ကနေဒါ နိုင်ငံခြားရေးဝန်ကြီးဌာန နှင့် NUG နိုင်ငံခြားရေးဝန်ကြီးတို့ တွေ့ဆုံဆွေးနွေးမှု ရန်ကုန်ကနေဒါသံရုံးက တရားဝင် သတင်းထုတ်ပြန်
■ အကြမ်းဖက်စစ်တပ်ကို ကနေဒါက ဆက်လက် အရေးယူမည်ဖြစ်ပြီး NUG နှင့်အတူ မြန်မာပြည်သူဘက်မှ ရပ်တည်နေ
ရန်ကုန်၊ ဇူလိုင် ၁၄
ကနေဒါနိုင်ငံအစိုးရ နိုင်ငံခြားရေး ဝန်ကြီး Mélanie Joly ကိုယ်စား နိုင်ငံခြားရေး ဝန်ကြီးဌာန၏ လွှတ်တော် အတွင်း ရေးမှူး Robert Oliphant သည် မြန်မာနိုင်ငံ အမျိုးသားညီညွတ်ရေး အစိုးရ (NUG) နိုင်ငံခြားရေး ဝန်ကြီး ဒေါ်ဇင်မာအောင်နှင့် အွန်လိုင်းမှ တွေ့ဆုံဆွေးနွေးခဲ့ကြောင်း ရန်ကုန်အခြေစိုက် ကနေဒါသံရုံးက တရားဝင် သတင်းထုတ်ပြန် သည်။
လွှတ်တော် အတွင်းရေးမှူး Oliphant က ၂၀၂၁ ခုနှစ် မြန်မာစစ်တပ်၏ စစ်အာဏာသိမ်းခြင်း၊ ဒေသတွင်း လူသားချင်းစာနာမှုဆိုင်ရာ လုပ်ငန်းများ၊ လူ့အခွင့်အရေး၊ နိုင်ငံရေးနှင့် စီးပွားရေးဆိုင်ရာ အကျိုးဆက်များ သက်ရောက်စေခဲ့သော လက်နက်ကိုင် တိုက်ပွဲနှင့် အကြမ်းဖက်မှုများ၊ အရပ်သားများကို ပစ်မှတ်ထား တိုက်ခိုက်ခြင်းများ မြင့်တက်လာခြင်းတို့ကို ကနေဒါနိုင်ငံက ရှုတ်ချကြောင်း ထပ်လောင်း ပြောဆိုသည်။
NUG အနေဖြင့် အရေးပါသော အခန်းကဏ္ဍမှ ပါဝင်နေသည့် ဒီမိုကရေစီ နည်းလမ်းကျသော၊ ငြိမ်းချမ်းသော၊ အားလုံးပါဝင်သော မြန်မာနိုင်ငံ ပေါ်ထွန်းလာရေးအတွက် ဆောင်ရွက်နေသော ဒီမိုကရေစီ လိုလားသူ ပတ်သက်ဆက်နွှယ်သူများအားလုံးကို ထောက်ခံ အကူအညီပေးခြင်း အပါအဝင် မြန်မာနိုင်ငံနှင့် ရိုဟင်ဂျာ အရေးကိစ္စတို့ကို တုံ့ပြန်ဆောင်ရွက်သွားရန် ကနေဒါနိုင်ငံက ဆက်လက် သံန္နိဌာန် ချမှတ်ထားကြောင်း အလေးပေး ပြောဆိုသည်။
အားလုံးပါဝင်သော မြန်မာနိုင်ငံ တည်ဆောက်ရန် မျှော်မှန်းချက်ကို NUG က ပုံသွင်းဆောင်ရွက်နေသည့် လက်တလော လုပ်ဆောင်ချက်များနှင့် အရပ်သားများကို ကာကွယ်ပြီး နိုင်ငံတကာ ဥပဒေကို လိုက်နာလေးစားရန် လိုအပ်သည့် လုပ်ဆောင်ချက်များ အားလုံးကို ဆောင်ရွက်နေသော ကုလသမဂ္ဂ လူ့အခွင့်အရေး ကောင်စီ၏ အရေးပါသော ကတိကဝတ်များကို လွှတ်တော် အတွင်းရေးမှူး Oliphant က ကြိုဆိုလိုက်သည်။
