ဧရာဝတီတိုင်း၊ ရေကြည်မြို့နယ်အတွင်း စစ်ကြောင်းထိုးရန် ငြင်းဆန်ခဲ့သော ခလရ-၂၇၁ တပ်ရင်းမှူးကို စစ်တပ်က ပြန်လည် ဖမ်းဆီးလိုက်ကြောင်း အနောက်တောင်တိုင်းစစ်ဌာနချုပ်မှ တပ်တွင်း သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
ဩဂုတ်လအတွင်း ရေကြည်မြို့နယ်၊ စက်စက်ယိုကျေးရွာအနီးတွင် ခလရ ၂၇ စစ်ကြောင်းက စစ်ကြောင်းထိုးခဲ့ကြောင်း၊ ထိုသို့ စစ်ကြောင်းထိုးစဉ် တော်လှန်ရေး တပ်ဖွဲ့များ ကြားဖြတ် တိုက်ခိုက်ခြင်းကြောင့် ခလရ ၂၇ တပ်ရင်းမှူး၊ ဗိုလ်ကြီး ၁ ဦးနှင့် စစ်မှုထမ်း တပ်သားသစ် ၄ ဦး သေဆုံးသွားပြီး စစ်ကြောင်း တစ်ကြောင်းလုံး တပ်ပြန်ဆုတ်ခဲ့ရကြောင်း သိရသည်။
ထိုသို့ ခလရ ၂၇ တပ်ရင်းမှူးနှင့် အရာရှိ၊ စစ်သည်များ သေဆုံးပြီးနောက် အနောက်တောင်တိုင်းစစ်ဌာနချုပ်မှ ဒုတိုင်းမှူး ရဲလင်းအောင်က ရေကြည်မြို့တွင် နယ်မြေရှင်းလင်းရန် ပုသိမ်အခြေစိုက် ခလရ ၂၇၁ တပ်ရင်းမှူးကို ထပ်မံ အမိန့်ပေးခဲ့ကြောင်း၊ သို့ရာတွင် ခလရ ၂၇၁ တပ်ရင်းမှူးက အောက်ခြေရဲဘော်များ စစ်ပန်းနေသည်ဟုဆိုကာ ရှေ့တန်းထွက်ရန် ငြင်းဆန်ခဲ့ကြောင်း သိရှိရသည်။
ခလရ ၂၇၁ တပ်ရင်းမှူးက ရှေ့တန်း ထွက်ရန် ငြင်းဆန်သဖြင့် အမိန့်မနာခံဟုဆိုကာ ဗျူဟာမှူး ဗိုလ်မှူးကြီး လွင်ထူးမောင်နှင့် ဗိုလ်မှူးကြီး ဇေယျာမောင်တို့က ဆဲဆို ကြိမ်းမောင်းခဲ့ကြောင်း၊ ထိုသို့ ဆဲဆိုကြိမ်းမောင်း၍ ခလရ ၂၇၁ တပ်ရင်းမှူးက ပြန်လည် တုံ့ပြန် ရန်ဖြစ်ခဲ့ကြောင်း သိရှိရသည်။
ယင်းနောက် စစ်တပ်က ခလရ ၂၇၁ တပ်ရင်းမှူးကို အနောက်တောင်တိုင်းစစ်ဌာနချုပ် ဒုတိုင်းမှူး ရဲလင်းအောင် ကိုယ်တိုင် ဖမ်းဆီးပြီး အမတ-၃၄၄ (ရေကြည်) တပ်တွင် ဖမ်းဆီးထိန်းသိမ်းနေကြောင်း၊ လစ်လပ်သွားသော ခလရ ၂၇၁ တပ်ရင်းမှူး နေရာတွင် ခလရ-၂၇၁ ဒုတပ်ရင်းမှူး ကျော်ဝင်းထွဋ်ကို အစားထိုး ခန့်အပ် လိုက်ကြောင်း သိရှိရသည်။
“ဗျူဟာမှူး လွင်ထူးမောင်နဲ့ ဇေယျာမောင်တို့က ထိုးစစ်ဆင်ဖို့ အတင်း ဖိအားပေး စေလွှတ်တော့ ခလရ ၂၇၁ တပ်ရင်းမှူးက သူ့ရဲ့ဘော်တွေ စစ်ပန်းနေပြီဆိုပြီး သွားဖို့ ငြင်းတာကနေ အပြန်အလှန် စကားများ ရန်ဖြစ်ပြီး အတင်းလွှတ်တာ အဲတာကို တပ်ရင်းမှူးက တပ်ရင်းတစ်ခုလုံး အလင်းဝင်ဖို့ စည်းရုံးတယ်ဆိုပြီး အမတ ၃၄၄ မှာ ဖမ်းထားတယ်လို့ သိရတယ်။ တကယ်စည်းရုံးတာလား။ ဗျူဟာမှူး ၂ ကောင် အကွက်ဆင်ပြီး ဖမ်းခိုင်းတာလားဆိုတာတော့ မသိဘူး” ဟု အနောက်တောင်တိုင်းစစ်ဌာနချုပ်မှ တပ်တွင်း သတင်းရင်းမြစ်က ပြောဆိုသည်။
