ထိုင်ဝမ်ကို တရုတ်က တိုက်ခိုက်လျှင် ထိုင်ဝမ်ဘက်မှ စစ်ရေးအရ ပါဝင်မည်ဆိုသော ဂျပန်ဝန်ကြီးချုပ်၏ ပြောဆိုချက် စကားအပေါ် မြန်မာအကြမ်းဖက်စစ် တပ်က မထောက်ခံဘဲ တရုတ်နိုင်ငံဘက်မှ ရပ်တည်ကြောင်း အကြမ်းဖက် စစ် တပ်၏ ပြောရေးဆိုခွင့်ရှိသူ အကြမ်းဖက် ဇော်မင်းထွန်းက သတင်းထုတ်ပြန် ပြောဆိုသည်။
နိုဝင်ဘာလ ၇ ရက်နေ့ ဂျပန်ဝန်ကြီးချုပ် တာ့ကာအိချိ (Takaichi) က တရုတ်က ထိုင်ဝမ်ကို တိုက်ခိုက်ပါက ဂျပန်၏ ရှင်သန်မှုကို ခြိမ်းခြောက်သည့် အခြေ အနေ” အဖြစ် သတ်မှတ်နိုင်ကြောင်း ဂျပန်ပါလီမန်တွင် ပြောကြားခဲ့သည်။
ဂျပန်ဝန်ကြီးချုပ်၏ ပြောကြားချက်မှာ ဂျပန်၏ လုံခြုံရေးဆိုင်ရာ ဥပဒေမူဘောင်အရ ထိုင်ဝမ်အရေးကို ဂျပန်နိုင်ငံ၏ ပြည်တွင်းလုံခြုံရေးနှင့် တိုက်ရိုက်ဆက်စပ်သည်ဟု သတ်မှတ်လိုက်ခြင်းဖြစ်ပြီး ဂျပန်အနေဖြင့် ထိုင်ဝမ်အရေးတွင် စစ်ရေးအရ ပါဝင်ပတ်သက်နိုင်သည့် လမ်းကြောင်းကို ဖွင့်ပေးလိုက်ခြင်း ဖြစ်ကြောင်း ဂျပန်မှ လာသော သတင်းများအရ သိရှိရသည်။
မြန်မာအကြမ်းဖက်စစ်တပ်ကမူ ဂျပန်ဝန်ကြီးချုပ်သစ်၏ ထိုင်ဝမ်အရေး အပေါ် ပြော ဆိုချက်ကို မထောက်ခံဘဲ တရုတ်တစ်နိုင်ငံတည်းမူဝါဒအရ တရုတ်နိုင်ငံဘက်မှ ရပ်တည်ကြောင်း အကြမ်းဖက် ဇော်မင်းထွန်းက ထုတ်ဖော်ပြောဆိုသည်။
“ဂျပန်ဝန်ကြီးချုပ်အသစ်ရဲ့ ထိုင်ဝမ်အရေးနဲ့ပတ်သက်ပြီးပြောကြားချက်များကို ကျွန်တော်တို့အနေနဲ့ နိုင်ငံတကာမီဒီယာတွေမှာ တွေ့လိုက်ရပါတယ်။ ဒီကိစ္စနဲ့ ပတ်သက်လို့ မြန်မာနိုင်ငံရဲ့ သဘောထားရပ်တည်ချက်ကတော့ နံပါတ်တစ်မြန် မာနိုင်ငံအစိုးရဟာ တရုတ်နိုင်ငံရဲ့ တရုတ်တစ်နိုင်ငံတည်း မူဝါဒ (One China Policy) ကို ခိုင်မာစွာ ထောက်ခံရပ်တည်လျက်ရှိပါတယ်။ တရုတ်တစ်နိုင်ငံတည်း မူဝါဒ (One China Policy) အပေါ် မြန်မာနိုင်ငံက ခိုင်မာစွာထောက်ခံရပ်တည်လျက်ရှိကြောင်း” အကြမ်းဖက် ဇော်မင်းထွန်းက ပြောဆိုသည်။
အကြမ်းဖက် ဇော်မင်းထွန်းက တရုတ်နိုင်ငံနှင့် အိမ်နီးချင်းမိတ်ဆွေကောင်းအဖြစ် မြန်မာနိုင်ငံက တည်ဆောက်နေကြောင်း ဆက်လက် ထုတ်ဖော်ပြောဆိုသည်။
“တရုတ်-မြန်မာနှစ်နိုင်ငံဟာ အိမ်နီးချင်းမိတ်ဆွေကောင်းနိုင်ငံများဖြစ်ပြီး မဟာ ဗျူဟာမိတ်ဖက်နိုင်ငံများနဲ့ အေးအတူပူအမျှအသိုက်အဝန်းကို တည်ဆောက်နေတဲ့နိုင်ငံများဖြစ်ပါတယ်။ ဒီအချက်အပေါ်မှာ မြန်မာနိုင်ငံက အထူးအလေး ထားတန်ဖိုးထားပါတယ်။ ငြိမ်းချမ်းစွာအတူယှဉ်တွဲနေထိုင်ရေးမူကြီး ၅ ချက်ရဲ့ ပထမအချက်ပါအတိုင်း တရုတ်နိုင်ငံရဲ့ နယ်မြေတည်တံ့ခိုင်မြဲမှုနဲ့ အချုပ် အခြာအာဏာပိုင်ဆိုင်မှုအပေါ်မှာ မြန်မာကလေးစားပြီး ၎င်းအချက်အပေါ်မှာ ကာ ကွယ်ခြင်းကို မြန်မာက အစဉ်အမြဲထောက်ခံရပ်တည်လျက်ရှိပါကြောင်း” အကြမ်းဖက် ဇော်မင်းထွန်းက ဆိုသည်။
ဂျပန်ဝန်ကြီးချုပ်၏ ထိုင်ဝမ်အရေး မှတ်ချက်စကားကြောင့် တရုတ်နှင့်ဂျပန်အကြား တင်းမာမှုမှာ အရှိန်မြင့်တက်နေပြီး ကုန်သွယ်ရေး၊ ခရီးသွားလာရေး၊စီးပွားရေးနှင့် နိုင်ငံရေးကဏ္ဍများတွင် ဆက်ဆံရေးဖြတ်တောက်မှုများစွာဖြင့် နှစ်ဖက် အတင်းမာဆုံးအခြေအနေသို့ ဆိုက်ရောက်လျက်ရှိသည်။
