ရန်ကုန်၊ ဇန်နဝါရီ ၁၅
တီးတိန်မြို့သိမ်းတိုက်ပွဲကို PDA-Tedim က မဟာမိတ်တပ်များနှင့်အတူ ဖော်ဆောင်မည်ဖြစ်ပြီး မည်သည့်တော်လှန်ရေးအဖွဲ့အစည်းမဆို လာရောက်ပူးပေါင်းရေး အကူအညီ တောင်းဆိုကြောင်း တီးတိန်မြို့နယ် ကောင်စီက ကြေညာချက်ထုတ် ပြန်သည်။
ထို့ပြင် တီးတိန်မြို့သိမ်းတိုက်ပွဲနှင့် ပတ်သက်၍ မည်သည့်အဖွဲ့အစည်းကမှ ကန့် ကွက်ခွင့်မရှိသလို ကိုယ့်မြို့ကိုယ်သိမ်းမည်ဖြစ်၍ အမှန်တကယ် အကြမ်းဖက်စစ်ကောင်စီ တပ်သား များ ချေမှုန်းကင်းစင်စေလိုသော အဖွဲ့အစည်းမျ လာရောက်ပူးပေါင်းရန် တောင်းဆိုကြောင်း ထုတ်ပြန်စာတွင် ပါရှိရသည်။
ချင်းပြည်တောင်ပိုင်းတွင် ချင်းတော်လှန်ရေးတပ်ဖွဲ့ များက အပြီးတိုင်သိမ်းယူနိုင်ခဲ့ပြီးဖြစ်ပြီး ချင်းပြည်မြောက်ပိုင်းတွင်လည်း တွန်းဇံမြို့ကို တော်လှန်ရေးတပ်ဖွဲ့များက သိမ်းယူနိုင်ခဲ့ပြီးဖြစ်ကာ မဟာမိတ်တပ်များက ကာကွယ်ရေးကဏ္ဍ၌ တာဝန်ယူပေး၍ အုပ်ချုပ်ရေး၊တရားစီရင်ရေး၊ဥပဒေပြုရေးနှင့်ကိုယ့်ကံကြမ္မာကိုယ်ဖန်တီးရေးတို့တွင် နယ်မြေခံ အဖွဲ့အစည်းများ၌ အပြည့်အဝအပ်နှံထားသည်မှာ မျက်မြင်ကိုယ်တွေ့ပင်ဖြစ်ကြောင်းလည်း ထုတ်ပြန်ချက်တွင် ဖော်ပြထားသည်။
ထို့ပြင် လက်ရှိတွင် ဇိုမီး(ချင်း)များ၏ အခြေပြုနေထိုင်ရာ တီးတိန်မြို့နှင့် ခိုင်ကမ်းမြို့တွင်း၌သာ အကြမ်းဖက် စစ်ကောင်စီ၏ တပ်သားများ တပ်ချနေထိုင်လျက်ရှိသေးသဖြင့် အလျင်အမြန် တိုက်ခိုက် သိမ်းယူရေး အတွက် PDA-Tedim သည် စစ်ရေးမဟာမိတ်များနှင့်အတူ အကြမ်းဖက်စစ်တပ်ကို အမှန်တကယ်တော်လှန်တိုက်ခိုက်နေသည့် မည်သည့် တော်လှန်ရေးတပ်ဖွဲ့မဆို တိုက်ပွဲဝင်ရန်အတွက် ဖိတ်ခေါ်အကူအညီတောင်းခြင်း ဖြစ်ကြောင်း ကြေညာချက်တွင် ပါရှိသည်။
ထို့ပြင် ZFU/PDF Zoland တပ်ကလည်း ချင်းပြည်ကြားကာလအတိုင်ပင်ခံကောင်စီ (ICNCC)၏ ကာကွယ်ရေးတပ်ဖြစ်သည့် ချင်းညီနောင် (CB) နှင့် ပူးပေါင်းပြီး ဇိုမီးလူမျိုးများ၏ မြို့တော်ဖြစ်သည့် တီးတိန်မြို့မှ စစ်ကောင်စီတပ်များကို တိုက်ထုတ်ကာ လွတ်မြောက်နယ်မြေအဖြစ် ဖော်ဆောင်သွားမည်ဖြစ်ကြောင်း ကြေညာသည်။
