ရန်ကုန်၊ ဇွန် ၈
မကွေးတိုင်း ရေစကြိုမြို့နယ် အခြေစိုက် အကြမ်းဖက် စစ်တပ် တပ်မ ၁၀၁ လက်အောက်ခံ ခလရ ၂၅၆ နှင့် ခလရ ၂၅၈ တို့ကို ဒေသခံ ကာကွယ်ရေး တပ်ဖွဲ့များက ဇွန်လ ၆ ရက်နေ့ နံနက် ၁ နာရီခန့်အချိန် လက်နက်ကြီးများဖြင့် ပစ်ခတ်တိုက်ခိုက်ခဲ့ပြီး စစ်သားများ ထိခိုက်သေဆုံးမှု အခြေအနေကို အတည်မပြုနိုင်သေးကြောင်း Yesagyo PDF တပ်ဖွဲ့ထံမှ သိရသည်။
ပစ်ခတ် တိုက်ခိုက်မှု ဖြစ်စဉ် အတွင်း ခလရ ၂၅၆ နှင့် ခလရ ၂၅၈ တပ်ရင်းမှ အကြမ်းဖက် စစ်ကောင်စီ တပ်ဖွဲ့ဝင်များ အလန့်တကြား အော်ဟစ်ပြေးလွှား သံများ ဆူညံခဲ့ပြီး လက်နက်ငယ်များဖြင့် ပြန်လည် ပစ်ခတ်ခဲ့သော်လည်း ပြည်သူ့ ကာကွယ်ရေး ရဲဘော်များ အထိခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။
အဆိုပါ အကြမ်းဖက် စစ်ကောင်စီ တပ်ရင်း ၂ ခုကို Yesagyo PDF၊ Northern Yesagyo (N-YSO) ပြောက်ကျားတပ်ဖွဲ့၊ Myaing Rural Guerilla Force နှင့် Steel Hawk (သံမဏိသိန်းငှက်) PDF -Myaing Township တပ်ဖွဲ့တို့က ပူးပေါင်း တိုက်ခိုက် ခဲ့ခြင်းဖြစ်ကြောင်း သိရသည်။
အလားတူ စစ်ကိုင်းတိုင်း ရေဦးမြို့နယ် ချမ်းသာရွာကို မီးရှို့ဖျက်ဆီးခဲ့သော အကြမ်းဖက် စစ်တပ် စစ်ကြောင်းအား ဇွန်လ ၈ ရက်နေ့ နံနက် ၇ နာရီခန့်တွင် ရွာမိဿာရွာနှင့် ညောင်လှရွာ မူးဆုံကြားတွင် ဒေသခံ ကာကွယ်ရေး တပ်ဖွဲ့များက စောင့်ကြို တိုက်ခိုက်ခဲ့ပြီး စစ်သား ၇ ဦးသေဆုံးခဲ့ကြောင်း Freedom Revolution Force တပ်ဖွဲ့ထံမှ သိရသည်။
အဆိုပါ အကြမ်းဖက် စစ်တပ် စစ်ကြောင်းကို Freedom Revolution Force (FRF)တပ်ဖွဲ့၊ ဗိုလ်မုတ်ဆိတ် အဖွဲ့၊ DRPA တပ်ဖွဲ့၊ ရေဦးမြို့နယ် ပကဖ ပူးပေါင်းအဖွဲ့တို့က တိုက်ခိုက်ခဲ့ခြင်းဖြစ်ပြီး အပြန်အလှည် ပစ်ခတ်ချိန် ၁ဝ မိနစ်ခန့် ကြာမြင့်ခဲ့ကာ စစ်သား ၇ ဦးသေဆုံးကာ ၂ဝ ကျော် ထိခိုက်ဒဏ်ရာရရှိခဲ့ကြောင်း သိရသည်။
မကွေးတိုင်း ပခုက္ကူမြို့နယ် ကိုးပင်ရွာနှင့် အင်ပင်ရွာကြားတွင် ဆိုင်ကယ်ဖြင့် ပြန်လာသည့် အရပ်ဝတ် စစ်ဗိုလ် ၁ ဦးနှင့် ပျူစောထီး ၁ ဦးကို ဇွန်လ ၇ ရက်နေ့ နံနက် ၉ နာရီခန့်တွင် ကာကွယ်ရေး တပ်ဖွဲ့များက Glock အတိုနှစ်လက်ဖြင့် ပစ်ခတ်တိုက်ခိုက်ခဲ့ပြီး အရပ်ဝတ် စစ်ဗိုလ် သေဆုံးခဲ့ကြောင်း သိရသည်။
ပစ်ခတ်မှု ဖြစ်စဉ်အတွင်း တစ်ပွင့် စစ်ဗိုလ်သည် ရင်ဘတ်ကို ကျည်ထိမှန်ခဲ့ကြောင်း၊ ပျူစောထီးမှာ ပေါင်ကို ကျည်ထိမှန်ခဲ့ကြောင်း၊ အချိန် အနည်းငယ် အကြာတွင် အကြမ်းဖက် စစ်တပ် တပ်ဖွဲ့များဝင်များ ရောက်ရှိလာပြီး စစ်ဗိုလ်ကို ဆေးရုံသို့ ပို့ဆောင်စဉ် လမ်းတွင် သေဆုံးခဲ့ကြောင်း Yesagyo Revolution Group (YRG) အဖွဲ့မှ ထုတ်ပြန်ထားသည်။
ယင်းပစ်ခတ်မှုကို Yesagyo Revolution Group (YRG) အဖွဲ့၊ မဟာမိတ်ညီနောင်ဖြစ်သော Urban Underground Revolution Force -YSO အဖွဲ့တို့က ပူးပေါင်း တိုက်ခိုက်ခဲ့ခြင်း ဖြစ်ကြောင်း သိရသည်။
