မတ္တရာမြို့နယ်အတွင်း စစ်ကြောင်းထိုးနေသည့် စစ်တပ်က PDF ရဲဘော် ၁ ဦးနှင့် ပြည်သူ ၁ ဦးကို ဖမ်းဆီး သတ်ဖြတ်ပြီး နေအိမ် ၁၄ လုံးနှင့် ဆိုင်ကယ် ၁ စီးကို မီးရှို့ဖျက်ဆီး
ရန်ကုန်၊ မတ် ၂၀
မန္တလေးတိုင်း၊ မတ္တရာမြို့နယ်အတွင်း စစ်ကြောင်းထိုးနေသည့် အကြမ်းဖက် စစ်ကောင်စီ တပ်သားများက PDF ရဲဘော် ၁ ဦးနှင့် ပြည်သူ ၁ ဦးကို ဖမ်းဆီး သတ်ဖြတ်ပြီး နေအိမ် ၁၄ လုံးနှင့် ဆိုင်ကယ် ၁ စီးကို မီးရှို့ဖျက်ဆီးခဲ့ကြောင်း မတ္တရာမြို့နယ် ပကဖ သတင်းတာဝန်ခံ ကိုဘိုတောက်က ရန်ကုန်ခေတ်သစ် မီဒီယာသို့ ပြောဆိုသည်။
မတ်လ ၂၀ ရက်နေ့ နံနက် ၅ နာရီခန့်တွင် မတ္တရာမြို့နယ်၊ ကျောက်တံတားကျေးရွာမှ အင်အား ၆၀ ခန့်ပါ အကြမ်းဖက် စစ်တပ် စစ်ကြောင်းသည် ညောင်ပင်သာကျေးရွာကို ဝင်ရောက် စီးနင်းပြီး မတ္တရာမြို့နယ် တိုက်နယ် ၅ ပကဖ ရဲဘော် ၁ ဦးနှင့်ပြည်သူ ၁ ဦးကို ဖမ်းဆီး သတ်ဖြတ်ခဲ့ပြီး ပြည်သူ ၁ ဦး ထိခိုက်ဒဏ်ရာရရှိခဲ့ကြောင်း သိရသည်။
အကြမ်းဖက် စစ်တပ် စစ်ကြောင်းသည် ရှားစေးချက်(ကြီး) ကျေးရွာကို ထပ်မံ ဝင်ရောက်စီးနင်းပြီး ပြည်သူပိုင် နေအိမ် ၁၄ လုံးနှင့် ဆိုင်ကယ် ၁ စီးကို မီးရှို့ဖျက်ဆီးခဲ့ကြောင်းသိရှိရသည်။
“အကြမ်းဖက် စစ်တပ်က စစ်ကြောင်း ၂ ကြောင်းနဲ့ ကျောက်တံတားကျေးရွာကနေ အင်အား ၆၀ လောက်နဲ့ စစ်ကြောင်း ၁ ကြောင်း နောက်ပြီး မတ္တရာမြို့နယ် သဖန်ကိုင်းရွာမှာ အင်အား ၁၂၀ နဲ့ စစ်ကြောင်း ၁ ကြောင်းက မတ္တရာမြို့နယ်ဘက် ညောင်ပင်သာရွာ ဘက်ကို စစ်ကြောင်း ထိုးဝင်ရောက်ပါတယ်။ တော်လှန်ရေး ရဲဘော် ၁ ဦးနဲ့ ပြည်သူ ၁ ဦးကို ဖမ်းဆီး သတ်ဖြတ်ပြီး နေအိမ်တွေ ဆိုင်ကယ်တွေကို မီးရှို့ဖျက်ဆီးခဲ့တာပါ” ဟု မတ္တရာမြို့နယ် ပကဖ သတင်းတာဝန်ခံ ကိုဘိုတောက်က ပြောဆိုသည်။
အကြမ်းဖက် စစ်တပ် စစ်ကြောင်းသည် မတ္တရာမြို့နယ်အတွင်း ထိတွေ့ တိုက်ပွဲခြင်းမရှိဘဲ ကျေးရွာအတွင်း စစ်ကြောင်းထိုး ဝင်ရောက်ကာ ပြည်သူပိုင် နေအိမ်များနှင့် ပစ္စည်းများကို ပစ်မှတ်ထား မီးရှို့ဖျက်ဆီးခြင်းများ လုပ်ဆောင်နေခြင်းဖြစ်ကြောင်း သိရသည်။
![](https://yktnews.com/wp-content/uploads/2024/03/432686394_772358611658414_1459554428475160122_n.jpg)
![](https://yktnews.com/wp-content/uploads/2024/03/432739217_772358588325083_1697537064587239380_n.jpg)
![](https://yktnews.com/wp-content/uploads/2024/03/432743886_772358688325073_6932870316750449596_n.jpg)
![](https://yktnews.com/wp-content/uploads/2024/03/432766713_772358711658404_1362887156220638656_n.jpg)