ရန်ကုန်တိုင်း၊ မြောက်ဒဂုံ၊ မရမ်းကုန်း၊ အင်းစိန်၊ လှိုင်သာယာ၊ လှိုင်၊ အရှေ့ဒဂုံ၊ တောင်ဥက္ကလာ၊ မြောက်ဥက္ကလာ၊ ရွှေပြည်သာ၊ မင်္ဂလာဒုံ၊ ဗဟန်းနှင့် တောင် ဒဂုံ တို့တွင် ဗုံးများ တစ်ပြိုင်နက်တည်း ပေါက်ကွဲ
ရန်ကုန်၊ ဇူလိုင် ၄
ရန်ကုန်တိုင်း၊ မြောက်ဒဂုံ၊ မရမ်းကုန်း၊ အင်းစိန်၊ လှိုင်သာယာ၊ လှိုင်၊ အရှေ့ဒဂုံ၊ တောင်ဥက္ကလာ၊ မြောက်ဥက္ကလာ၊ ရွှေပြည်သာနှင့် မင်္ဂလာဒုံမြို့နယ်တို့တွင် ယနေ့ ည ဗုံးများ တစ်ပြိုင်နက်တည်း ပေါက်ကွဲကြောင်း ဒေသပြည်သူများနှင့် တော်လှန်ရေး သတင်းရင်းမြစ်တချို့ထံမှ သိရှိရသည်။
ဇူလိုင်လ ၄ ရက်နေ့ ည ၈ နာရီ ၃၈ မိနစ်အချိန်မှစတင်၍ လှိုင်သာယာတွင် ဗုံး များ စတင်ပေါက်ကွဲခဲ့ခြင်းဖြစ်ပြီး ယင်းနောက် မြို့နယ်အများအပြားတွင် ဆက် တိုက် ဗုံးများပေါက်ကွဲကြောင်း သိရှိရသည်။
“ဒီည ၈ နာရီ ၃၈ မိနစ်မှာ လှိုင်သာယာမှာ အုန်းကနဲ ဗုံးစပေါက်တယ်။ နောက် တစ်ခါ ဆက်တိုက် ၁ လုံးထပ်ပေါက်တယ်။ အိမ်တောင်တုန်တယ်” ဟု လှိုင်သာ ယာမြို့နယ်၊ ၁ ထိပ်အနီးတွင် နေထိုင်သူ ပြည်သူတစ်ဦးက ပြောဆိုသည်။
ယင်းနောက် ယနေ့ည ၉ နာရီ ၁၆ မိနစ်မှစတင်၍ မြောက်ဒဂုံမြို့နယ် ၊ မရမ်း ကုန်း မြို့နယ် ၊ မြောက်ဥက္ကလာ ၊ တောင်ဥက္ကလာ ၊ အရှေ့ဒဂုံမြို့နယ်၊ လှိုင်မြို့ နယ်၊ အင်းစိန်မြို့နယ်တို့တွင် ဗုံးများ ဆက်တိုက်ပေါက်ကွဲခြင်းဖြစ်ကြောင်း သိရှိရသည်။
“အင်းစိန် ဖော့ကန်ဘက်မှာ ဗုံးပေါက်တာက လူထိခိုက်တယ်ဆိုပြီး သတင်း တော့ကြားတယ်။ နေရာအတိအကျမသိရသေးဘူး။ ဗုံး ၂ လုံးပေါက်တာ” ဟု အင်းစိန်မြို့နေ ပြည်သူတစ်ဦးက ပြောဆိုသည်။
ရန်ကုန်မြို့ခံ အများစုက ဗုံးပေါက်ကွဲမှုများသည် တစ်ချိန်တည်း တစ်ပြိုင်တည်း ဆက်တိုက် ပေါက်ကွဲခြင်းဖြစ်ကြောင်း ပြောဆိုကြသည်။
