မကွေးတိုင်း၊ စလင်းမြို့ပေါ်တွင် အဝေးသင် တက္ကသိုလ် ကျောင်းသား၊ ကျောင်းသူများကို အကြမ်းဖက် စစ်တပ်က ကြိုတင်မဲများ ပေးခိုင်းနေပြီး မဲမပေးသူများကို ကျောင်းဆက်တက်ခွင့်ပြုမည်မဟုတ်ဟု ခြိမ်းခြောက်နေကြောင်း ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ရန်ကုန်ခေတ်သစ်သတင်းဌာနထံသို့ပြောဆိုသည်။
နိုဝင်ဘာလ ၂၀ ရက်နေ့တွင် စလင်းမြို့ အထွေထွေအုပ်ချုပ်ရေးရုံးအတွင်း၌ ကျောင်း ဆရာ/ဆရာမများ ၊ မဲကော်မတီအဖွဲ့ဝင်များ အုပ်ချုပ်ရေးမှူးများ၊ အကြမ်းဖက် စစ်သားများနှင့် ပျူစောထီးများက စလင်းမြို့ပေါ်ရှိ ကျောင်းကြားရပ်ကွက်နှင့် မြင်တင်ရပ်ကွက်ရှိ ပြည်သူများ နှင့် အဝေးသင် တက္ကသိုလ် တက်ရောက်နေသည့် ကျောင်းသား၊ ကျောင်းသူများထံမှ ကြိုတင်မဲများ ကောက်ယူခဲ့ခြင်းဖြစ်ကြောင်း သိရသည်။
ထိုသို့ ကောက်ယူရာတွင် မကွေးနှင့် ရေနံချောင်းတို့၌ အဝေးသင် တက္ကသိုလ်တက်ရောက်နေသော ကျောင်းသား၊ ကျောင်းသူများသည် မဲပေးခြင်းမရှိသောကြောင့် မဲမပေးသူများကို ကျောင်းဆက်တက်ခွင့်မပြုကြောင်း ခြိမ်းခြောက်၍ ကြိုတင်မဲများ ကောက်ယူသွားခြင်းဖြစ်ကြောင်း သိရှိရသည်။
“နိုဝင်ဘာ ၂၀ ရက်နေ့က စလင်းမြို့ အထွေထွေအုပ်ချုပ်ရေးရုံးအတွင်းမှာ ကျောင်းဆရာ/ဆရာမတွေ မဲကော်မတီအဖွဲ့ဝင်တွေ အုပ်ချုပ်ရေးမှူးတွေ ရဲခွေး၊ စစ်ခွေး နဲ့ ပျူခွေးများ အင်အား ၅၀လောက်နဲ့ ပထမအကြိမ် ကြိုတက်မဲကောက်တယ်။ စလင်းမြို့နယ်မှာရှိတဲ့ အဝေးသင် တက္ကသိုလ်တက်နေတဲ့ ကျောင်းသားကျောင်းသူတွေကို ပြန်လွှတ်ပြီး မဲပေးခိုင်းတာ မဲလာမပေးတဲ့ သူတွေများလို့ မဲမပေးရင် ကျောင်းဆက် တက်ခွင့်မပြုတော့ဘူးလို့ ပြောပြီး မဲကော်မတီ အဖွဲ့ဝင်တွေနဲ့ အုပ်ချုပ်ရေးမှူးတွေက ခြိမ်းခြောက် ကောက်ယူသွားတယ်” ဟု ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ပြောဆိုသည်။
ထိုသို့ ခြိမ်းခြောက် ခေါ်ယူခဲ့ခြင်းကြောင့် အဝေးသင် တက္ကသိုလ် တက်ရောက်နေသော ကျောင်းသား၊ကျောင်းသူများနှင့် ပြည်သူ ၁၀၀ ခန့်က လာရောက် မဲပေးသွားကြောင်း သိရသည်။
ထို့ပြင် အကြမ်းဖက် စစ်တပ်က စလင်းမြို့ ထီးကြီးဘုရားထဲတွင်လည်း ဆိုင်းဘုတ်ထောင်ပြီး အိမ်ထောင်စုစာရင်းရှိသူတိုင်း မဲထည့်ရန်နှင့် မဲပေးခြင်းမရှိသူများကို ထောင်ဒဏ်ချမှတ်သွားမည်ဖြစ်ကြောင်း ခြိမ်းခြောက်ထားကြောင်း သိရှိရသည်။
အကြမ်းဖက်စစ်တပ်၏ သတင်းထုတ်ပြန်ချက်အရ မြန်မာနိုင်ငံတစ်ဝန်း တက္ကသိုလ်၊ ဒီဂရီကောလိပ်၊ ကောလိပ်များ၌ တက်ရောက်မည့် ကျောင်းသား ကျောင်းသူများ ကြိုတင်ဆန္ဒမဲပေးရာတွင် သတ်မှတ်ကာလအတွင်း မဲပေးသူ စုစုပေါင်း ၂၈၃၃၉ ဦးရှိကြောင်း သိရှိရသည်။
ဓာတ်ပုံ- စစ်တပ်၏ ဖိအားကြောင့် ကြိုတင်မဲပေးနေရသည့် တက္ကသိုလ်ကျောင်းသားကျောင်းသူများ။
