မင်းအောင်လှိုင် တက်ရောက်ခဲ့သည့် မန္တလေးတက္ကသိုလ် နှစ် ၁၀၀ ပြည့်ပွဲသို့ ဖုန်းမယူရ၊ အိတ်မသယ်ရ၊ ထီးမယူရ၊ ဦးထုပ်မဆောင်းရ၊ ဆိုင်ကယ်နှင့်ကားများ မဝင်ရ၊ မရပ်ရ ဆိုသော တားမြစ်မှုများ အပါအဝင် လုံခြုံရေး အထူးတင်းကျပ်ခဲ့

ရန်ကုန်၊ အောက်တိုဘာ ၄

အကြမ်းဖက် စစ်ခေါင်းဆောင် မင်းအောင်လှိုင် ယနေ့ နံနက်ပိုင်း တက်ရောက်ခဲ့သည့် မန္တလေး တက္ကသိုလ် နှစ် ၁၀၀ ပြည့်ပွဲတွင် တက်ရောက်လာသော ကျောင်းသားကျောင်းသူများ၊ ဆရာ၊ ဆရာမများနှင့် မြို့ခံတချို့ကို စစ်တပ်က လုံခြုံရေး အထူးတင်းကျပ်စွာ စစ်ဆေးမှုများ လုပ်ဆောင်ခဲ့ကြောင်း ပွဲတက်ရောက်ခဲ့သော ဆရာ၊ ဆရာမအသိုင်းအ၀ိုင်းက ပြောဆိုသည်။

ယနေ့ အောက်တိုဘာ ၄ ရက်နေ့ နံနက်ပိုင်း မင်းအောင်လှိုင် တက်ရောက်မည့် မန္တလေးတက္ကသိုလ် ရာပြည့်အခမ်းအနားအတွက် ကျောင်းသားကျောင်းသူများနှင့် ဆရာ၊ ဆရာမများ၊ မြို့ခံများကို မင်းအောင်လှိုင် မလာရောက်မီ ၃ နာရီခန့်ကြိုတင်ခေါ်ယူခဲ့ပြီး လုံခြုံရေး စစ်ဆေးမှုများကို အထူး လုပ်ဆောင်ခဲ့ကြောင်း သိရှိရသည်။

“အစောကြီးကြိုလာရတာ။ မနက် ၅ နာရီလောက်ကတည်းက လူစု။ ပြီးတော့ မနက် ၆ ခွဲ လောက်မှာ လုံခြုံရေးစစ်ဆေးမှုတွေ ဝင်ရတယ်။ မနက် ၈ နာရီလောက်အထိ လုံခြုံရေး စစ်ဆေးမှုတွေက မပြီးဘူး။ စည်းကမ်းတွေကတော့ များတယ်။ ဖုန်းတွေ မယူရဘူး။ မီဒီယာတွေတော့ ခြွင်းချက်ပေါ့။ ဖုန်း၊ ကွန်ပျူတာ အီလက်ထရောနစ်ပစ္စည်းတွေ ပေးမသယ်ဘူး။ လက်ကိုင်အိတ် ကျောပိုးအိတ်၊ လက်ဆွဲအိတ် ဘာအိတ်မှ ပေးမသယ်ခိုင်းဘူး။ ထီးမယူရဘူး။ ထီးမဆောင်းရဘူး။ ဦးထုပ်မဆောင်းရဘူး”ဟု မန္တလေးတက္ကသိုလ်မှ နည်းပြ ဆရာမတစ်ဦးက ဆိုသည်။

ထို့ပြင် မင်းအောင်လှိုင်လာရောက်မည်ဖြစ်၍ မန္တလေးတက္ကသိုလ်ရာပြည့်အခမ်းအနားသို့ လာရောက်သည့် ကားနှင့် ဆိုင်ကယ်များကို အခမ်းအနားနှင့် အနီးဆုံးနေရာအထိ ယူဆောင်ခွင့်ပြုဘဲ သတ်မှတ်ထားသော အလွန်ဝေးသည့် နေရာသို့ သွားရောက် ပါကင်ထိုးရပ်နားခိုင်းကြောင်း သိရှိရသည်။

“ကားဗုံး၊ ဆိုင်ကယ်ဗုံးထောင်မှာစိုးလို့ထင်တယ်။ အခမ်းအနားလုပ်တဲ့ နေရာနဲ့ အဝေးဆုံးမှာ သွားရပ်ခိုင်းတာ။ တချို့ နေရာတွေကို ကားရော ဆိုင်ကယ် လုံး ၀ အဝင်မခံဘဲ ပိတ်ထားတာ” ဟု ပွဲသို့ သွားရောက်ခဲ့သည့် ဌာနဆိုင်ရာတစ်ဦးက ရှင်းပြသည်။

မင်းအောင်လှိုင်က လာရောက်ချိန် ဒရုန်းဖြင့် ဗုံးကျဲခံရမည်ကို စိုးရိမ်၍ ဒရုန်း Jammer များ တင်ဆောင် ထားသော ကားကြီးများက မန္တလေးတက္ကသိုလ် ပတ်ဝန်းကျင်တွင် လှည့်ပတ် ကင်းလှည့်ခဲ့ကြောင်း၊ တက္ကသိုလ်နှင့်အနီးဆုံးတွင် ရှိနေသည့် လမ်းဆုံလမ်းခွများတွင်လည်း စစ်တပ်က ဒရုန်း Guards များကို ချထားခဲ့ကြောင်း သိရှိရသည်။

ထိုသို့ လုံခြုံရေး တင်းကျပ်ခဲ့သော်လည်း ယနေ့ အောက်တိုဘာလ ၄ ရက်နေ့ နံနက် ၆ နာရီ ၁၅ မိနစ် အချိန် မန္တလေးမြို့ ၊ နန်းတွင်းရှိ အလယ်ပိုင်းတိုင်းစစ်ဌာနချုပ် (လပခ)သို့ ရှော့တိုက်ဒုံး ၂ လုံးဖြင့် ပစ်ခတ်တိုက်ခိုက်ခဲ့ကြောင်း၊ အဆိုပါ မစ်ရှင်ကို Brave Warriors for Myanmar (BWM) အဖွဲ့၏ ဦး ဆောင် စီမံမှုဖြင့် No More Dictatorship (NMD-PDF) အဖွဲ့၊ People Servant Force ( P.S.F ) နှင့် ရတနာပုံတပ်ဦးအဖွဲ့တို့က လုပ်ဆောင်ခဲ့ကြောင်း သိရှိရသည်။