စစ်ကောင်စီက မှတ်ပုံတင်ရှိသူတိုင်း စမတ်ကဒ်ပြုလုပ်ရန် ဖိအားပေးလျက်ရှိပြီး မပြုလုပ်သူများကို အရေးယူမည်ဟု ခြိမ်းခြောက်
ရန်ကုန်၊ ဩဂုတ် ၂၄
အကြမ်းဖက် စစ်ကောင်စီက ပြည်သူလူထုကို အမျိုးမျိုးဒုက္ခပေးနိုင်ရန် မှတ်ပုံတင်ရှိသူတိုင်း စမတ်ကဒ် အစိမ်းရောင်ပါ ပြုလုပ်ရမည်ဟု ဖိအားပေးခြိမ်းခြောက်လျက်ရှိကြောင်း ရန်ကုန်တိုင်းအတွင်းရှိပြည်သူ များက ရန်ကုန်ခေတ်သစ်သတင်းဌာနထံသို့ ပြောဆိုသည်။
ရန်ကုန်တိုင်း၊ တောင်ပိုင်းခရိုင်၊ ကော့မှူးမြို့နယ်တွင် မှတ်ပုံတင်ရှိသူတိုင်း စမတ်ကဒ်ပြုလုပ်ရန် ဖိအား ပေးခြိမ်းခြောက်နေပြီး ယနေ့ ဩဂုတ်လ ၂၄ ရက်နေ့တွင် လိုက်လံကြော်ငြာနေခြင်းဖြစ်ကြောင်း၊ မှတ်ပုံ တင်ရှိ သူတိုင်း စမတ်ကဒ် ပြုလုပ်ရန်၊ မှတ်ပုံတင်အပြင် စမတ်ကဒ် အစိမ်းရောင်ပါ ပူးတွဲကိုင်ထားရ မည် ဖြစ်ကာ စမတ်ကဒ်မရှိပဲ မှတ်ပုံတင်တစ်ခုတည်းသာရှိပါက အရေးယူခံရမည်ကြောင်း၊ ပြည်ပသွားနေသူ ရှိပါကလည်း ခိုင်လုံသည့်အထောက်အထားပြရမည်ဖြစ်ကြောင်း၊ စမတ်ကဒ်ပြုလုပ်မှုကို ယနေ့ဩဂုတ် လ ၂၄ ရက် တစ် ရက်တည်းသာ ပြုလုပ်ပေးမည်ဖြစ်ကြောင်း ကော့မှူးမြို့နယ်နေပြည်သူများထံမှ သိရ သည်။
“ယူသွားရမှာက မှတ်ပုံတင်မူရင်း မှတ်ပုံတင်မိတ္တူ၁ ခု သန်းခေါင်စာရင်းမိတ္တူ ၁ ခု ယူသွားပါ ။ စမ်း ချောင်းလဝက ရုံးမှာ ချိန်းပေးတာပါ ။ အဲ့ရုံးရောက်မှ ဖြည့်ရန်ဖောင်ပေးပါတယ်။ စမ်းချောင်း ၁၈ ရပ် ကွက် အလှည့်ကျ နေ့အလိုက်လို့ပြောပါတယ်။ ရပ်ကွက် ၁ ခု ၁ ရက်ဆီပါ တကယ်လို့ မမှီခဲ့တဲ့သူတွေ ၁၈ ရပ်ကွက် လုံးပြီးမှ နောက်တစ်ကြိမ် အလှည့်ကျ ပြန်ပြီး ရပ်ကွက်အလိုက်ပြန်ခေါ်မဲ့နေ့မှ လုပ်ပါ့ မယ်။ မိမိဘယ်ရပ်ကွက် ဘယ်နေ့ ဆိုတာ မိမိရပ်ကွက်ရုံးကို စုံစမ်းရမယ်လို့ သိရပါတယ်။” ဟု ရန်ကုန် မြို့၊ စမ်းချောင်းမြို့နယ်တွင်နေထိုင်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
စမတ်ကဒ်များကို Non CDM များ၊ စစ်ကောင်စီလက်အောက်ခံ ဝန်ထမ်းမိသားစုများ၊ ကျောင်း ဈေးသည် များကို စတင်လုပ်ခိုင်းနေပြီး ပြည်သူလူထုကို အမျိုးမျိုးဒုက္ခပေးရန် ကြံစည်နေခြင်းဖြစ်ကြောင်း ပြည်သူ များက ဝေဖန် သုံးသပ်ပြောဆိုသည်။
