ရှမ်းမြောက်ဒေသ နှင့် မန္တလေးတိုင်း စစ်ဆင်ရေးများတွင် PDF တပ်ရင်း၊ တပ်ဖွဲ့များ ပါဝင် တိုက်ခိုက်နေပြီး အောင်ပွဲများ ဆက်တိုက် ရရှိထားဟု NUG အစိုးရ ကာကွယ်ရေးဝန်ကြီးဌာန အသိပေး
ရန်ကုန်၊ ဇွန် ၂၇
ရှမ်းမြောက်ဒေသ နှင့် မန္တလေးတိုင်း စစ်ဆင်ရေးများတွင် PDF တပ်ရင်း၊ တပ်ဖွဲ့များ ပါဝင် တိုက်ခိုက်နေပြီး အောင်ပွဲများ ဆက်တိုက် ရရှိထားဟု NUG အစိုးရ ကာကွယ်ရေးဝန်ကြီးဌာနက ယနေ့ ဇွန်လ ၂၇ ရက်နေ့တွင် အသိပေး ထုတ်ပြန်ထားသည်။
ရှမ်းမြောက် ဒေသ၌ ဇွန်လ ၂၅ ရက်နေ့က ပြန်လည် စတင်ခဲ့သည့် ၁၀၂၇ စစ်ဆင်ရေး အပိုင်း ၂ နှင့်အတူ ဟန်ချက်ညီ စစ်ဆင်မှုများကို ပြည်သူ့ကာကွယ်ရေး တပ်မတော်၊ တပ်ရင်း၊ တပ်ဖွဲ့များက ဆင်နွဲလျက်ရှိပြီး ရှမ်းမြောက်ဒေသနှင့် မန္တလေးတိုင်းတွင် အောင်ပွဲများ ဆက်တိုက် ရရှိထားကြောင်း သိရသည်။
ရှမ်းမြောက်ဒေသ နှင့် မန္တလေးတိုင်းစစ်ဆင်ရေး နယ်မြေများ အတွင်း ပြည်သူ့ကာကွယ်ရေး တပ်မတော် (မန္တလေး) ၊ မိုးကုတ် ဗျူဟာ တပ်ရင်း (၁၂၂၁၊ ၁၂၂၂၊ ၁၂၂၃၊ ၁၂၂၄)၊ အမှတ် ၅၁၃ တပ်ရင်း၊ ကျောက်မဲ ခရိုင် အထူး တိုက်ခိုက်ရေး တပ်ဖွဲ့၊ ပြင်ဦးလွင် ခရိုင် ပကဖ၊ မိုးကုတ် မြို့နယ် ပကဖ၊ မတ္တရာ မြို့နယ် ပကဖ တို့ ပါဝင်ကာ ကျောက်မဲ၊ နောင်ချို၊ မိုးကုတ်၊ မတ္တရာ စစ်မျက်နှာများတွင် မဟာမိတ် တိုင်းရင်းသား တော်လှန်ရေး အဖွဲ့များ နှင့်အတူ တိုက်ပွဲ ဝင်လျက်ရှိကြောင်း သိရှိရသည်။
နောင်ချို မြို့ရှိ ခမရ ၁၁၅ ၊ မတ္တရာ မြို့နယ်တွင်းရှိ ပန်းသလဲတောင်စခန်း၊ ကျောက်ကြမ်းတောင်စခန်း၊ ရေစိုတောင် စခန်း၊ (၆၀၆) ဒုံးတပ်ရင်း များကို သိမ်းပိုက်ရရှိထားပြီး ခမရ (၁၁၄)၊ (၁၀၁၄) လေကြောင်းရန် ကာကွယ်ရေးတပ် အင်ကြင်းမြိုင် တို့ကို အပြီးသတ် သိမ်းပိုက်ရေး ဆက်လက် ထိုးစစ်ဆင်လျက်ရှိကြောင်း သိရသည်။
မိုးကုတ်မြို့ နှင့် ကျောက်မဲမြို့များကိုလည်း မဟာမိတ်များ နှင့် အတူ ပူးပေါင်း တိုက်ခိုက်လျက်ရှိပြီး အကြမ်းဖက် စစ်တပ် စခန်း အများစုကို သိမ်းပိုက်ထားနိုင်ကာ အောင်ပွဲများ ဆက်တိုက် ရရှိလျက်ရှိကြောင်း၊ ရှမ်းမန်း စစ်ဆင်ရေး၏ ထူးခြားချက်သည် ရှမ်းမြောက်ဒေသ နှင့် ဆက်စပ်လျက် မန္တလေးတိုင်းထဲသို့ပါ ပြည်သူ့ကာကွယ်ရေး တပ်မတော် နှင့် တော်လှန်ရေး အင်အားစုများ ထိုးဖောက် ဝင်ရောက် စစ်ဆင်နေခြင်း ဖြစ်ကြောင်း အသိပေး ထုတ်ပြန်ထားသည်။