မြန်မာနိုင်ငံတစ်ဝန်းလုံးရှိ မြို့နယ်အုပ်ချုပ်ရေးအဖွဲ့များတွင် စစ်တပ်မှ ဗိုလ်မှူးအဆင့်အရာရှိများက ဦးဆောင် အုပ်ချုပ်မည်ဖြစ်ပြီး ကြံ့ဖွတ်အစိုးရသစ်နှင့်အတူ အုပ်ချုပ်ရေးအရာရှိ ဗိုလ်မှူးအသစ်များ တက်လာမည်

ရန်ကုန်၊ ဖေဖော်ဝါရီ ၂၂

မြန်မာနိုင်ငံတစ်ဝန်းလုံးရှိ မြို့နယ်အုပ်ချုပ်ရေးအဖွဲ့များတွင် စစ်တပ်မှ ဗိုလ်မှူးအဆင့်အရာရှိများက ဦးဆောင် အုပ်ချုပ်မည်ဖြစ်ပြီး ကြံ့ဖွတ်အစိုးရသစ်နှင့်အတူ အုပ်ချုပ်ရေးအရာရှိ ဗိုလ်မှူးအသစ်များ တက်လာမည်ဖြစ်ကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။

လာမည့် မတ်လအတွင်း လွှတ်တော်ခေါ်ယူ၍ ကြံ့ဖွတ်အစိုးရသစ်ဖွဲ့စည်းချိန်တွင် နိုင်ငံတစ်ဝန်းရှိ မြို့နယ် အုပ်ချုပ်ရေးအဖွဲ့များတွင်လည်း နယ်မြေခံ ဗိုလ်မှူးအသစ်များက အုပ်ချုပ်ရေးအရာရှိများအဖြစ် ရောက်ရှိအုပ်ချုပ်မည်ဖြစ်ကြောင်း၊ မြို့နယ်အုပ်ချုပ်ရေးအဖွဲ့များ၏ ဥက္ကဋ္ဌကို ပြည်ထဲရေးဝန်ကြီးဌာနလက်အောက်ရှိ အထွေထွေအုပ်ချုပ်ရေးဦးစီးဌာနမှ အရာရှိများက ရယူမည်ဖြစ်သော်လည်း အဓိက အုပ်ချုပ်မည့် Focal တာဝန်ရှိသူများမှာ စစ်တပ်မှ အုပ်ချုပ်ရေးအရာရှိ ဗိုလ်မှူးများ ဖြစ်ကြောင်း သိရှိရသည်။

“မြို့နယ်အုပ်ချုပ်ရေးအဖွဲ့တွေအားလုံးမှာ အုပ်ချုပ်ရေးအရာရှိ အဖွဲ့ဝင် ၁ အဖြစ် သက်ဆိုင်ရာ နယ်မြေခံတပ်နယ်တွေက တင်သွင်းတဲ့ ဗိုလ်မှူး ၁ ဦးကို ခန့်အပ်မှာဖြစ်ပါတယ်။ အဲဒါက တစ်နိုင်ငံလုံးမှာရှိတဲ့ မြို့နယ်အုပ်ချုပ်ရေးအဖွဲ့တွေအားလုံးမှာ အပြောင်းအလဲ လုပ်မှာဖြစ်ပါတယ်။ ဒါက နိုင်ငံတော်စီမံအုပ်ချုပ်ရေးကောင်စီရဲ့ ညွှန်ကြားချက်အမှတ် ၄ /၂၀၂၅ အရ အဲဒီလို အပြောင်းအလဲလုပ်မှာဖြစ်ပါတယ်။ သက်ဆိုင်ရာမြို့နယ်အုပ်ချုပ်ရေးအဖွဲ့ရဲ့ ဥက္ကဋ္ဌက ထွေ/အုပ်အရာရှိဖြစ်ပေမယ့် မြို့နယ်တစ်ခုလုံး ကို အုပ်ချုပ်မယ့် အရာရှိကတော့ တပ်မတော်က အုပ်ချုပ်ရေးအရာရှိ ဗိုလ်မှူးတွေ ပဲဖြစ်ပါတယ်” ဟု နေပြည်တော်စစ်ဘက်သတင်းရင်းမြစ်က ရှင်းပြသည်။

