါင်းတပ်ဖွဲ့က ကံကြီးကုန်းရွာရှိ အင်အား ၆၀ ခန့်ရှိသော စစ်ကောင်စီတပ်နှင့် ပျူစောထီးများကို ဝင်ရောက်တိုက်ခိုက်ခဲ့ပြီး ၃ နာရီကြာ အပြန်အလှန်ပစ်ခတ်ခဲ့ကြောင်း သိရှိရသည်။
ယင်းနောက် အကြမ်းဖက်စစ်ကောင်စီတပ်ကူအများအပြား ရောက်ရှိလာသဖြင့် ဒေသကာကွယ်ရေးတပ်ဖွဲ့များ အထိအခိုက်မရှိ ဆုတ်ခွာနိုင်ခဲ့ကြောင်း ထုတ်ပြန်ထားသည်။
အဆိုပါ စစ်ကောင်စီတပ်ဖွဲ့ဝင်များနှင့် ပျူစောထီးများသည် အနီးပတ်ဝန်းကျင် ကျေးရွာများကို ဒုက္ခပေး ဖမ်းဆီးနှိပ်စက်ခြင်း၊ ပစ္စည်းများကို အဓမ္မယူဆောင်ခြင်း၊ PDF ရဲဘော်အချို့ကို ဖမ်းဆီးသတ်ဖြတ်ခြင်း၊ ချောင်းမြောင်းတိုက်ခိုက်ခြင်းများ ပြုလုပ်နေခြင်းကြောင့် ဝင်ရောက်တိုက်ခိုက်ခဲ့ခြင်းဖြစ်ကြောင်း သိရှိရသည်။
အလားတူ ကချင်ပြည်နယ်၊ မိုးညှင်း-မိုးကောင်း လမ်းပိုင်းတွင် အကြမ်းဖက် စစ်ကောင်စီတပ်ဖွဲ့များ၊ တင့်ကားများပါဝင်သည့် ဆီဘောက်ဆာ ယာဉ်တန်းကို ယမန်နေ့ မတ်လ ၈ ရက်နေ့ ည ၇ နာရီ ဝန်းကျင်ခန့်တွင် KIA တပ်ဖွဲ့ ဦးဆောင်ကာ ဟိုပင် ပြည်သူ့ကာကွယ်ရေး တပ်ဖွဲ့များနှင့် ပူးပေါင်းပြီး မိုင်းဆွဲတိုက်ခိုက်ခဲ့ခြင်းကြောင်း စစ်သား ၁၀ဦးထက် မနည်းသေဆုံးခဲ့ကြောင်း သိရသည်။
အဆိုပါ အကြမ်းဖက် စစ်ကောင်စီ စစ်ကြောင်းကို မိုးညှင်း-မိုးကောင်း လမ်းပိုင်းတွင်ရှိ နမ္မနနှင့် တောင်နီ ကျေးရွာကြားတွင် KIA တပ်ဖွဲ့များနှင့် ဟိုပင် PDF တပ်ဖွဲ့က မိုင်းဆွဲခဲ့ခြင်းဖြစ်ကာ ဆီဘောင်ဆာကား ၁စီးနှင့် စစ်ကား ၄စီး မီးလောင် ပျက်စီးခဲ့ကြောင်း ဟိုပင် PDF တပ်ဖွဲ့က ထုတ်ပြန်ထားသည်။
ဓာတ်ပုံ- အကြမ်းဖက် စစ်ကောင်စီတပ်ဖွဲ့ဝင်များ။
Photo – Reuters