သို့သော် National Front/CNA သည် People Defense Army (PDA) ကို လက်ကိုင်တုတ်အဖြစ် အသုံးချကာ တီးတိန်မြို့ကို စွက်ဖက်သိမ်းပိုက်ရန် ကြိုးပမ်းလျက်ရှိကြောင်း PDF Zoland က ဆိုသည်။
CNF/CNA နှင့် အပေါင်းအပါများ၏ ဆောင်ရွက်ချက်များသည် ပြည်သူလူထု၏ အကျိုးကိုရှေးရှုခြင်းတစ်စုံတစ်ရာ မပါရှိဘဲ မိမိတို့မြေပေါ်မှ အမြတ်ထုတ်လိုမှုနှင့် နိုင်ငံရေးလက်ဦးမှု ရယူလိုမှုသာဖြစ်ကြောင်း အထင်အရှားဖြစ်ကြောင်း ဇိုမီးတပ်က ပြောသည်။
၂၀၂၄ ခုနှစ် မေလတွင် တီးတိန်၌ ကြုံတွေ့ခဲ့ရသည့် ဖြစ်ရပ်ဆိုးသည်လည်း ၎င်းတို့၏ ကြားဝင်နှောင့်ယှက်မှုကြောင့်ဖြစ်သည်ဟု ZFU/PDF Zoland တပ်က ပြောသည်။
“တီးတိန်မြေအား စစ်ကောင်စီ၊ CNF အပါအဝင် အပေါင်းအပါဖြစ်သည့် PDA စသည့် မည်သည့် အဖွဲ့ အစည်းကိုမျှ ပေးအပ်မည်မဟုတ်ဘဲ တားမြစ်ထားသည့်ကြားမှ ကျူးကျော် ဝင်ရောက်လာပါက ICNCC/CB နှင့်လက်တွဲကာ ပြတ်ပြတ်သားသား တိုက်ထုတ်သွားမည်” ဟု ZFU/PDF Zoland ထုတ်ပြန်ထားသည်။
ယခု ထုတ်ပြန်အသိပေးချက်များသည် စစ်ကောင်စီ၊ PDA ၊ CNF နှင့် အပေါင်းအပါများ၏ ထိပါးဆောင်ရွက် ချက်များကို ထုတ်ဖော် ပြောကြားရန်ဖြစ်ပြီး စစ်ရေးနှင့်ပတ်သက်၍ ပြည်သူများအား ထပ်မံအသိပေးမည်ဟု ZFU/PDF Zoland ကဆိုသည်။
“ဤအဖွဲ့အစည်းများနှင့် ဆက်စပ်ပတ်သက်နေသူများ အနေဖြင့် အချိန်မီပြင်ဆင်မှုမရှိဘဲ တနေ့တွင် ပြည်သူလူထု၏ တရားစီရင်မှုကို ကြုံတွေ့ခံစားရမည်ဆိုပါက မိမိတို့အတွက် များစွာ ထိခိုက်နစ်နာရမည် ဖြစ်ကြောင်းကို လည်း သတိပေးလိုက်သည်” ဟု ထုတ်ပြန်သည်။
ဇိုမီးများ၏ ကိုယ်ပိုင်ပြဌာန်းခွင့်အတွက် ကြိုးပမ်းမှုကို ထိပါးနှောင့်ယှက်ရန် အာဏာရှင်ဆန်ဆန် ကြိုးပမ်းလာသည့် မည်သည့်အဖွဲ့အစည်းကိုမဆို လက်ပိုက်ကြည့်နေမည်မဟုတ်ကြောင်းလည်း ZFU/PDF Zoland က ပြတ်ပြတ်သားသား ထုတ်ပြန်ထားသည်။
ZFU/PDF Zoland ၏ သတိပေးစာနှင့်ပတ်သက်ပြီး National Front/CNA နှင့် People Defense Army (PDA) တို့မှာ တစ်စုံတစ်ရာ ထုတ်ပြန်ပြောဆိုလာခြင်းမရှိကြသေးပေ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
