ရန်ကုန်၊ ဇွန် ၁၈
မကွေးတိုင်း၊ ပခုက္ကူမြို့နယ်၊ ကမ္မမြို့ရှိ ကျေးရွာများသို့ စစ်တပ်က လေယာဉ်ဖြင့် ၁၃ ရက် ဆက်တိုက် ဗုံးကျဲ ခြင်းနှင့် စစ်ကြောင်းထိုးနေခြင်းတို့ကြောင့် ပြည်သူ ၅ ဦးသေဆုံးကာ ၁၄ ဦး ပြင်းထန်ဒဏ်ရာရရှိခဲ့ကြောင်း ကမ္မဒေသတော်လှန်ရေးတပ်ပေါင်းစုမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
ဇွန်လ ၁၄ ရက်နေ့ မွန်းလွဲပိုင်း ကမ္မဒေသရှိ ကျေးရွာများကို အကြမ်းဖက် စစ်တပ်က ဂျက်ဖိုက်တာ ၄ စီးဖြင့် Cluster ဗုံးသီး ၃ လုံး ၊ Rocket ၁၀ လုံး တပြိုင်တည်း ပစ်ခတ် တိုက်ခိုက်ခဲ့ကြောင်း ၊ အလားတူ ဇွန်လ ၁၆ ရက်နေ့ ညပိုင်းတွင်လည်း အကြမ်းဖက် စစ်တပ်က ဂျက်ဖိုက်တာဖြင့် ပေါင် ၅၀၀ ဗုံး ၂ လုံးဖြင့် ဗုံးကျဲ တိုက်ခိုက်ခဲ့ရာ ကမ္မဒေသရှိ စစ်ဘေးရှောင် ပြည်သူများ နေထိုင်သော ဘုန်းကြီးကျောင်းကို ကျရောက် ပေါက်ကွဲခဲ့ကြောင်း သိရှိရသည်။
အဆိုပါ လေကြောင်း တိုက်ခိုက်မှုအတွင်း ပြည်သူ ၂ ဦး သေဆုံးပြီး ကလေးသူငယ်များ အပါအဝင် ပြည်သူ ၁၄ ဦး ပြင်းထန် ဒဏ်ရာရရှိခဲ့ကြောင်း၊ ထို့ပြင် စေတီ ၊ နေအိမ်များလည်း ပျက်စီးခဲ့ကြောင်း သိရသည်။
ထို့ပြင် ကမ္မမြို့ အတွင်းရှိကျေးရွာများကို စစ်ကြောင်းထိုးနေသည့် အကြမ်းဖက် စစ်ကောင်စီ တပ်သားများကလည်း ရွှေလှံရွာ၊ ရိုးဇရပ်ရွာနှင့် ကမ္မချောင်းရွာတို့မှ ပြည်သူ ၁၅ ဦးကျော်ကို ဖမ်းဆီး ခေါ်ဆောင်ထားပြီး ပြည်သူ ၃ ဦးကို ဖမ်ဆီး သတ်ဖြတ်ခဲ့ကြောင်း သိရှိရသည်။
“စစ်ခွေး စစ်ကြောင်းက ကမ္မမြို့ပေါ်မှာ ရှိနေတုန်းပါပဲ အရပ်သားပြည်သူတွေကို ဖမ်းဆီးသတ်ဖြတ်တာတွေ လေ ကြောင်း ဗုံးကျဲတိုက်ခိုက်တာတွေ လုပ်ဆောင်နေတဲ့ အတွက် ပြည်သူတွေ အနေနဲ့ သတိပြု နေထိုင်ကြဖို့ မေတ္တာရပ်ခံချင်ပါတယ်” ဟု ကမ္မဒေသတော်လှန်ရေးတပ်ပေါင်းစုမှ တာဝန်ရှိသူက ပြောဆိုသည်။
ကမ္မမြို့ပေါ်ရောက်ရှိနေသည့် အကြမ်းဖက် စစ်စစ်ကြောင်းက ကမ္မဒေသတွင်း ကျေးရွာများနှင့် စစ်ရှောင်ပြည်သူများကို ပါရာမော်တာ၊ ဒရုန်း၊ Y-12 လေယာဉ် ၊ ဂျက်ဖိုက်တာ တို့ဖြင့် လေကြောင်း တိုက်ခိုက်မှုများ နေ့စဉ် ရက်ဆက် ဗုံးကျဲ တိုက်ခိုက်နေပြီး ပြည်သူပိုင်ပစ္စည်းများကို ဖောက်ထွင်းခိုးယူခြင်း၊ အသက်အန္တရာယ်ခြိမ်း ခြောက်ခြင်း၊ အဖမ်းဆီးခံ ပြည်သူများကို နှိပ်စက် သတ်ဖြတ်ခြင်းများ လုပ်ဆောင်နေကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
