ရန်ကုန်၊ နိုဝင်ဘာ ၈
တနင်္သာရီတိုင်း၊ လောင်းလုံးမြို့နယ်တွင် အကြမ်းဖက် စစ်တပ်က ပြုလုပ်မည့် အတုယောင် ရွေးကောက်ပွဲကို လက်မခံကြောင်း ပြသသည့်အနေဖြင့် ကြံ့ဖွတ်ပါတီရုံးကို ဖောက်ခွဲ တိုက်ခိုက်ခဲ့ကြောင်း လောင်းလုံး သံမဏိလိပ်ပြာတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၈ ရက်နေ့ နံနက် ၅ နာရီ ၃၀ မိနစ်ခန့်တွင် လောင်းလုံးမြို့ပေါ်ရှိ ကြံ့ဖွတ်ပါတီရုံးကို လောင်းလုံး သံမဏိလိပ်ပြာတပ်ဖွဲ့က ဖောက်ခွဲ တိုက်ခိုက်ခဲ့ခြင်းဖြစ်ကြောင်း သိရသည်။
ထိုသို့ ဖောက်ခွဲ တိုက်ခိုက်ခြင်းသည် အကြမ်းဖက် စစ်တပ်၏ အတုယောင် ရွေးကောက်ပွဲကို လက်မခံသောကြောင့် ဆန့်ကျင်သောအားဖြင့် ကြံ့ဖွတ်ပါတီရုံးကို ဖောက်ခွဲ တိုက်ခိုက်ခဲ့ခြင်းဖြစ်ကြောင်း၊ ထိုဖောက်ခွဲ တိုက်ခိုက်မှုအတွင်း ထိခိုက်သူမရှိဘဲ ကြံ့ဖွတ်ရုံးမီးလောင် ပြာကျခဲ့ကြောင်း သိရှိရသည်။
ပြည်သူများအနေဖြင့်လည်း အကြမ်းဖက် စစ်တပ်၏ အတုယောင်ရွေးကောက်ပွဲကို ပူးပေါင်းဆောင်ရွက်ခြင်းများမပြုလုပ်ရန်နှင့် စည်းရုံးနှိုးဆော်ပေးခြင်း၊ ကိုယ်တိုင်ပူးပေါင်းပါဝင်ခြင်း၊ ပြည်သူများကို အတင်းအကြပ် ဖိအားပေး ပါဝင်စေခြင်းများ မပြုလုပ်ကြရန် လောင်းလုံး သံမဏိလိပ်ပြာတပ်ဖွဲ့က အသိပေး ပြောဆိုထားသည်။
“ကျနော်တို့ ဒီနေ့ နံနက် အစောပိုင်းမှာ လောင်းလုံးမြို့ ကြံ့ဖွတ် ပါတီရုံးကို ဖောက်ခွဲ တိုက်ခိုက်ခဲ့တာပေါ့။ အကြမ်းဖက် စစ်ကော်မရှင်ရဲ့ အတုယောင် ရွေးကောက်ပွဲကို လက်မခံတာကြောင့် ဆန့်ကျင်တဲ့ အနေနဲ့ မိုင်းခွဲတိုက်ခိုက်ခဲ့တာပါ။ ပြည်သူတွေအနေနဲ့လည်း အကြမ်းဖက် စစ်ကော်မရှင်ရဲ့ အတုယောင်ရွေးကောက်ပွဲကို ပူးပေါင်း ဆောင်ရွက်ခြင်း မပြုလုပ်ကြဖို့နဲ့ စည်းရုံးနှိုးဆော်ပေးတာ ကိုယ်တိုင် ပူးပေါင်းပါဝင်တာ ပြည်သူတွေကို အတင်းအကြပ် ဖိအားပေးတာတွေ မပြုဖို့ အသိပေး ပြောဆိုချင်တယ်” ဟု လောင်းလုံး သံမဏိလိပ်ပြာတပ်ဖွဲ့မှ တာဝန်ရှိသူက ပြောဆိုသည်။
လောင်းလုံး သံမဏိလိပ်ပြာတပ်ဖွဲ့အနေဖြင့် ပြည်သူဆန္ဒမပါသော အတုယောင် ရွေးကောက်ပွဲကို လက်မခံသောကြောင့် နေရာဒေသမရွေး ဆန့်ကျင်သွားမည်ဖြစ်ကြောင်း သတိပေး ထုတ်ပြန်ထားသည်။
