ရန်ကုန်၊ မေ ၂၆
ပဲခူးတိုင်း၊ ကျောက်ကြီးမြို့နယ်၊ ကျွန်းကြီးကျေးရွာရှိ မင်္ဂလာဆောင်နေအိမ်ကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် သတို့သမီး နော်ကမွီးဖော အပါအဝင် သေဆုံးသူ ၁၂ ဦးအထိတိုးလာကြောင်း KNU ဗဟိုက ထုတ်ပြန်ထားသည်။
ယမန်နေ့ မေလ ၂၅ ရက်နေ့ နံနက် ၉ နာရီခန့်အချိန် ကျောက်ကြီးမြို့နယ်၊ ကျွန်းကြီးကျေးရွာ မင်္ဂလာဆောင်ကို အကြမ်းဖက် စစ်ကောင်စီတပ်က ဂျက်ဖိုက်တာ ၁ စင်းဖြင့် ဗုံး ၂ လုံး ကျဲချ တိုက်ခိုက်မှုကြောင့် အသက် ၅ နှစ် အရွယ် ကလေးငယ် ၂ ဦးနှင့် သတို့သမီး အပါအဝင် ပြည်သူ ၁၂ ဦးသေဆုံးကာ အသက်မပြည့်သေးသော ကလေးငယ် ၁၃ ဦး အပါအဝင် ပြည်သူ ၃၇ ဦး ပြင်းထန် ဒဏ်ရာရရှိခဲ့ကြောင်း၊ ထို့ပြင် နေအိမ် ၁၁ လုံး၊ ဈေးဆိုင် ၁ လုံး၊ တဲ ၁ လုံး၊ ဝက်တဲ ၁ လုံး၊ လယ်ထွန်စက် ၁ လုံး၊ အိမ်သာ ၂ လုံးနှင့် စာသင်ကျောင်းခြံတို့ ပျက်စီးခဲ့ကြောင်း သိရသည်။
အကြမ်းဖက် စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ လက်နက်ကိုင်မရှိသော ဒေသ ပြည်သူများ နေထိုင် သော ကျွန်းကြီးကျေးရွာ မင်္ဂလာဆောင်ကို ရည်ရွယ်ချက်ရှိရှိ ဗုံးကျဲ တိုက်ခိုက်ခဲ့ခြင်းဖြစ်သည်။
ထို လေကြာင်း တိုက်ခိုက်မှုကြောင့် သေဆုံးသူ ၁၂ ဦးမှာ အသက် ၃၈ နှစ်အရွယ် နော်ဖောတာရှူ ၊ အသက် ၃၅ နှစ်အရွယ် နော်ဖောသဒါးဝါး ၊ အသက် ၅ နှစ်အရွယ် စောနေဘလုမူး ၊ အသက် ၄၆ နှစ်အရွယ် နော်ဂျူးပလီ၊ အသက် ၅ နှစ်အရွယ် နော်စုထူးထူးအောင် ၊ အသက် ၂၂ နှစ်အရွယ် သတို့သမီး နော်ကမွီးဖော၊ အသက် ၁၉ နှစ်အရွယ် မောင်သုသု ၊ အသက် ၁၄ နှစ်အရွယ် မောင်မြင့်မြတ်ဟိန်း ၊ အသက် ၅၂ နှစ်အရွယ် နော်ဘူးလာဖော ၊ အသက် ၁၇ နှစ်အရွယ် နော်စေးကဘိုဖော ၊ အသက် ၄၀ နှစ်အရွယ် နော်အယ်လားဖော ၊ အသက် ၄၄ နှစ် အရွယ် စောပုလဲ တို့ဖြစ်သည်။
လေကြောင်းတိုက်ခိုက်မှုကြောင့် အပြင်းအထန် ဒဏ်ရာရရှိသူ ၃၇ ဦးရှိပြီး ကလေးငယ်များနှင့် သက်ကြီးရွယ်အို များ ပါဝင်ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
