စလင်းနှင့် ရွှေဘိုတို့မှ အတင်းအဓမ္မ တပ်သားသစ် အဖြစ် စုဆောင်းခံရသူ ၂ ဦး သေနတ် ၂ လက်နက် ယူဆောင်လာပြီး အလင်းဝင်၊ စစ်တပ်ထဲ အတင်းအဓမ္မ ထည့်သွင်းခဲ့သည့် အုပ်ချုပ်ရေးမှူးကို ပြန်လည် တိုက်ခိုက်မည်ဟုဆို
ရန်ကုန်၊ ဇန်နဝါရီ ၁၆
မကွေးတိုင်း၊ စလင်းမြို့နယ်နှင့် စစ်ကိုင်းတိုင်း၊ ရွှေဘိုမြို့နယ်တို့မှ အကြမ်းဖက် စစ်တပ်၏ တပ်သားသစ် အဖြစ် အတင်းအဓမ္မ စုဆောင်းခံရသော စစ်မှုထမ်း ၂ ဦးသည် သေနတ် ၂ လက် ယူဆောင်လာပြီး အလင်းဝင်ရောက်ခဲ့ကြောင်း ကြိုးကြာနီ ပြည်သူ့ကာကွယ်ရေးတပ်၊ မကွေး အရှေ့ခြမ်းအဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာထံသို့ ပြောဆိုသည်။
ဒီဇင်ဘာလ ၁၉ ရက်နေ့တွင် ဗိုးဗြဲ ၄၂၂ တပ်ရင်းမှ အကြမ်းဖက် စစ်တပ်၏ တပ်သားသစ် အဖြစ် အတင်းအဓမ္မ စုဆောင်းခံရသူ ၂ ဦးသည် လက်နက်များ ယူဆောင်လာပြီး အလင်းဝင်ရောက်ခဲ့ခြင်းဖြစ်ကြောင်း သိရသည်။
“အလင်းဝင်လာတဲ့သူတွေကို ဆုချီးမြှင်ဖို့ကတော့ အစီစဉ်တော့ရှိတယ်။ နောက်လာမည့် သူတွေကတော့ အဓိကတော့ ဖုန်းလိုင်းအဆက်အသွယ်တွေ ရအောင် လုပ်ထားပါလို့ ကျွန်တော်တို့ကတော့ မှာချင်ပါတယ်။ လက်ရှိကတော့ သူတို့ နှစ်ယောက်ကို နောက်တန်း ရဲဘော်တွေနဲ့ အတူတူ ကျွန်တော်တို့ တပ်ရင်းရဲ့ လုပ်နည်း လုပ်ထုံးတွေနဲ့တော့ ကျွန်တော်တို့ စီစစ်ထားတယ်။ နောက်တန်းမှာ ရှိနေတဲ့ ရဲဘော်တွေနဲ့ အတူတကွ သူတို့ကို တပ်ရင်းတပ်ဖွဲ့ နေရာတွေမှာ ပေါ့ပေါ့ပါးပါး လွတ်လွတ်လပ်လပ်ပဲ လက်ရှိတော့ ပေးနေနေတယ်” ဟု ကြိုးကြာနီ ပြည်သူ့ကာကွယ်ရေးတပ်၊ မကွေး အရှေ့ခြမ်းအဖွဲ့မှ တာဝန်ရှိသူတစ်ဦးက ပြောဆိုသည်။
အဆိုပါ အလင်းဝင်လာသော စစ်မှုထမ်း တပ်သားသစ် ၂ ဦးသည် MA-1 သေနတ် ၁ လက်၊ ၁၄ မိုင်း ၁ လုံး၊ ကျည် ၂၅၈ တောင့် ၊ MA 11 သေနတ် ၁ လက်ယူဆောင်လာခဲ့ကြောင်း၊ ယင်း စစ်မှုထမ်း တပ်သားသစ်များသည် အပတ်စဉ် ၁ နှင့် အပတ်စဉ် ၅ မှ သင်တန်းဆင်းလာသူများ ဖြစ်ကြောင်း သိရှိရသည်။
ယင်း အလင်းဝင်ရောက်ခဲ့သူ ၂ ဦးကို တော်လှန်ရေး ရဲဘော်များက မေးမြန်းစဉ် ၎င်းတို့ကို အကြမ်းဖက် စစ်တပ်ထဲ အတင်းအဓမ္မ ထည့်သွင်းခဲ့သည့် အုပ်ချုပ်ရေးမှူးကို ပြန်လည် တိုက်ခိုက်သွားမည်ဟု ပြောဆိုခဲ့ကြောင်း သိရသည်။
“အလင်းဝင်လာတဲ့ သူ ၂ ဦးကို ကျွန်တော်တို့က သူတို့ မိဘတွေ ပြန်နေချင်လား။ သူတို့ သားသမီးတွေနဲ့ ပြန်နေချင်လား။ ဒါမှမဟုတ်ရင်လည်း ဒီတော်လှန်ရေးကိုပဲ ကျွန်တော်တို့ ပူးပေါင်းပြီး ဆက်ပြီး ဆောင်ရွက်မလားလို့ သူတို့တော့ မေးထားတာ ရှိတယ်။ သူတို့ကို မေးထားတော့ တစ်ယောက်ကတော့ ကျွန်တော်တို့နဲ့ ဆက်လက်ပြီး ဆောင်ရွက်ပြီးတော့ သူကို စစ်တပ်ထဲ ထည့်ပေးလိုက်တဲ့ အုပ်ကြီးကို ပြန်ပြီး ရှင်းဖို့ပေါ့နော်။ သူတို့ ရွာမှာ ရှိနေတဲ့ စစ်ကောင်စီနဲ့ ဒေါက်တိုင် တွေရှိတဲ့ လူတွေကိုတော့ ပြန်ပြီးရှင်းလင်းချင်တယ်လို့ ပြောတာတွေရှိတယ်။ ကျွန်တော်တို့နဲ့ ပါဝင်ပြီး ပေါင်းပြီးလုပ်မယ်ပေါ့။ တစ်ယောက်ကတော့ သူ့မိသားစု ရှိရာကို ပြန်မယ်ပေါ့ အဲလိုဖြေကြားတာရှိတယ်” ဟု ကြိုးကြာနီ ပြည်သူ့ကာကွယ်ရေးတပ်၊ မကွေး အရှေ့ခြမ်းအဖွဲ့မှ တာဝန်ရှိသူတစ်ဦးက ပြောဆိုသည်။
