ရန်ကုန်၊ မတ် ၁၀
ကရင်နီပြည်နယ်တွင် CDM ကျောင်းဆရာ ရဲဘော်ဇော်လင်းထွန်းနှင့် သူနာပြု ဒုတိယနှစ်ကျောင်းသူ ရဲဘော် အဲလစ္စဘက်တို့ အကြမ်းဖက်စစ်တပ်၏ ပစ်ခတ်မှုများကြောင့် မတ်လ ၉ ရက်နေ့တွင် ကျဆုံးသွားကြောင်း သိရှိရသည်။
ကရင်နီပြည်နယ် ဒီးမော့ဆိုမြို့နယ် သေးလေးဆူ တိုက်ပွဲ ၌ Karenni Generation Z တပ်ဖွဲ့မှ CDM ကျောင်းဆရာ ရဲဘော် ဇော်လင်းထွန်း ကျဆုံးခဲ့ရကြောင်း ၊ စစ်ကောင်စီဘက်မှ စနိုက်ပါကြောင့် ထိမှန်၍ ကျဆုံးခဲ့ရခြင်း ဖြစ်ကြောင်း သိရှိရသည်။
အသက် (၂၄)နှစ်အရွယ် ကျဆုံး ရဲဘော်ဇော်လင်းထွန်းမှာ စစ်အာဏာသိမ်းပြီးနောက်ပိုင်း အကြမ်းမဖက် ငြိမ်းချမ်းစွာ ပြည်သူ့အာဏာဖီဆန်ရေးလှုပ်ရှားမှု – CDM တွင် ပါဝင်ခဲ့ပြီး Karenni Generation Z (KGZ) တပ်ဖွဲ့ဝင်တွင် စစ်ကြောင်းမှူးအဖြစ် တာဝန်ထမ်းဆောင်ခဲ့သည်။
အလားတူ မတ်လ ၉ နံနက် ၂ ခန့် ဒီးမော့ဆိုမြို့နယ်၊ဆောင်ဒူလာကျေးရွာသို့ စစ်တပ်က လေကြောင်းဖြင့် ပစ်ခတ်တိုက်ခိုက်မှုကြောင့် Free Burma Rangers (ကရင်နီ) တပ်ဖွဲ့ဝင် ရဲဘော် အဲလစ္စဘက် ကျဆုံးကြောင်း၊ ရဲဘော်အဲလစ္စဘက်သည် ပဲခူးသားဖွားသင်တန်းကျောင်းမှ ဒုတိယနှစ်သင်တန်းသူဖြစ်ကြောင်း သိရှိရသည်။
