မူဆယ်နှင့် ကွတ်ခိုင် မြို့နယ်တို့တွင် တိုက်ပွဲအပြင်းအထန် ဖြစ်ပွားပြီး စစ်ကား ၁ စီးပျက်စီးကာ စစ်တပ်ဘက်မှ ထိခိုက်သေဆုံးမှုရှိ
ရန်ကုန်၊ စက်တင်ဘာ ၇
ရှမ်းပြည်နယ်၊ မူဆယ်မြို့နယ်နှင့် ကွတ်ခိုင်မြို့နယ်တို့တွင် တိုက်ပွဲအပြင်းအထန် ဖြစ်ပွားပြီး စစ်ကား ၁ စီးပျက်စီးကာ စစ်တပ်ဘက်မှ ထိခိုက်သေဆုံးမှုရှိကြောင်း PSLF/TNLA သတင်းနှင့် ပြန်ကြားရေးဌာနက ထုတ်ပြန်ထားသည်။
စက်တင်ဘာလ ၆ ရက်နေ့ နံနက် ၈ နာရီ ၃၀ မိနစ်တွင် နမ်ပေါ် မှ မူဆယ် ၁၀၅ မိုင်ကို စစ်အင်အား အများအပြား ဖြည့်တင်းရန်လာသည့် အကြမ်းဖက် စစ်တပ်၏ စကခ ၁၆ ၊ ခလရ – ၂၄၁ နှင့် ပြည်သူ့စစ် ပူးပေါင်းစစ်ကြောင်းကို တာလုံအနီးတွင် တအာင်းတပ်မတော်က တိုက်ခိုက်ခဲ့ပြီး တိုက်ပွဲ အပြင်းအထန်ဖြစ်ပွားခဲ့ကြောင်း သိရသည်။
ထို့ပြင် မွန်းလွဲ ၁ နာရီ ၅၀ မိနစ်တွင် ကွတ်ခိုင်မြို့နယ် နမ့်ဖက်ကာရှိ အကြမ်းဖက် စစ်တပ်စခန်းကို တအာင်းတပ်မတော်က ဝင်ရောက် တိုက်ခိုက်ခဲ့ရာ နှစ်ဖက် တိုက်ပွဲထပ်မံ ဖြစ်ပွားခဲ့ကြောင်း၊ အဆိုပါ တိုက်ပွဲအတွင်း အကြမ်းဖက် စစ်တပ်ဘက်မှ စစ်ကား ၁ စီးပျက်စီးကာ ထိခိုက်သေဆုံးမှု ရှိပြီး အသေးစိတ် အခြေအနေကို အတည်မပြုနိုင်သေးကြောင်း သိရှိရသည်။
တိုက်ပွဲဖြစ်ပွားပြီးနောက် အကြမ်းဖက် စစ်တပ်၏ နမ့်ဖက်ကာ ၁၂၃ တပ် က လွယ်ကန်ရွာနှင့် လွယ်မော့ရွာကို လက်နက်ကြီး ၁၇ ကြိမ် ပစ်ခတ် တိုက်ခိုက်ခဲ့ကြောင်း၊ စက်တင်ဘာ ၅ ရက်နေ့ ည ၁၀ နာရီခန့်ကလည်း အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ မိုင်းယုလေးကျေးရွာကို လက်နက်ကြီး ၂၀ ကြိမ်ထက်မနည်းပစ်ခတ် တိုက်ခိုက်ခဲ့ပြီး လူနေအိမ် ၁၂ လုံး၊ ကားတချို့ ထိခိုက်ပျက်စီးကာ အိမ်မွေးတိရိစ္ဆာန်များ ထိခိုက်သေဆုံးခဲ့ကြောင်း သိရသည်။
