ရန်ကုန်၊ ဒီဇင်ဘာ ၁၆
ကရင်ပြည်နယ်၊ ကြာအင်းဆိပ်ကြီးမြို့နယ်၊ဘုရားသုံးဆူမြို့နယ်ခွဲတွင်လည်း ကျားဖြန့် တရုတ်နိုင်ငံသား ထောင်ချီရောက်ရှိလာနေပြီး ယင်းကျားဖြန့် တရုတ်များကို ဒီမိုကရေစီအကျိုးပြုတပ်မတော် DKBA က ခေါ်သွင်းလာခြင်းဖြစ်ကြောင်း ဘုရားသုံးဆူအခြေစိုက် ကရင်စစ်ရေး သတင်းရင်းမြစ်က ပြောဆိုသည်။
နိုဝင်ဘာလဆန်းပိုင်းမှစတင်ပြီး ကျားဖြန့် တရုတ်အများအပြားမှာ မြ၀တီရှိ DKBA တပ်ဖွဲ့များ၏ သယ်ယူချိတ်ဆက်ပေးမှုများဖြင့် ဘုရားသုံးဆူဘက်သို့ ရောက်ရှိလာကြကြောင်း၊ ကျားဖြန့်တရုတ်များမှာ KK Park ၊ ရွှေကုက္ကိုလ်နှင့် မြ၀တီမြို့ပေါ်တို့မှဖြစ်ပြီး တရုတ် ၁ ဦးလျှင် ထိုင်းဘတ် ၅ သောင်းခွဲအထိ သယ်ယူပို့ဆောင်ခ စျေးပေါက်ကြောင်း သိရှိရသည်။
“မြ၀တီဘက်က ကျားဖြန့် တရုတ်တွေ ပြေးလာကြတာ။ ပြေးတာဆိုတာက စစ်တပ်နဲ့ DKBA ပေါင်းသယ်ကြတာ။ ခန့်မှန်းခြေဆိုရင် ကျားဖြန့် တရုတ် ၄ ထောင်လောက်ရှိမယ်ထင်တယ်။ အခုတော့ DKBA ဗိုလ်အေဝမ်းရဲ့ ရေတံခွန် စခန်းဗျူဟာရုံးနဲ့ စခန်း ၉ ခုမှာ ထားထားတယ်။ နောက်ပြီး ဗိုလ်အေဝမ်း တပည့် နေလတို့အဖွဲ့ကလည်း ကျားဖြန့် တရုတ် ၁၀၀၀ လောက်ကို ခေါ်သွင်းလာတယ်”ဟု ကရင်စစ်ရေး သတင်းရင်းမြစ်က ရှင်းပြသည်။
ယင်းအပြင် ဘုရားသုံးဆူမြို့ပေါ်ရှိ နေရာတချို့တွင် ကျားဖြန့် တရုတ်များက အဆောက်အအုံနှင့် ခြံကွက်များကို ငှားရမ်းပြီး အွန်လိုင်းငွေလိမ်လည်လုပ်ငန်းများကို ပြန်လည် လည်ပတ်မှုများ လည်းရှိနေကြောင်း သိရှိရသည်။
ဘုရားသုံးဆူမြို့သို့ ကျားဖြန့် တရုတ်များ ဝင်ရောက်နေရာတွင် နယ်မြေခံ စစ်တပ်ကလည်း ဂိတ်ကြေး ကောက်ခြင်း၊ လိုင်းကြေးနှင့် ဆက်ကြေး ရယူခြင်းနှင့် လိုအပ်သော စက်သုံးဆီ အပါအဝင် ရိက္ခာကုန်များကို သယ်ယူရန် လမ်းကြောင်းများ ဖွင့်ပေးခြင်းများ လုပ်ဆောင်နေကြောင်း သိရှိရသည်။
