တရုတ် ရေနက်ဆိပ်ကမ်း နှင့် စီးပွားရေးဇုန်စီမံကိန်း ရှိရာ ကျောက်ဖြူ မြို့နယ်တွင် တိုက်ပွဲများ အပြင်းအထန်ဖြစ်ပွားနေပြီး စစ်ကောင်စီက လေယာဉ်ဖြင့် ဗုံးကျဲတိုက်ခိုက်
ရခိုင်ပြည်၊ ကျောက်ဖြူမြို့ နယ်၊ စစ်ကောင်စီ၏ ဓညဝတီရေတပ်အနီး အာရက္ခတပ်တော် AA နှင့် စစ်ကောင်စီတို့ တိုက်ပွဲ ပြင်းထန်နေကြောင်း ဒေသခံများ၏ ပြောဆိုချက် အရ သိရသည်။
ဓညဝတီရေတပ်စခန်းအနီး စစ်ကောင်စီ၏ ကာကင်းစခန်းများကို အာရက္ခတပ်တော် AA က ထိုးစစ်ဆင် တိုက် ခိုက်နေပြီး ဓညဝတီရေတပ်ကိုလည်း လက်နက်ကြီးများဖြင့် ပစ်ခတ်တိုက်ခိုက်နေကြောင်း၊ စစ်ကောင်စီက လေကြောင်းတိုက်ခိုက်မှုများဖြင့် ခုခံနေပြီး သစ်ပုတ်တောင်ကျေးရွာ အနီးတစ်ဝိုက်နှင့် ကြတ္တိန်၊ စည်မော် ကျေး ရွာဘက်သို့ ဗုံးကျဲတိုက်ခိုက်ခဲ့ကြောင်း သိရသည်။
” သစ်ပုတ်တောင်နဲ့ ရေတပ်မနီးက ရွာတွေကို လေကြောင်းဗုံးကြဲ တိုက်ခိုက်ခဲ့ပါတယ်။ ဒေသခံပြည်သူတွေက ဘေးလွတ်ရာကို ရွှေ့ပြောင်းနေနေကြပါတယ်။ အထိအခိုက် သေဆုံးမှုရှိလားမရှိဘူးလား မသိဘူး” ဟု ဒေသတစ်ဦးက ပြောဆိုသည်။
ဖေဖော်ဝါရီလ ၂၀ ရက်နေ့ကတည်းက ကျောက်ဖြူမြိုနယ်၊ အာရက္ခတပ်တော်နှင့် စစ်ကောင်စီ တပ်တို့အကြား တိုက်ပွဲစတင်ဖြစ်ပွားနေခြင်းဖြစ်ပြီး စစ်ကောင်စီတပ်က ကျောက်ဖြူမြို့နယ်၊ ကျေးရွာများကို လေကြောင်းကနေ ပစ်ခတ်ခဲ့ကြောင်း သိရှိရသည်။
“လက်နက်ကြီးတွေနဲ့ အပြန်အလှန် ပစ်ခတ်တာတွေရှိပါတယ်။ လေယာဉ်ကတော့ နေ့တိုင်းလာပါတယ်။ မနေ့က ဗုံးကြဲသွားတယ်လို ပြောတယ်” အထိ အခိုက်မှု အခြေအနေမသိရဘူး” ဟု အခြားဒေသခံတစ်ဦးက ဆိုသည်။
ယခင်က ကျောက်ဖြူအဝင်အထွက်များကို ကန့်သတ်ချက်ဖြင့် သွားလာ၍ ရသော်လည်း လက်ရှိတွင် စစ်ကောင်စီ နှင့် အာရက္ခတပ်တော် AA က ကျောက်ဖြူမြို့ မြို့အဝင်၊ အထွက်ကို ပိတ်လိုက်ပြီး ဖြစ်ကြောင်း ဒေသခံများက ပြောသည်။
တိုက်ပွဲများကြောင့် သစ်ပုတ်တောင်အုပ်စုနှင့် ရေတပ်အနီးက ကျေးရွာပေါင်း ၁၀ ကျော်က ဒေသခံပြည်သူများမှာ အိုးအိမ်စွန့်ခွာ ထွက်ပြေးတိမ်းရှောင်နေရပြီး လူပေါင်း ၃၀၀၀ ကျော် စစ်ဘေးဒုက္ခသည် ဖြစ်နေရသည်ဟု သိရသည်။
စစ်ကောင်စီက ဖုန်းလိုင်း၊ အင်တာလိုင်း ဖြတ်တောက်ထား၍ ဒေသခံပြည်သူများ အထူးသဖြင့် စစ်ရှောင်ပြည်သူများမှာ ဆက်သွယ်ရေး ခက်ခဲနေကြပြီး စားနပ်ရိက္ခာ အကူအညီများလည်း လိုအပ်နေကြောင်း သိရသည်။
လက်ရှိတွင် အာရက္ခတပ်တော် AA သည် မကွေး၊ ပဲခူး၊ ဧရာဝတီတိုတွင် ဒေသခံပြည်သူ့ကာကွယ်ရေးတပ်များနှင့် စစ်ကောင်စီတပ်များကို တိုက်ခိုက်နေသလို ရခိုင်ပြည်အတွင်း ကျန်ရှိနေသည့် စစ်တွေနှင့် ကျောက်ဖြူမြို့ကို ထိုးစစ်အရှိန် မြှင့်တင်နေကြောင်း သိရှိရသည်။
ဓာတ်ပုံ- ကျောက်ဖြူမြို့နယ်၊ မဒေးကျွန်းရှိ တရုတ်စီမံကိန်းတစ်ခု။ Photo Credit- Agency။
(Western News သည် ရန်ကုန်ခေတ်သစ်၏ မဟာမိတ်ဖြစ်သည်။)
