ရန်ကုန်၊ မေ ၂၃
ကချင်ပြည်နယ်၊ ဖားကန့်မြို့နယ်တွင် စစ်တပ်နှင့် KIA အကြား တိုက်ပွဲပြင်းထန်နေပြီး စစ်ကြောင်းများစွာဖြင့် စစ်ကောင်စီတပ်က ထိုးစစ်ဆင်လာကြောင်း ဒေသခံများက ရန်ကုန်ခေတ်သစ်သတင်းဌာနသို့ပြောဆိုသည်။
မေလ ၂၃ ရက်နေ့ ဖားကန့် ကရင်ချောင် မှော်ဘက်တွင် KIA နှင့် PDF ပူးပေါင်းတပ်ဖွဲ့များက စစ်ကြောင်းထိုးလာသော စစ်တပ်ကို မိုင်းဆွဲခြင်း ပစ်ခတ်တိုက် ခိုက်ခြင်းများ လုပ်ဆောင်ကြောင်း၊ ကရင်ချောင်တံတားတွင် စစ်တပ်က ပြည်သူတစ်ဦးကို ပစ်သတ်လိုက်ပြီး စစ်တပ်ပစ်ခတ်သော လက်နက်ကြီးကျည်ထိမှန်၍ ပြည်သူတစ်ဦး ဒဏ်ရာရရှိထားကြောင်း သိရှိရသည်။
“စစ်တပ်က စစ်ကြောင်းတွေ ဖားကန့်ဘက်ကို ချီလာတာ။ တိုက်ပွဲက အဲဒါကြောင့်ဖြစ်နေတာ ။ ကရင်ချောင်ဘက်မှာလည်း ဖြစ်နေတယ်။ ဆန်းကြွယ်နဲ့ ကျောက်သွေးတောင်အကြားမှာလည်း အခု နေ့လယ် လောက်ကစပြီး တိုက်ပွဲဖြစ်နေကြတယ်။ လက်နက်ကြီးသံ ၂ချက် ၊ဗုံးလိုအသံ ၃ချက် တောက်လျှောက် အပြန်အလှန်ပစ်သံတွေကြားရတယ်။ ဖားကန့်ကနေ စစ်ကြောင်းတစ်ခု ထက်တိုးလာတယ်။ ယူမာ ဘက်မှာလည်း ဖြစ်နေတယ်။ စစ်ကြောင်းကို မိုင်းဆွဲလိုက်တာ။ အခု တိုက်ပွဲတွေမှာ စစ်တပ်က အတော်ကို အထိနာနေတယ်” ဟု KIA သတင်းရင်းမြစ်လည်းဖြစ်၊ ဒေသခံလည်းဖြစ်သူ သတင်းရင်းမြစ်က ရန်ကုန်ခေတ်သစ်သတင်းဌာနသို့ ပြောဆိုသည်။
လက်ရှိတွင် စစ်တပ်က ဖားကန့်မြို့ထဲကို ဝင်ရောက်စီးနင်းထားပြီး တွေ့ရှိသမျှ လူမှန်သမျှကို ရိုက်နှက်စစ်ဆေးနေကြောင်း သိရှိရသည်။
အလားတူ ချင်းပြည်နယ်၊ မင်းတပ်မြို့နယ် ယမန်နေ့ မေလ ၂၂ ရက်နေ့ ည ၁၀ နာရီဝန်းကျင်တွင် မင်းတပ်မြို့အရှေ့ပြင်မီးသတ်ကုန်းတွင် တပ်စွဲထားရှိနေသည့် စစ်တပ်ကို CDF-Mindat က သွားရောက်ပစ်ခတ်ခဲ့ရာ မိနစ် ၃၀ အကြာတိုက်ပွဲဖြစ်ပွားခဲ့ပြီး စစ်ကောင်စီဘက်မှ ၂ ဦးသေဆုံးကြောင်း၊ CDF- Mindat က အထိအခိုက်မရှိ ပြန်လည် ထွက်ခွာလာနိုင်ကြောင်း CDF မင်းတပ်က သတင်းထုတ်ပြန်သည်။
မေလ ၂၃ ရက်နေ့ နံနက် ၈ နာရီ ၁၅ မိနစ်အချိန် မင်းတပ်မြို့အတွင်းရှိ စစ်ကောင်စီတပ်များက တိုက်နယ် ၄ ဘက်သို့ လက်နက်ကြီးများရမ်းသန်းပစ်ခတ်ရာ လက်နက်ကြီးကျည်ထိမှန်၍ အသက် ၁၁ နှစ်အရွယ်ကလေး တစ်ဦးခြေထောက်တစ်ဘက်ပြတ်ကြောင်း၊ အသက် ၄၀ ကျော်အမျိုးသမီးတစ်ဦး ဦးခေါင်းတွင် ဒဏ်ရာရရှိကြောင်း၊ ပြည်သူပိုင်နေအိမ်နှစ်လုံးပျက်စီးသွားကြောင်း သိရှိရသည်။
