ဖာပွန်မြို့ကို စစ်တပ်က လေကြောင်းဖြင့် ဗုံးကျဲ တိုက်ခိုက်မှု အမျိုးသမီး ၁ ဦးသေဆုံး
ရန်ကုန်၊ အောက်တိုဘာ ၂
ကရင်ပြည်နယ်၊ ဖာပွန်မြို့ကို အကြမ်းဖက် စစ်တပ်က လေကြောင်းဖြင့် ဗုံးကျဲ တိုက်ခိုက်ခြင်းကြောင့် အမျိုးသမီး ၁ ဦးသေဆုံးခဲ့ကြောင်း KNU-မူတြော်ခရိုင်က ပြောဆိုသည်။
ယနေ့ အောက်တိုဘာလ ၂ ရက်နေ့ မွန်းလွဲ ၂ နာရီခန့်တွင် ဖာပွန်မြို့ကို အကြမ်းဖက် စစ်တပ်က ဂျက်တိုက်လေယာဥ် ၂ စီးဖြင့် ဗုံးသီး ၁၀ လုံးကျဲတိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှုအတွင်း ဖာပွန်မြို့ရှိ ရပ်ကွက် ၁ နှင့် ရပ်ကွက် ၂ အတွင်း ကျရောက် ပေါက်ကွဲခဲ့ပြီး အိမ်ယာဟောင်း အနီးအနား ဟင်းသီးဟင်းရွက်များ ရှာဖွေနေသည့် အသက် ၅၀ နှစ်အရွယ် ကလေး ၆ ယောက်၏ မိခင်ဖြစ်သူ နော်ဟဲခူ လေယာဥ် ဗုံးစ ထိမှန်ပြီး ပွဲချင်းပြီး သေဆုံးခဲ့ကြောင်း သိရှိရသည်။