အကြမ်းဖက် မင်းအောင်လှိုင်က ၂၀၂၅ ခုနှစ် ဇူလိုင်လ ၂၀ ရက်နေ့တွင် မြို့နယ်အုပ်ချုပ်ရေးဆိုင်ရာ ညွှန်ကြားချက်တစ်ရပ်ကို ထုတ်ပြန်ခဲ့ပြီး အဆိုပါ ညွှန်ကြားချက်အရ မြန်မာနိုင်ငံတစ်ဝန်းရှိ မြို့နယ်အုပ်ချုပ်ရေးအဖွဲ့များအားလုံးတွင် စစ်တပ်ကိုယ်စားလှယ် ၁ ဦးကို ထည့်သွင်းဖွဲ့စည်းရမည်ဖြစ်ကြောင်း၊ ယင်းညွှန်ကြားချက်မှာ နောင်လာမည့် အစိုးရအဆက်ဆက် ကျင့်သုံးရမည်ဖြစ်သည်ဟု သိရှိရသည်။

မင်းအောင်လှိုင်၏ ညွှန်ကြားချက်အမှတ် ၄ /၂၀၂၅ တွင် နိုင်ငံတစ်ဝန်း မြို့နယ်အုပ်ချုပ်ရေးဆိုင်ရာ အကောင်အထည်ဖော်ရာတွင် အုပ်ချုပ်ရေးအဖွဲ့များ ဖွဲ့စည်းပုံ၊ တာဝန်နှင့် လုပ်ငန်းစဉ်များအားလုံးကို သတ်မှတ်ပေးထားကြောင်း၊ မြို့နယ်အုပ်ချုပ်ရေးအဖွဲ့များအားလုံးတွင် စစ်တပ်ကိုယ်စားလှယ် ၁ ဦးကို ထည့်သွင်းဖွဲ့စည်းရမည်ဖြစ်ကြောင်း သိရှိရသည်။

မင်းအောင်လှိုင်ထုတ်ပြန်ခဲ့သော မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီအဖွဲ့များတွင် မြို့နယ်အုပ်ချုပ်ရေးမှူး ဥက္ကဋ္ဌ အဖြစ် ထွေ/အုပ်အရာရှိကလည်းကောင်း၊ စစ်တပ်ကိုယ်စားလှယ် ၁ ဦး၊ စီမံကိန်းရေးဆွဲရေးဦးစီးဌာန မြို့နယ်ဦးစီးမှူး၊ မြို့နယ်ဥပဒေအရာရှိ၊ မြို့နယ်လ၀က ဦးစီးမှူး၊ မြို့နယ်အုပ်ချုပ်ရေးမှူးက တာဝန်ပေးအပ်သူ ၁ ဦးတို့က အဖွဲ့ဝင်များ အဖြစ် ဆောင်ရွက်ရမည်ဖြစ်ကြောင်း၊ မြို့နယ်ရဲတပ်ဖွဲ့မှူးကမူ အတွင်းရေးမှူးအဖြစ် ဆောင်ရွက်ရမည်ဖြစ်ပြီး မြို့နယ်စီမံခန့်ခွဲရေးနှင့်အုပ်ချုပ်ရေးအဖွဲ့များတွင် အဖွဲ့ဝင် ၇ ဦး ပါဝင်မည်ဖြစ်ကြောင်း သိရှိရသည်။

၂၀၂၁ ခုနှစ်စစ်အာဏာသိမ်းချိန်မှစတင်၍ ယနေ့အချိန် အထိ တစ်နိုင်ငံလုံးတွင် မြို့နယ် စီမံအုပ်ချုပ်ရေးအဖွဲ့များ ဖွဲ့စည်းထားပြီး ယင်းအဖွဲ့များတွင် ဗိုလ်မှူးများကို အုပ်ချုပ်ရေးအဖွဲ့ဝင်အရာရှိများအဖြစ် စစ်တပ်က ခန့်အပ်ထားခြင်းဖြစ်သည်။

ဓာတ်ပုံ- လွှတ်တော်တက်ရောက်နေသည့် ဗိုလ်မှူး အပါအဝင် အကြမ်းဖက်စစ်အရာရှိတချို့။ (ပုံအဟောင်းကို အသုံးပြုထားပါသည်။)