ရန်ကုန်၊ နိုဝင်ဘာ ၂၃
အကြမ်းဖက်စစ်တပ်၏ အတုအယောင် ရွေးကောက်ပွဲကို ဆန့်ကျင်သည့်အနေဖြင့် အနည်းဆုံးပြည်နယ် ၁၂ ခုမှ အမေရိကန်ရောက် မြန်မာနိုင်ငံသား ၂၀၀ ဦးကျော်က အမေရိကန်သမ္မတ အိမ်ဖြူတော်နှင့် တရုတ်သံရုံးတို့တွင် အလုံး အရင်း ဖြင့် ချီတက် ဆန္ဒပြကြကြောင်း သိရှိရသည်။
ယနေ့ အမေရိကန်စံတော်ချိန် နိုဝင်ဘာလ ၂၂ ရက်နေ့ မွန်းလွဲပိုင်း (မြန်မာစံတော်ချိန် နိုဝင်ဘာလ ၂၃ ရက်နေ့ နံနက်အစောပိုင်း) အမေရိကန်ပြည်ထောင်စုတွင် ရောက်ရှိနေကြသော မြန်မာနိုင်ငံသားများက တရုတ်သံရုံးရှေ့တွင် ဦးစွာ ဆန္ဒပြ ကြွေးကြော်ကြသည်။
ယင်းနောက် အမေရိကန်သမ္မတ အိမ်ဖြူတော်ရှေ့သို့ သွားရောက် ဆန္ဒပြကြပြီး မြန်မာ့အရေးတွင် တရုတ်နိုင်ငံက ဝင်ရောက်စွက်ဖက်နေမှုကို ဆန့်ကျင်ခြင်း၊ စစ်တပ်၏ အတုအယောင်ရွေးကောက်ပွဲကို ဆန့်ကျင်ရေး၊ သမ္မတ ဦးဝင်းမြင့်နှင့် ဒေါ်အောင်ဆန်းစုကြည် အပါအဝင် နိုင်ငံရေး အကျဉ်းသားများ လွတ်မြောက်ရေးတို့အတွက် ကြွေးကြော်သံများ ဟစ်ကြွေး ဆန္ဒပြခဲ့ကြသည်။
ဓာတ်ပုံ- ကျော်စိုးလတ်။
