မြန်မာစစ်တပ်နှင့် ပတ်သက်ဆက်နွှယ်နေသည့်ကုမ္ပဏီများမှ ရင်းနှီးမြှပ်နှံမှုများအား ဆွီဒင်ပင်စင်ရံပုံငွေအဖွဲ့ ပြန်လည်ရုပ်သိမ်း

ရန်ကုန်၊ ဒီဇင်ဘာ ၉

ဆွီဒင်ပင်စင်ရံပုံငွေအဖွဲ့ (AP7) သည် အိန္ဒိယစစ်လက်နက်ကုမ္ပဏီများဖြစ်သည့် Bharat Electronics Limited (BEL)၊ Hindustan Aeronautics Limited (HAL)၊ ထိုင်းရေနံကုမ္ပဏီ PTT Exploration and Production (PTTEP) နှင့် ဂျပန်ရင်းနှီးမြှပ်နှံမှုလုပ်ငန်းကြီး Sumitomo Corporation တို့ရှိ ၄င်း၏ရင်းနှီးမြှပ်နှံမှုများအား ပြန်လည်ရုပ်သိမ်းကြောင်း ကြေညာခဲ့သည်။

ထိုသို့ဆွီဒင်ပင်စင်ရံပုံငွေအဖွဲ့ က စစ်တပ်ဆက်နွှယ်ကုမ္ပဏီများထံမှ အမေရိကန်ဒေါ်လာ သန်းပေါင်းများစွာရှိသည့် ရင်းနှီးမြှပ်နှံမှုများ ပြန်လည်ရုပ်သိမ်းမှုအပေါ် ကြိုဆိုကြောင်း Justice For Myanmar (JFM)၊ Swedish Burma Committee (SBC) နှင့် Fair Finance Guide တို့က ယနေ့ညတွင် ထုတ်ပြန်ခဲ့သည်။

JFM အဖွဲ့၏ ထုတ်ပြန်ချက်များအရ BEL နှင့် HAL တို့သည် မြန်မာစစ်တပ်ထံ စစ်လက်နက်နှင့် အခြားစက်ပစ္စည်းကိရိယာများကို ရောင်းချခဲ့ကြောင်း၊ PTTEP သည် စစ်အုပ်စု၏ အဓိကနိုင်ငံခြားဝင်ငွေရင်းမြစ်ဖြစ်သည့် ကမ်းလွန်သဘာဝဓါတ်ငွေ့စီမံကိန်းနှစ်ခုတွင် စစ်အုပ်စုနှင့်အတူ ကြီးကြပ်လုပ်ကိုင်နေကြောင်း၊ Sumitomo Corporation သည် စစ်အုပ်စုထိန်းချုပ်ထားသည့် ဆက်သွယ်ရေးကုမ္ပဏီ MPT နှင့် ပူးတွဲကြီးကြပ်လုပ်ကိုင်နေပြီး စစ်အုပ်စု၏ ဒစ်ဂျစ်တယ်ဖိနှိပ်မှုများတွင် ပါဝင်ပတ်သက်နေကြောင်း ထုတ်ပြန်ထားသည်။

ပြီးခဲ့သည့် နိုဝင်ဘာလအတွင်း Justice For Myanmar (JFM)၊ Swedish Burma Committee (SBC) နှင့် Fair Finance Guide တို့ကထုတ်ပြန်ခဲ့သည့် ပူးတွဲဆန်းစစ်လေ့လာမှုအတွင်း အဆိုပါဆွီဒင်ရံပုံငွေအဖွဲ့များသည် မြန်မာနိုင်ငံရှိ စစ်အုပ်စုအား ကူညီပံ့ပိုးနေသည့် ကုမ္ပဏီ ၁၂ ခုတွင် ဆွီဒင်ငွေ ခရိုနာ ၄.၆ ဘီလီယံ ရင်းနှီးမြှပ်နှံထားကြောင်းနှင့် ၄င်းတို့အထဲတွင် ဆွီဒင်ပြည်သူ ခြောက်သန်း၏ ပင်စင်ငွေများ ထည့်ဝင်ထားသည့် AP7 က အများဆုံး ရင်းနှီးမြှပ်နှံထားကြောင်း ထုတ်ပြန်ခဲ့သည်။

