ရန်ကုန်၊ ဖေဖော်ဝါရီ ၁၀
အကြမ်းဖက်စစ်တပ်၏ စစ်လော်ဘီ ဇော်ဘုန်းဟိန်းကို အီလက်ထရောနစ် ဆက်သွယ်ရေးဥပဒေ ပုဒ်မ ၆၆ (ဃ) ဖြင့် ထောင်ဒဏ် ၂ နှစ်ထပ်မံချမှတ်လိုက်ပြီး စုစုပေါင်းထောင်ဒဏ် ၁၃ နှစ်ဖြစ်လာကြောင်း ကိုဇော်ဘုန်းဟိန်းကို ထောက်ခံသော မဘသအသိုင်းအ၀ိုင်းက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၉ ရက်နေ့ ဒဂုံမြို့သစ်တောင်ပိုင်းမြို့နယ် တရားရုံးက စစ်လော်ဘီ ဇော်ဘုန်းဟိန်းကို အီလက်ထရောနစ်ဆက်သွယ်ရေး ဥပဒေ ပုဒ်မ ၆၆ (ဃ)ဖြင့် ထောင်ဒဏ် ၂ နှစ်ထပ်မံချမှတ်ခဲ့ခြင်းဖြစ်ပြီး ယခင်ကလည်း မင်းအောင်လှိုင်အပါအဝင် စစ်ခေါင်း ဆောင်များကို ဆဲဆိုမှုဖြင့် ထောင်ဒဏ် ၁၁ နှစ်ကျခံနေရရာ ပြစ်ဒဏ်စုစုပေါင်းထောင်ဒဏ် ၁၃ နှစ်နှစ်ရှိလာကြောင်း သိရှိရသည်။
စစ်လော်ဘီ ဇော်ဘုန်းဟိန်းကို တောင်ဒဂုံတရားရုံးတွင် ရုံးထုတ်ရာတွင်လည်းကောင်း၊ ထောင်ဝင်စာတွေ့ခွင့်တောင်းရာတွင်လည်း ကောင်း ပြင်ပမှ ထောက်ခံသူများနှင့် တွေ့ခွင့်မပေးခဲ့ကြောင်း၊ ဖေဖော်ဝါရီလ ၁၀ ရက်နေ့ အတွက် ထောင်ဝင်စာ တွေ့ခွင့်တောင်းရတွင် မန္တလေး အိုးဘောင်ထောင်သို့ လွှဲပြောင်းမည်ဖြစ်၍ ထောင်ဝင်စာတွေ့ခွင့် ငြင်းပယ်ခဲ့ကြောင်း ဇော်ဘုန်းဟိန်း ထောက်ခံသော မဘသလှုပ်ရှားသူတစ်ဦးက ရှင်းပြသည်။
“ကျနော်တို့ ရုံးချိန်းအမိန့်ချတာတွေ သတ်မှတ်ချိန်မဟုတ်ဘဲ ကြိုထုတ်သွားတာတွေလုပ်တယ်။ နောက်ပြီး ရုံးချိန်းတွေမှာ သွားတွေ့ရင် တွေ့ခွင့်မပေးဘူး။ တရားရုံးထဲကို အုပ်စုလိုက် ပေးမဝင်တာတွေ ဖြစ်တယ်။ ထောင်ဝင်စာတွေ့ခွင့်တောင်းတော့ မန္တလေးအိုးဘိုကို ပြန်လွှဲမှာမို့လို့ အင်းစိန်ထောင်မှာ တွေ့ခွင့်မပေးဘူးဆိုပြီး အကြောင်းပြန်တယ်” ဟု ဇော်ဘုန်းဟိန်း ထောက်ခံသော မဘသလှုပ်ရှားသူက ဆိုသည်။
အကြမ်းဖက် မင်းအောင်လှိုင်အပါအဝင် စစ်ခေါင်းဆောင်များကို ဆဲဆိုမှုဖြင့် ထောင်ဒဏ် ၁၁ နှစ်ချမှတ်ခံထားရသော ဇော်ဘုန်းဟိန်းကို အင်းစိန်ထောင်သို့ လွှဲပြောင်းလိုက်ပြီး ဆက်သွယ်ရေးဥပဒေပုဒ်မ ၆၆(ဃ)ဖြင့် ဆက် လက် အမှုဖွင့်ထားကြောင်း အင်းစိန်ထောင်သတင်းရင်းမြစ်က ပြောဆိုသည်။
မန္တလေးအိုးဘိုထောင်တွင် ထောင်ဒဏ် ၁၁ နှစ်ကျခံနေရသော ဇော်ဘုန်းဟိန်းကို ၂၀၂၅ ခုနှစ်ဒီဇင်ဘာလအတွင်း အင်းစိန် အကျဉ်း ထောင်သို့ လွှဲပြောင်းခဲ့ပြီး ရန်ကုန်တိုင်း၊ ဒဂုံမြို့သစ်တောင်ပိုင်းမြို့ နယ် ရဲစခန်းတွင် (ပ)အမှတ် ၃၅၈/၂၀၂၅ အီလက်ထရောနစ် ဆက်သွယ်ရေးဥပဒေပုဒ်မ ၆၆(ဃ)ဖြင့် မဘသနှင့်စစ်တပ်ထောက်ခံသူ ဒေါ်မိုးမိုးခိုင်က ဖွင့်လှစ်ထားသော အမှုကို ရင်ဆိုင်ခဲ့ရခြင်းဖြစ်သည်။
၂၀၂၅ ခုနှစ် ဩဂုတ်လ ၇ ရက်နေ့ အကြမ်းဖက် စစ်ခေါင်းဆောင် မင်းအောင်လှိုင် အပါ အဝင် စစ်ခေါင်းဆောင်များကို ဆဲဆိုမှု အပါအဝင် ပုဒ်မများဖြင့် ဇော်ဘုန်းဟိန်းကို တရားရုံးက ထောင်ဒဏ် ၁၁ နှစ်ချမှတ်ခဲ့ကြောင်း၊ ယင်းသို့ ချမှတ်ခံရပြီးနောက် ဇော်ဘုန်းဟိန်းကို ထောက်ခံသော စစ်တပ်ဘက်တော်သားတချို့ စုပေါင်းကာ မင်းအောင်လှိုင်ထံသို့ အသနားခံစာ အကြိမ်ကြိမ် တင်ပြခဲ့သော်လည်း တစ်စုံတစ်ရာ ထူးခြားမှုမရှိဟု ဇော်ဘုန်းဟိန်းထောက်ခံသူများက ဆိုသည်။
စစ်လော်ဘီ ဇော်ဘုန်းဟိန်းကို ၂၀၂၅ ခုနှစ် ဇွန်လ ၂ ရက်နေ့ ပြင်ဦးလွင်တွင် စစ်တပ်က ဝင်ရောက် ဖမ်းဆီးသွားခဲ့ခြင်းဖြစ် သည်။