“ဒဂုံ အရှေ့ပိုင်းမြို့နယ်ဘက်မှာ ဗုံးတွေပေါက်နေတာ ၄လုံးလောက်ရှိပြီ။ ဘယ်နားမှာပေါက်နေလဲတော့မသိဘူး။ ကျနော်တို့ နေတာက ဒဂုံတက္ကသိုလ် ဘုန်းကြီးကျောင်းကွေ့နားက အတော်အသံကျယ်ကျယ်ကြားနေရတယ်” ဟု အရှေ့ဒဂုံမြို့နယ်တွင် နေထိုင်သူ ပြည်သူတစ်ဦးက ဆိုသည်။
လှိုင်သာယာရွှေလင်ပန်းအနီးတွင် နေထိုင်သူ ပြည်သူတစ်ဦးကလည်း ” ရွှေလင် ပန်းနားမှာ ကြားလိုက်ရတာက ည ၉ နာရီမှာ ဗုံးတစ်လုံးပေါက်တယ်။ နောက် တစ်ခါ ည ၉ နာရီ ၁၇ မိနစ်မှာ ဗုံးတစ်လုံးပေါက်တယ်။ နေရာ အတိအကျ တော့ မသိဘူး။ အသံက တော့ တော်တော် ကျယ်တယ်” ဟု ပြောဆိုသည်။
မြောက်ဒဂုံမြို့နယ်၊ ၂၇ ရပ်ကွက်တွင် နေထိုင်သူ ပြည်သူတစ်ဦးကလည်း ယနေ့ ည ၉ နာရီ ၁၇ မိနစ်အချိန် ပေါက်ကွဲသံ ၂ ချက်ကြားရကြောင်း၊ ည ၉ နာရီ ၂၁ မိနစ်အချိန်တွင် တတိယမြောက်ပေါက်ကွဲသံကြားရကြောင်း ပြောဆိုသည်။
အလားတူ ရန်ကုန်တိုင်း ရွှေပြည်သာမြို့နယ်တွင် ယနေ့ည ၈ နာရီ ၃၉ မိနစ် အချိန်တွင် လည်းကောင်း၊ မဂ်လာဒုံ မြို့နယ်တွင် ယနေ့ည ၉ နာရီ ၁၇ မိနစ် အချိန်တွင်လည်းကောင်း ပေါက်ကွဲမှုများဖြစ်ပွားကြောင်း သိရှိရသည်။
တောင်ဥက္ကလာပမြို့နယ်၊ မြင်သာစျေးအနီး နေထိုင်သူ ပြည်သူတစ်ဦးကမူ ယနေ့ ည ၈ နာရီ ၃၀ မိနစ်တွင် ပေါက်ကွဲသံများ ဆက်တိုက်ကြား ရသည် ဟုဆိုသည်။
“တောင်ဥက္ကလပမှာ ပေါက်ကွဲသံ တော်တော်ကျယ်ကျယ်ကြားရတယ်။ ည ၈ နာရီ ၄၀ မှာ တစ်ကြိမ်၊ ည ၉ နာရီ ၁၆ မိနစ်မှာ တစ်ကြိမ်။ အိမ်ပါ တုန်ပါတယ်။ ပေါက်ကွဲတာက တောင်ဥဣလာ၊ မြင်သာစျေးအနီးနားပါ” ဟု ရန်ကုန်မြို့မှ ပြည်သူတစ်ဦးက ရှင်းပြသည်။
နောက်ဆုံးရရှိထားသော သတင်းအချက်အလက်များအရ ယနေ့ည ၉ နာရီမှ ၉ နာရီ ၃၀ မိနစ်အတွင်း ဗဟန်းနှင့် ဒဂုံမြို့သစ်တောင်ပိုင်းတို့တွင်လည်း ဗုံးများ ပေါက်ကွဲခဲ့သဖြင့် အကြမ်းဖက်စစ်ကောင်စီတပ်များက ဂိတ်ချ စစ်ဆေးမှုများ လုပ်ဆောင်နေကြောင်း သိရှိရသည်။
ဓာတ်ပုံ- ညအချိန် ရန်ကုန်တွင် လုံခြုံရေးယူထားသည့် အကြမ်းဖက် စစ်ကောင် စီ တပ်ဖွဲ့ဝင်များ။ (ပုံအဟောင်းဖြစ်ပါသည်။)
Photo- AFP
