ရန်ကုန်၊ နိုဝင်ဘာ ၁၃
စစ်ကိုင်းတိုင်း၊ မြောင်မြို့နယ်၊ မကျည်းဘုတ်ကျေးရွာနှင့် တွင်းကြီးကျေးရွာအကြားရှိ ပြည်သူပိုင် ကြက်ခြံကို အကြမ်းဖက်စစ်တပ်က လေ ယာဉ်ဖြင့် ဗုံးကျဲတိုက်ခိုက်ခဲ့ရာ ပြည်သူ ၁၁ ဦး ထိခိုက် ဒဏ်ရာရရှိပြီး ကြက်ခြံမီးလောင်ကာ ကြက်များစွာသေဆုံးခဲ့ကြောင်း ဒေသနေပြည်သူများက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ နိုဝင်ဘာလ ၁၂ ရက်နေ့ မွန်းလွဲ ၁ နာရီ ၄၆ မိနစ်အချိန် မြောင်မြို့နယ်၊ မကျည်းဘုတ်ကျေး နှင့်တွင်းကြီးကျေးရွာကြားရှိ ပြည်သူပိုင်ကြက်ခြံတစ်ခြံကို အကြမ်းဖက်စစ်တပ်ကတိုက်ပွဲဖြစ်ပွားခြင်း မရှိဘဲ လေကြောင်းဖြင့် ဗုံး ၂ လုံးကျဲချပြီး ရော့ကတ်လက်နက်ဖြင့် ၃ ကြိမ်လှည့်ပတ်ပစ်ခတ်ခဲ့ကြောင်း၊ ပြည်သူ ၁၁ ဦးထိခိုက်ဒဏ်ရာရရှိပြီး ကြက်ခြံမီးလောင်သွားသဖြင့် ကြက်များစွာသေဆုံးခဲ့ကြောင်း သိရသည်။
“ပထမတစ်ခေါက်က ဗုံး ၂ လုံးချတာ၊ ပြီးတော့ ရော့ကတ်နဲ့ ၃ ခေါက်ပစ်တယ်၊ ဒုတိယ တစ်ခေါက်ကလည်း ဗုံးပဲ ထပ်ချတယ်။ ကြက်ခြံမီးလောင် သွားတာ၊ ကြက်တွေအများကြီးသေတယ်။ ပြည်သူ ၁၁ ဦး ထိခိုက်ဒဏ်ရာရတယ်၊ သေတဲ့သူတော့မရှိဘူး။” ဟု ဒေသနေပြည်သူတစ်ဦးက ရန်ကုန်ခေတ် သစ်သတင်းဌာနထံသို့ ပြောကြားသည်။
စစ်ကောင်စီ၏ လေယာဉ်ဖြင့် ဗုံးကျဲမှုကြောင့် ဒဏ်ရာရရှိသော ပြည်သူ ၁၁ ဦးတွင် ဒဏ်ရာပြင်းထန်သူများ ပါဝင်ကြောင်း သိရှိရသည်။
“ရွာပေါ်ကို ၂ ပတ်ဝဲပြီး ရွာကို မပစ်ဘဲ ရွာရဲ့ တောင်ဘက်မှာရှိတဲ့ ကြက်ခြံကို ပစ်သွားတာ။ ပစ်တာက ၃ပတ်ဝဲပြီး ပစ်တာ။ ကနဦးက Rocketနဲ့ ၂ လုံးတွဲ ၂ ကြိမ်ပစ်တယ်။နောက် ၃ ကြိမ်မြောက်မှာ ပေါင်၂၀၀ ဗုံးလို့ ယူဆရတဲ့ ဗုံး ၂ လုံးကျဲချသွားတာ။ မြေပဲ ဆွတ်နေရာကနေ ပြေးပုန်းကြတဲ့ အမျိုးသမီး ၉ ဦး ကျည်စ ထိမှန်သလို ကြက်ခြံပိုင်ရှင်ရဲ့ အသက် ၃ နှစ်သား ကလေးနဲ့ တခြား အမျိုးသား ၁ ဦးကျည်စထိမှန်ဒဏ်ရာရတယ်။ စုစုပေါင်း ဒဏ်ရာရတဲ့ ၁၁ ဦးထဲက အမျိုးသမီး ၁ဦး က ဦးခေါင်းကို ကျည်စထိမှန်တာဆို တော့ ဒဏ်ရာပြင်းထန်တယ်” ဟု ဒေသပြည်သူတစ်ဦးက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
