မွန်ပြည်နယ်၊ ရေးမြို့နယ် ခမရ ၅၉၁ တပ်ရင်းမှ ကင်းလှည့်ရန် ထွက်လာသော စစ်သားများကို တိုက်ခိုက်ရာ စစ်တပ်ဘက်မှ ၅ ဦးသေဆုံးခဲ့ကြောင်း ရေးဘီလူး တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
ဩဂုတ်လ ၂၈ ရက်နေ့ မွန်းလွဲ ၁၂ နာရီခန့်တွင် ခမရ ၅၉၁ တပ်ရင်း ထွက်လာသော စစ်သားများသည် ကျောင်းရွာ လမ်းပိုင်းကို ကင်းလှည့်ရန် ထွက်လာစဉ် ရေးဘီလူး အဖွဲ့က ကြားဖြတ် တိုက်ခိုက်ခဲ့ခြင်းဖြစ်ကြောင်း သိရသည်။
ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ၅ ဦးသေဆုံးပြီး လက်နက်ကြီးများဖြင့် ပြန်လည် ပစ်ခတ် တိုက်ခိုက်ခဲ့သော်လည်း တော်လှန်ရေး တပ်ဖွဲ့များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။
“စစ်ခွေးတွေက ၅၉၁ တပ်ရင်းနဲ့ မနီးမဝေး နေရာလောက်မှာ စစ်ဆေးရေး ပြုလုပ်တဲ့အချိန် တပ်ရင်းအနောက်ပေါက်ကနေ ထွက်လာခဲ့တဲ့ စစ်ကြောင်းနဲ့ ဆုတ်လမ်းမှာ တိုက်ပွဲအနည်းငယ်ဖြစ်ပွားခဲ့တယ်။ ရန်သူဘက်ကတော့ သေဆုံးမှုရှိတယ်လို့ ကျွန်တော်တို့ သိရတယ်။ ဒေသခံတွေကတော့ ၇ ယောက်သေတယ်လို့ ပြောတယ်။ သူတို့က စစ်ကြောင်း ပုံစံမျိုးမဟုတ်ဘူး တပ်ရင်းကာကင်း၊ သူတို့က ရွာလုံခြုံရေး ပုံစံမျိုး နေတဲ့ကောင်တွေ သီးသန့်ရှိတယ်။ တပ်ရင်း အပြင်မှာပေါ့။ သူတို့ အင်အားမများဘူး။ အလွန်ဆုံး ၁၅ ယောက်လောက်ပဲ ရှိတယ်။ သူတို့ဘက်ခြမ်းက ကာဗာမရှိနေဘူး ကျနော်တို့က ဖြတ်ပိတ်တဲ့အချိန်မှာ ကိုယ့်ဘက်ခြမ်း အရင်ဦးပြီး စစ်ခွေး ၅ ကောင်လောက် သေတယ်။ လက်နက်ကြီးတွေကတော့ တောက်လျှောက်ကို ရမ်းပစ်တယ်” ဟု ရေးဘီလူး တပ်ရင်းမှ တာဝန်ရှိသူတစ်ဦးကပြောဆိုသည်။