Justice For Myanmar ၏ ပြောရေးဆိုခွင့်ရှိသူ မရတနာမောင်က “ဒီကုမ္ပဏီတွေဆီမှာ ရင်းနှီးမြှပ်နှံထားတာတွေ ပြန်ရုပ်သိမ်းတဲ့ ဆုံးဖြတ်ချက်ကို ကြိုဆိုပါတယ်။ ဆွီဒင်ပြည်သူတွေရဲ့ ပင်စင်ငွေတွေကို မြန်မာစစ်အုပ်စုဆီ စစ်လက်နက်တွေ ရောင်းချနေတဲ့ ကုမ္ပဏီတွေမှာ ရင်းနှီးမြှပ်နှံဖို့ မသင့်ပါဘူး။ တရားမဝင်အကြမ်းဖက်စစ်အုပ်စုအတွက် စစ်လက်နက်တပ်ဆင်ပေးနေတဲ့ သို့မဟုတ် ငွေကြေးထောက်ပံ့ပေးနေတဲ့ ကုမ္ပဏီတွေဆီမှာ ဘယ်ရံပုံငွေကိုမှ ရင်းနှီးမြှပ်နှံမှုမပြုလုပ်စေဖို့ လုပ်ဆောင်သင့်ပါတယ်” ဟု ပြောကြားခဲ့သည်။

အဆိုပါဆွီဒင်ပင်စင်ရံပုံငွေအဖွဲ့သည် မြန်မာစစ်တပ်ဆက်နွှယ်ကုမ္ပဏီများထံမှ ရင်းနှီးမြှပ်နှံမှုများ ပြန်လည်ရုပ်သိမ်းခဲ့သလို၊ ပြင်းထန်သော အခွင့်အရေးချိုးဖောက်မှုများနှင့် သဘာဝပတ်ဝန်းကျင် ပျက်စီးမှုများအတွက် ဝေဖန်ခံနေရသော ကုမ္ပဏီများနှင့် ပတ်သက်၍လည်း ထိခိုက်အန္တရာယ်ဆန်းစစ်မှု အခြေပြုနည်းလမ်းသစ်တစ်ရပ်ကို မိတ်ဆက်ကျင့်သုံးသွားမည်ဖြစ်ကြောင်း ထုတ်ပြန်ခဲ့သည်။ ယင်းသည် တရားရုံးတွင် ပြစ်ဒဏ်ချမှတ်ခံရခြင်း သို့မဟုတ် ကုလသမဂ္ဂမှ အမည်ထုတ်ပြန်ဖော်ပြခြင်း မရှိသေးသောအခြေအနေမျိုးတွင် များစွာသောဖြစ်ရပ်များကို ယခုနည်းလမ်းသစ်ဖြင့် အရေးယူဆောင်ရွက်နိုင်ကြောင်းကို အဓိပ္ပါယ်ဖွင့်ဆိုထားသည်။

“ရင်းနှီးမြှပ်နှံသူတစ်ဦးအနေနဲ့ ရေရှည်တည်တံ့တဲ့အလုပ်အတွက် မှန်ကန်တဲ့ခြေလှမ်းဖြစ်ဖို့ ဒီလိုလုပ်ကို လုပ်ရမှာ ဖြစ်ပါတယ်” ဟု Fair Finance Guide မှ Jakob König က ပြောကြားခဲ့သလို၊ “ဒီနေ့ ထုတ်ပြန်ကြေညာချက်ကို ကျွန်ုပ်တို့ ကြိုဆိုပါတယ်။ ဆွီဒင်အစိုးရအနေနဲ့လည်း မြန်မာနိုင်ငံရှိ ဒီမိုကရေစီလှုပ်ရှားမှုတွေအတွက် အကူအညီတွေကို ရပ်တန့်လိုက်တဲ့ ဆုံးဖြတ်ချက်အပေါ် ပြန်လည်သုံးသပ်လိမ့်မယ်လို့လည်း မျှော်လင့်ပါတယ်” ဟု Swedish Burma Committee ၏ အမှုဆောင် Kristina Jelmin က ပြောကြားခဲ့သည်။

Justice For Myanmar အဖွဲ့သည် မြန်မာစစ်တပ်၏ လူ့အခွင့်အရေးချိုးဖောက်မှုများ ဖော်ထုတ်ရေး၊ စစ်တပ်အား ကမ္ဘာလုံးဆိုင်ရာ စစ်လက်နက်တားဆီးပိတ်ပင်ရေး နှင့် စစ်တပ်၏ ဝင်ငွေရင်းမြစ်များကို ဖြတ်တောက်ရေး တို့ကို တစိုက်မတ်မတ် လုပ်ဆောင်နေသောအဖွဲ့ဖြစ်ပြီး၊ ၄င်း၏ရဲရင့် ဆန်းသစ်သော လုပ်ဆောင်ချက်များကြောင့် ပြီးခဲ့သည့်ရက်သတ္တပတ်က ကမ္ဘာ့ဂုဏ်သိက္ခာအကြီးဆုံးဆုတစ်ခုဖြစ်သော Right Livelihood Award ချီးမြှင့်ခံရသောအဖွဲ့လည်း ဖြစ်သည်။