မြန်မာနိုင်ငံတွင် လူမိုက်များနှင့် ပေါင်း၍ ငွေကျပ် သိန်းရာထောင်ချီရယူ မိုက်ကြေးခွဲ အကြွေးတောင်း အလုပ်လုပ်ကိုင်နေသော အဆိုတော်ယုန်လေးက ဒါရိုက်တာအဖြစ် သိန်း ၆၀၀၀ ကျော် အကုန်ကျခံရိုက်ထားသော “မြို့ပြထဲက လမ်းမ” ရုပ်ရှင် လူမကြည့်၍ အနုပညာလောကမှ အနားယူရန် များနေပြီဖြစ်ကြောင်း ယမန်နေ့ လူမှုကွန်ရက်မှတစ်ဆင့် အသိပေးထုတ်ပြန်သည်။
အဆိုတော်ယုန်လေးက ဒါရိုက်တာအဖြစ် “မြို့ပြထဲက လမ်းမ” ရုပ်ရှင်ကို ၁ နှစ်ခွဲကြာရိုက်ကူးခဲ့ကြောင်း၊ အဆိုပါရုပ်ရှင်ဇတ်ကားအတွက် ငွေကျပ် သိန်း ၆၀၀၀ အကုန်ကျခံ ရိုက်ကူးခဲ့ကြောင်း၊ သို့ရာတွင် ယနေ့ စတင်ရုံတင်သည့်အချိန်တွင် ကြည့်ရှုသူ ၁ ဦးမှမရှိ၍ ရုံပိတ်လိုက်ရပြီး တစ်နှစ်လုံးအတွက် ဝင်ငွေအနည်းဆုံး ဇတ်ကားအဖြစ် စံချိန်တင်သွားကြောင်း ထုတ်ဖော်ပြောဆိုသည်။
“မုန်းတဲ့ သူတွေ တိုက်ခိုက်တဲ့ သူတွေ နိုင်ပါတယ်။ အနုပညာလောက က အနားယူဖို့များသွားပါပြီ။ အခုတင်တဲ့ မြို့ပြထဲက လမ်းမ ဆိုတဲ့
ဇာတ်ကား အများကြီး ကြိုးစားထားပါတယ် ။ သိန်း ၆၀၀၀ ကျော်ကုန်ပါတယ် ။ ပြင်ဆင်လိုက်ရိုက်ကူးအချိန် ၁ နှစ်ခွဲကြာပါတယ်။ ဒီနေ့ စတင်တယ် ။ ကြည့်ပြီးတဲ့ သူတွေတော့ Quality သိပါတယ် ။ ဒီနှစ်တစ်နှစ်လုံး မှာ ဝင်ငွေ အနည်းဆုံးဇာတ်ကား အဖြစ်စံချိန်ဝင်သွားပါပြီ။
ရုံမှာ လူတစ်ယောက်မှ မရှိလို့ ပိတ်ရပါတယ် ။ နံပတ်၁ အချက် ဘေးမှာ အကြံပေးမယ့်လူကောင်း ဝိုင်းလုပ်ပေးမယ့် မိသားစု စိတ်ရှိတဲ့ လူကောင်းမရှိဘူး။ အနုပညာရှင် တစ်ချို့ပါ. . အဲ့စကားကြီး တွေလည်း မရေးချင်ဘူး။ အကူညီသူတောင်းတာ ဘဝ ပျက်မယ့် အကူညီတွေ ဝင်ရင်းပေးလိုက်ရတာ ။ တစ်ယောက်ထဲ မဟုတ်ဘူး လူပေါင်းရာကျော်တယ် ။ Acc အတုက ကောမန့် တစ်ခု အဆဲခံရဖို့တောင်
သူတို့အဆဲမခံချင်ကျဘူး ယုန်လေး နဲ့ မပက်သက်ပါဘူး ။ကင်းပါတယ်ပေါ့ ။ ထားပါတော့. ဝန်းရံပေးခဲတဲ့ သူတစ်ယောက်ချင်းစီတိုင်းကို အမြဲ အမှတ်တရ ရှိနေမှာပါ ။ တစ်သက်လုံး မသေမချင်း အနုပညာပဲ လုပ်ချင်ခဲ့တာ။ အဲ့ရည်ရွယ်ချက်က မြန်မြန်ပျက်စီးသွားမယ်လို့
မထင်ခဲ့ဘူး ” ဟု အဆိုတော်ယုန်လေးက သူ၏ လူမှုကွန်ရက်တွင် ရေးသားခဲ့သည်။
ထိုသို့ ရေးသားခဲ့ပြီးနောက် ၂ နာရီဝန်းကျင်အကြာတွင် အဆိုတော်ယုန်လေးက သူ၏ လူမှုကွန်ရက်မှ ပို့စ်ကို ပြန်လည် ဖြုတ်သွားခဲ့ပြီး ၎င်း ရိုက်ကူးထားသော “မြို့ပြထဲက လမ်းမ ” ရုပ်ရှင်မှာ လူမိုက်နှင့် ဂိုဏ်းစတားများအကြောင်း ရိုက်ကူးထားခြင်းဖြစ်သည်။
အဆိုတော်ယုန်လေးမှာ စစ်တပ်ကို ထောက်ခံသော အမာခံ အဆိုတော်တစ်ဦးဖြစ်ပြီး စစ်တပ်အတွက် ပေါ်လစီ ဇတ်ကားများ ရိုက်ကူးပေးခြင်း၊ သီချင်းများ ရေးသားပေးခြင်းများ လုပ်ဆောင်သည့်အပြင် သာကေတမှ လူမိုက်ဝင်းထွဋ်ဝင်းနှင့်ပူးပေါင်း၍ အကြွေးတောင်းပေးခြင်း အလုပ်များကို လုပ်ကိုင်နေသူလည်းဖြစ်သည်။
မကြာသေးမီက မဟာနဒီထရေးဒင်းကုမ္ပဏီမှ ဒါရိုက်တာ ရဲမင်းလွင်ထံမှ ငွေကျပ် သိန်း ၁၀၀၀ ရယူ၍ ပဲမျိုးစုံ အကြွေးမပေးသော လုပ်ငန်းရှင် ဇော်ဇော်လေးထံမှ အကြွေးတောင်းပေးရန် အဆိုတော်ယုန်လေးနှင့် သာကေတလူမိုက် ဝင်းထွဋ်ဝင်းတို့က အလုပ်လက်ခံခဲ့ကြကြောင်း၊ သို့ရာတွင် အကြွေးတောင်းပေးရန် ပျက်ကွက်ခဲ့ပြီး အကြွေးတောင်းရန် အလုပ်အပ်ခဲ့သော ငွေကြေးကိုလည်း ပြန်မပေးခဲ့ကြောင်း မဟာနဒီ ထရေးဒင်း ဒါရိုက်တာရဲမင်းလွင်က ရန်ကုန်ခေတ်သစ်သတင်းဌာနထံသို့ ထုတ်ဖော်ပြောဆိုခဲ့သည်။
