ရန်ကုန်၊ ဇွန် ၂၇
တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ ကဒက်ကြီးကျေးရွာနှင့် ဂေါ့အင်းကျေးရွာရှိ အပြစ်မဲ့ သက်ကြီးရွယ်အိုသုံးဦးကို ယမန်နေ့ ဇွန်လ ၂၆ ရက် ညပိုင်းတွင် အကြမ်းဖက်စစ်တပ်က လက်ပြန်ကြိုးတုပ် ပစ်ခတ်သတ်ဖြတ်ပြီး နေအိမ်အတွင်း ဝင်ရောက်ကာ တန်ဖိုးကြီးပစ္စည်းများကို ခိုးယူသွားကြောင်း ဒီမိုကရေစီအရေး လှုပ်ရှားမှုသပိတ်ကော်မတီ (ထားဝယ်ခရိုင်) ထံမှ သိရှိရသည်။
ဇွန်လ ၂၆ ရက် ည ၁၁ နာရီခွဲခန့်တွင် အကြမ်းဖက်စစ်ကောင်စီတပ်ဖွဲ့ဝင် ၁၅ ဦးခန့်သည် ကဒက်ကြီးကျေးရွာရှိ အများပြည်သူပိုင် နေအိမ် ၅ လုံးကို ဝင်ရောက်ဖျက်ဆီးခဲ့ပြီး အသက် ၆၀ ကျော်အရွယ်ရှိ ဦးသောင်းဝင်းနှင့် ဒေါ်ဝင်းအေးတို့ကို လက်ပြန်ကြိုးတုပ်ကာ ဦးခေါင်း၊ ဝမ်းဗိုက်များကို အနီးကပ် ပစ်ခတ်သတ်ဖြတ်သွားကြောင်း သိရှိရသည်။
အကြမ်းဖက်စစ်ကောင်စီတပ်သားများသည် နေအိမ်များကို ဝင်ရောက်စီးနင်းရာတွင် နေအိမ်ရှိ ပစ္စည်းအချို့ကို ဖျက်ဆီးခဲ့သည့်အပြင် တန်ဖိုးကြီးပစ္စည်းအချို့နှင့် ပိုက်ဆံအချို့ကိုလည်း မတရားယူဆောင်သွားခဲ့သည်ဟု DMSC -Dawei က သတင်းထုတ်ပြန်သည်။
အလားတူ ဂေါ့အင်းကျေးရွာနေ အသက် ၅၀ ကျော်အရွယ်ရှိ ဦးဆန်းဝင်းကိုလည်း ၎င်း၏နေအိမ်အရှေ့တွင် အနီးကပ် ပစ်ခတ်ပြီး နေအိမ်တွင်းရှိ ပိုက်ဆံ၊ ရွှေထည့်အချို့နှင့် ဆိုင်ကယ် ၁ စီးကို ပါ ခိုးယူသွားကြောင်း သိရှိရသည်။
အဆိုပါ ပစ်ခတ်သတ်ဖြတ်မှုများကို လောင်းလုံးမြို့ အခြေစိုက် အကြမ်းဖက်စစ်ကောင်စီလက်အောက်ခံ စစ်ဘက်ရေးရာလုံခြုံရေးတပ်ဖွဲ့ဝင်များ(စရဖ)၊ စစ်ကောင်စီတပ်ဖွဲ့ဝင်များနှင့် ပန္ဒလဲကျေးရွာတွင် စခန်းချထားသည့် ပျူစောထီးအဖွဲ့ဝင်များ ပူးပေါင်းလုပ်ဆောင်ခဲ့ခြင်းဖြစ်ကြောင်းနှင့် ၁၀ ရက်အတွင်း စစ်ကောင်စီတပ်ဖွဲ့ဝင်များက အပြစ်မဲ့ပြည်သူ ၆ ဦးကို ပစ်ခတ်သတ်ဖြတ်ထားကြောင်း ဒီမိုကရေစီအရေး လှုပ်ရှားမှုသပိတ်ကော်မတီ (ထားဝယ်ခရိုင်) က ထုတ်ပြန်ထားသည်။
Photo – DMSC – Dawei
