ရန်ကုန်၊ ဩဂုတ် ၁၉
အကြမ်းဖက် စစ်သားတွေ၊ ဝန်ထမ်းတွေနဲ့ ပြည်သူတွေအနေနဲ့ ရွေးကောက်ပွဲမှာ ဆန္ဒမဲပေးကြဖို့ မင်းအောင်လှိုင်ကိုယ်တိုင် ကွင်းဆင်း လှုံ့ ဆော်နေရပါတယ်။
မနေ့က မကွေးမြို့မှာ ရောက်ရှိနေတဲ့ မင်းအောင်လှိုင်က မကွေးတပ်နယ်က စစ်သည်၊ အရာရှိတွေနဲ့ တွေ့ဆုံရာမှာ လည်းကောင်း၊ ဝန်ထမ်းတွေ၊ လုပ်ငန်းရှင်တွေနဲ့ မြို့မိမြို့ဖ ဆိုသူတွေနဲ့ တွေ့ဆုံပွဲမှာ လည်းကောင်း လာမယ့် ရွေးကောက်ပွဲမှာ ဆန္ဒမဲပေးကြဖို့ မင်းအောင်လှိုင်က တိုက်တွန်းနေတာလည်းဖြစ်ပါတယ်။
စစ်သားတွေအနေနဲ့ ဒီဇင်ဘာလအတွင်း ကျင်းပပြုလုပ်မယ့် ရွေးကောက်ပွဲမှာ ကိုယ်စားလှယ်လောင်းများရွေးချယ်ချိန် နိုင်ငံအတွက် စေတနာထားပြီး အရည်အချင်းရှိသူများဖြစ်ရန်လိုကြောင်း၊ ရွေးကောက်ပွဲမှာ ဆန္ဒမဲများအား မပျက်မကွက်ပေးပြီး နိုင်ငံသားကောင်းတွေဖြစ်အောင် ဆောင်ရွက်သွားကြစေလိုတယ်လို့ မင်းအောင်လှိုင်က မကွေးတပ်နယ်မှ စစ်သားတွေကို ပြောဆိုပါတယ်။
ဒါ့အပြင် ဝန်ထမ်းတွေနဲ့ ပြည်သူတွေတချို့ကို တွေ့ဆုံရာမှာလည်း မင်းအောင်လှိုင်က ဆန္ဒမဲပေးပိုင်ခွင့်ရှိသူတွေအားလုံး ဆန္ဒမဲများပေးနိုင်ဖို့ စစ်တပ်အနေနဲ့ ဆောင်ရွက်ပေးသွားမှာဖြစ်လို့ မပေးကြဖို့ လိုကြောင်း၊ ဒီမိုကရေစီစနစ်ကို လျှောက်လှမ်းလိုပါက ရွေးကောက်ပွဲမှာ ဆန္ဒမဲပေးကြဖို့ လိုတယ်လို့ မင်းအောင်လှိုင်က ဆိုပါတယ်။
“တပ်နယ်တွေအားလုံးကတော့ မဖြစ်မနေ ဆန္ဒမဲပေးဖို့နဲ့ ရှေ့တန်းတာဝန်ထမ်းဆောင်နေတဲ့ သူတွေအားလုံး ကြိုတင်မဲပေးကြဖို့ အဓိကမှာတယ်။ တပ်နယ်အားလုံးမှာ မဲပေးသူ မရှိ မဖြစ်ရလေအောင် စီမံကြဖို့ မှာကြားတယ်။ ပြီးရင် ရွေးကောက်ပွဲမှာ မဲပေးကြရေး လှုံ့ဆော်မှုတွေမှာလည်း တပ်နယ်တွေအားလုံးက တက်တက်ကြွကြွ ပါဝင်ကြဖို့ ပြောပါတယ်”လို့ မကွေးတပ်နယ်နဲ့ တိုက်ရိုက် ဆက်သွယ်မှုရှိနေတဲ့ နေပြည်တော် စစ်ဘက်သတင်းရင်းမြစ်က ပြောဆိုပါတယ်။
အကြမ်းဖက်စစ်တပ်က လာမယ့် ဒီဇင်ဘာလ ၂၈ ရက်နေ့မှာ ရွေးကောက်ပွဲ အပိုင်း ၁ ပြုလုပ်ပြီး ကျန်ရွေး ကောက်တွေကို အခန်းဆက် အပိုင်းလိုက် ဇန်နဝါရီလထဲမှာ ပြုလုပ်သွားမယ်လို့ ထုတ်ပြန် ကြေညာထားပါတယ်။
