ရန်ကုန်၊ ဩဂုတ် ၁၇
ရှမ်းပြည်နယ်၊ တောင်ကြီးမြို့ အမှတ် ၂ နယ်မြေ ရဲစခန်းမှူး မျိုးကျော်သူက မူးယစ်ဆေးဝါး ရောင်းဝယ်မှုများ အပါအဝင် စခန်းကုန်ကျစရိတ်ဟုဆိုကာ နယ်ထိန်းရဲများကို ၁ လလျှင် ငွေကျပ် သိန်း ၃၀၀ ကျော်ရှာခိုင်းကြောင်း ရဲသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
တောင်ကြီးမြို့ အမှတ် ၂ နယ်မြေ ရဲစခန်းမှူး မျိုးကျော်သူသည် နယ်ထိန်းရဲများကို စခန်းကုန်ကျစရိတ်ဟုဆိုကာ ၁ လလျှင် ငွေကျပ် သိန်း ၃၀၀ ကို နည်းမျိုးစုံဖြင့် ဖိအားပေး ရှာခိုင်းနေပြီး ၎င်းကိုယ်တိုင်လည်း မူးယစ်ဆေးဝါးများ ရောင်းဝယ်မှုများ လုပ်ဆောင်နေခြင်းဖြစ်ကြောင်း သိရသည်။
ထိုသို့ ၎င်းရှာဖွေခိုင်းသော ငွေကျပ် သိန်း ၃၀၀ မပြည့်ပါက နယ်ထိန်းရဲများကို ရိုက်နှက်ပြီး အလုပ်ဖြုတ်မည်ဟု ခြိမ်းခြောက်ပြောဆိုကြောင်း၊ ယင်းသို့လုပ်ဆောင်မှုများကို အထက်သို့ တိုင်ကြားသော်လည်း ငွေကြေး အလုံးအရင်းဖြင့် လိုက်လံ အမှုဖျောက်နေကြောင်း သိရှိရသည်။
ထို့ပြင် မျိုးကျော်သူက ၎င်း၏ ယောက်ဖဖြစ်သူ ကြံ့ဖွတ်ပါတီဝင် ၁ ဦးနှင့် နယ်ထိန်းရဲ ၂ ဦးကိုလည်း ပလီလင်းရွာအကျော်ရှိ ရေသပြေဂိတ်တွင် သစ်ကားများကို စောင့်၍ ပိုက်ဆံ ကောက်ခံခိုင်းပြီး ၁ ရက်ကို အနည်းဆုံး ငွေကျပ် သိန်း ၂၀ ကျော်ရရှိကြောင်း သိရသည်။
စခန်းမှူး မျိုးကျော်သူက လက်ရှိချိန်တွင် ၎င်း၏ မိန်းမဖြစ်သူ ဒေါ်သွယ်သွယ်ဦး အမည်ဖြင့် ပလီလင်းရွာတွင် သိန်း ၂၀၀၀ တန် ခြံများ ဝယ်ယူထားပြီး သိန်း ၃၅၀၀ တန် ကားများလည်း ဝယ်ယူထားကြောင်း၊ ဒေါ်သွယ်သွယ်ဦးကိုလည်း သိန်း ၇၀၀ ကျော်တန် လက်ဝတ် ရတနာများ ဆင်ပေးထားကြောင်း သိရှိရသည်။
“တောင်ကြီး အမှတ် ၂ နယ်မြေရဲစခန်းမှူး မျိုးကျော်သူက အလွန့်အလွန် မတရား စီးပွားရေး သောင်းကျန်းနေပါတယ်၊ မူးယစ်ဆေးဝါးလည်း ရောင်းချတယ်။ တစ်လကို စခန်းကုန်ကျ စရိတ်ဆိုပြီးတော့ သိန်း ၃၀၀ ပြပြီး နယ်ထိန်းတွေကို ဖိအားပေး ရှာခိုင်းပါတယ်။ ပိုက်ဆံမရှာနိုင်ရင် စိုက်နိုင်ရင် နယ်ထိန်းကနေ ဖြုတ်ပစ်မယ်လို့ ခြိမ်းခြောက်ပြောပြီး ရိုက်နှက်ပါတယ်။ သူ့ယောက်ဖ ကြံ့ဖွတ်ပါတီဝင်ကိုလည်း ရေသပြေဂိတ်မှာ သစ်ကားများကိုစောင့်ပြီး ပိုက်ဆံတောင်းခိုင်းပါတယ်။ နယ်ထိန်းခေါင်းဆောင်ကလည်း သူ့ကြိုးဆွဲရာ လုပ်တဲ့ လူကိုပဲ ထားပါတယ်။ သူမတရားလုပ်တာတွေကို အထက်ကို တိုင်လည်း ဘာမှ မထူးဘူး။ အမှုက ပျောက်သွားတယ်” ဟု ရဲသတင်းရင်းမြစ်က ပြောဆိုသည်။
တောင်ကြီးမြို့ အမှတ် ၂ နယ်မြေ ရဲစခန်းတွင်လည်း အချုပ်မှ အကျဉ်းထောင်ကို မပြောင်းရွေ့လိုပါက ငွေကျပ် ၁၀ သိန်းပေးရပြီး ညစ်ပတ်နေသည့် ပုံစံထမင်း၊ ကန်စွန်းရွက်ရေလုံပြတ်နှင့် အသားဟင်းများကိုလည်း ဈေးအဆမတန်တင်၍ ရောင်းချနေကြောင်း သိရသည်။
