အကြမ်းဖက် စစ်အာဏာရှင် အမြစ်ဖြတ် ချေမှုန်းရေး တော်လှန်ရေးမှာ အရင်းအနှီးကြီးလွန်း၍ တိုင်းပြည်အတွက်အမြတ်ကြီးကြီးရရန် လိုအပ်ကြောင်း အမျိုးသားညီညွတ်ရေးအစိုးရ- NUG ဝန်ကြီးချုပ် မန်းဝင်ခိုင်သန်းက ပြောဆိုလိုက်သည်။
နိုဝင်ဘာလ ၂၈ ရက်နေ့ မန္တလေးဒေသလွှတ်တော် ပထမအကြိမ်အစည်းအဝေးနှင့် မန္တလေးဒေသ အုပ်ချုပ်ရေးကောင်စီ ဖွဲ့စည်းမှု အခမ်းအနားတွင် NUG ဝန်ကြီးချုပ်က ယခုကဲ့သို့ ပြောဆိုလိုက်ခြင်းဖြစ်သည်။
မန္တလေးတွင် အုပ်ချုပ်ရေးအာဏာလွှဲပြောင်းယူရန် အစပြုလိုက်ပြီဖြစ်ပြီး စစ်ရေးအရ တိုက်ပွဲဝင်နေရုံသာမက နိုင်ငံရေးအရပါ ပြည်သူဗဟိုပြုသည့် အနာဂတ်ကို တည်ဆောက်နိုင်ပြီဖြစ် ကြောင်း ၊ စစ်အာဏာရှင် တော်လှန်ရေးမှာ အရင်းအနှီးကြီးလွန်း၍ အနာဂတ်တိုင်းပြည်အတွက် အမြတ်ကြီးကြီးရရန် လိုအပ်ကြောင်း ၎င်းက ပြောဆိုသည်။
“ဒါဟာ တော်လှန်ရေးသမိုင်းမှာ အလွန်အရေးပါတဲ့ မှတ်တိုင်တစ်ခုဖြစ်ပြီး ဗမာလူမျိုး အများစု နေထိုင်ရာ ဒေသတစ်ခုကနေ ဒေသန္တရအဆင့် ဖက်ဒရယ်မူကို အုပ်ချုပ်ရေးယန္တရားနဲ့ အသက်သွင်းလိုက်ခြင်းပဲ ဖြစ်ပါတယ်။ တိုင်းရင်းသားများအားလုံး နှစ်ပေါင်းများစွာ တောင်းဆိုခဲ့တဲ့ ဖက်ဒရယ်မူကို အကောင်အထည်ဖော်ရာမှာ မန္တလေးဒေသက ရှေ့ဆောင်လမ်းပြအဖြစ် ဦးဆောင်ပါဝင်လာခြင်းဟာ ကျနော်တို့နိုင်ငံအတွက် စစ်မှန်တဲ့ ဖက်ဒရယ်နိုင်ငံတော်ကို တည်ဆောက်နိုင်ဖို့အတွက်လည်း အားရစရာ ခြေလှမ်းဖြစ်ပါတယ်။ ကျနော်တို့ရဲ့ တော်လှန်ရေးဟာ အရင်းအနှီးကြီးလွန်းတဲ့ တော်လှန်ရေးဖြစ်တာကြောင့် ကျနော်တို့ အနာဂတ်တိုင်းပြည်အတွက် အမြတ်ကြီးကြီး ရဖို့ လိုပါတယ်။” ဟု
ဝန်ကြီးချုပ် မန်းဝင်းခိုင်သန်းက ပြောဆိုသည်။