မြန်မာနိုင်ငံတွင် ဆက်လက်ဖြစ်ပွားနေသည့် ပဋိပက္ခကြောင့် ထိခိုက်ခံစားရသူများနှင့် မကြာသေးမီက ဖြစ်ပွားခဲ့သည့် သဘာဝဘေးအန္တရာယ်ဖြစ်သော ဆိုက်ကလုန်း မိုခါကြောင့် ထိခိုက်ခံစားခဲ့ရသူများအတွက် စိုးရိမ်ပူပန်မိကြောင်း၊ လူသားချင်းစာနာမှုဆိုင်ရာ ကူညီမှုများကို အကန့်အသတ်များ ပြုလုပ်ခြင်း အပါအဝင် မြန်မာနိုင်ငံတွင်း လူ့အခွင့်အရေး ချိုးဖောက်မှုများ၊ ရိုဟင်ဂျာ အရေးကိစ္စနှင့် ယိုယွင်းလာသည့် လုံခြုံရေးအခြေအနေတို့ကို ကနေဒါနိုင်ငံက မဆုတ်မနစ် ထုတ်ဖော်ပြောဆိုနေကြောင်း ကနေဒါအစိုးရက ပြောဆိုသည်။
အာဆီယံအဖွဲ့၏ ကြိုးပမ်းမှုများကို ထောက်ခံကြောင်းနှင့် အာဆီယံ ဘုံသဘောတူညီချက် (၅) ရပ်ကို အပြည့်အဝ အကောင်အထည်ဖော်ရန် အရေးကြီးကြောင်း၊ ကုလသမဂ္ဂ လုံခြုံရေးကောင်စီ၏ ဆုံးဖြတ်ချက် အမှတ် (၂၆၆၉) ကို ကြိုဆိုကြောင်းနှင့် ကုလသမဂ္ဂ လုံခြုံရေးကောင်စီကို လွှဲပြောင်းပေးရန် တောင်းဆိုခြင်းများ၊ လေယာဉ်ဆီတင်သွင်းမှု ပိတ်ဆို့ခြင်းအပါအဝင် အဓိက နိုင်ငံတကာ မိတ်ဖက်များနှင့် ပူးပေါင်းကာ ကနေဒါနိုင်ငံ၏ စစ်တပ်အပေါ် ပိတ်ဆို့အရေးယူခြင်းများ အပါအဝင် မြန်မာနိုင်ငံတွင် တရားမျှတမှု၊ လူ့အခွင့်အရေးနှင့် တာဝန်ယူ၊ တာဝန်ခံမှုတို့ ရရှိရေးအတွက် ကနေဒါနိုင်ငံက ဆက်လက်လုပ်ဆောင်နေသည်ဟုဆိုသည်။
မြန်မာပြည်သူများ၏ စိတ်ဆန္ဒနှင့် ကိုက်ညီသော ဒီမိုကရေစီ ထွန်းကားပြီး ငြိမ်းချမ်းသော၊ အားလုံးပါဝင်သော မြန်မာနိုင်ငံ ပေါ်ထွန်းလာရေးအတွက် အာဆီယံအဖွဲ့၊ နိုင်ငံတကာ အသိုင်းအဝိုင်း၊ NUG ကဲ့သို့သော ဒီမိုကရေစီ လိုလားသူများနှင့် ကနေဒါနိုင်ငံက နီးနီးကပ်ကပ် ဆက်လက်ပူးပေါင်း လုပ်ဆောင်သွားမည် ဖြစ်ကြောင်း ၎င်းက ပြောဆိုသည်။