နိုဝင်ဘာလ ၂၈ ရက်နေ့ ကျင်းပသည့် ပထမအကြိမ် မန္တလေးဒေသလွှတ်တော် အစည်း အဝေးတွင် မန္တလေးဒေသကြားကာလအုပ်ချုပ်ရေးကောင်စီကို ဖွဲ့စည်းလိုက်ပြီး ဥက္ကဋ္ဌအဖြစ် ဦးမြင့်အောင်မိုး၊ ဒုဥက္ကဌအဖြစ် ဦးအောင်မျိုးလတ် ၊အတွင်းရေးမှူးအဖြစ် ဦးဌေးတို့ အပါအဝင် ကောင် စီ ဝင် ၉ ဦးဖြင့် လွှတ်တော်က အတည်ပြုဖွဲ့စည်း ပေးခဲ့သည်။
မန္တလေးဒေသ ကြားကာလအုပ်ချုပ်ရေးကောင်စီသစ်အနေဖြင့် ဒေသတွင်း တရားဥပဒေစိုးမိုးရေး၊ စစ်ဘေးရှောင် စောင့်ရှောက်ရေး၊ ကျန်းမာရေးနှင့် ပညာရေးစနစ်များကို ပြည်သူဗဟိုပြုသည့် စနစ်အဖြစ် အလျှင်အမြန်တည်ဆောက်ရေးအတွက် ရှေ့တန်းမှ တာဝန်ယူသွားမည်ဖြစ်၍ တာဝန်အလွန်ကြီးမားပြီး ပြည်ထောင်စုအဆင့်က လိုအပ်သည့် ပံ့ပိုးမှုတွေ၊ အရင်းအမြစ်များကို ပူးပေါင်းဆောင်ရွက်သွားမည်ဖြစ်ကြောင်း NUG ဝန်ကြီးချုပ်က ပြောဆိုခဲ့သည်။
“NUG အနေနဲ့ ဒေသလွှတ်တော် အကြီးအကဲများနဲ့ ကြားကာလအုပ်ချုပ်ရေးကောင်စီသစ်ကို ပြည်ထောင်စုအဆင့်မှ လိုအပ်သော ပံ့ပိုးမှု နှင့် အရင်းအမြစ်များကို ပူးပေါင်းဆောင်ရွက်သွားမယ်လို့ ဒီနေရာကနေ အလေးအနက် အာမခံ ပြောကြားလိုပါတယ်။ ကျွန်တော်တို့ရဲ့ ပူးပေါင်းဆောင် ရွက်မှုဟာ စစ်အာဏာရှင်ရဲ့ စစ်ရေးအရ အရှိန်မြှင့်တင်မှုတွေကို ခံနိုင်ရည် ရှိရုံသာမကဘဲ၊ ပြည်သူ လူထုရဲ့ အခြေခံလိုအပ်ချက်များကိုပါ ဖြည့်ဆည်းပေးနိုင်မယ့် အနာဂတ် အစိုးရစနစ်တစ်ခုကို စတင် ထူထောင်နိုင်ဖို့ ရည်ရွယ် လုပ်ဆောင်သွားမှာ ဖြစ်ပါတယ်။ တော်လှန်ရေးခရီးမှာ အသက်၊ သွေး၊ ချွေး ပေးဆပ်ခဲ့ကြသော သူရဲကောင်းများကို ဂုဏ်ပြုအမှတ်ရတဲ့စိတ်နဲ့ ဒီနေ့ မန္တလေးဒေသလွှတ်တော်ကနေ စတင်မယ့် ဒေသအုပ်ချုပ်ရေး ယန္တရားဟာ ကျွန်တော်တို့ ဆင်နွှဲနေတဲ့ တော် လှန်ရေးအတွက် အထောက်အပံ့ကောင်းဖြစ်စေပြီး မန္တလေးဒေသမှသည် တစ်နိုင်ငံလုံးလွတ်မြောက်နိုင်ရေးအတွက်လည်း အထောက်အပံ့ ဖြစ်စေ ပါကြောင်း ဆုမွန်ကောင်းတောင်းရင်း နိဂုံးချုပ်ပါတယ်” ဟု NUG ဝန်ကြီးချုပ်က အသိပေး ပြောဆိုသွားသည်။
