ရန်ကုန်၊ဖေဖော်ဝါရီ ၂၈
အီရန်စစ်သား၊ ရဲတွေ လက်နက်ချဖို့နဲ့ လက်နက်ချရင် အသက်ချမ်းသာပေးမယ်လို့ အမေရိကန်သမ္မတထရမ့်က အီရန်ကို စစ်ကြေညာတဲ့ မိန့်ခွန်းမှာ ပြောဆိုလိုက်ပါတယ်။
လူမှုကွန်ရက်ကတစ်ဆင့် ထုတ်ပြန်လိုက်တဲ့ အမေရိကန်သမ္မတရဲ့ မိန့်ခွန်းမှာ အမေရိကန်ပြည်သူတွေကို ကာကွယ်ဖို့နဲ့ အီရန်အစိုးရထံမှ ကျရောက်လာတော့မည့် အန္တရာယ်တွေကို ဖယ်ရှားဖို့အတွက်” တိုက်ခိုက်တာဖြစ်ကြောင်း၊ အီရန်ကို နူကလီးယား လက်နက်ပိုင်ဆိုင်ခွင့် မပေးနိုင်ဘူးလို့ သမ္မတ ထရမ့် ကပြောဆိုသွားပါတယ်။
အမေရိကန်သမ္မတ ထရမ့်က အီရန်စစ်သားတွေ၊ ရဲတွေအနေနဲ့ လက်နက်ချကြဖို့နဲ့ လက်နက်မချရင်တော့ သေဖို့ပဲ ရှိလိမ့်မယ်လို့ ဆိုပါတယ်။
အီရန်ပြည်သူတွေကိုတော့ နေအိမ်ထဲမှာ နေကြဖို့နဲ့ နေရာအနှံ့ကို ဗုံးတွေကျဲမှာ ဖြစ်ကြောင်း၊ အပြင်ထွက်ရင် အန္တရာယ်များမှာဖြစ်ကြောင်း အမေရိကန်သမ္မတ ထရမ့်က ပြောဆိုပါတယ်။
အမေရိကန်အနေနဲ့ အီရန်မှာ အုပ်ချုပ်သူ အပြောင်းအလဲ လုပ်ဆောင်သွားမှာဖြစ်တယ်လို့ အမေရိကန် သမ္မတ ထရမ့်က ပြောဆိုသွားပါတယ်။
“ငါတို့ တိုက်ခိုက်လို့ ပြီးသွားပြီဆိုရင် မင်းတို့အစိုးရကို မင်းတို့ဘာသာ ပြန်သိမ်း ပိုက်ကြတော့၊ ဒါဟာ မင်းတို့အတွက် ရခဲတဲ့ အခွင့်အရေးပဲ။ အရင်အမေရိကန်သမ္မတတွေ မလုပ်ပေးခဲ့တဲ့ အကူအညီကို ငါက အခုလက်တွေ့ လုပ်ပေးနေတာဖြစ်လို့ မင်းတို့ရဲ့ ကံကြမ္မာကို မင်းတို့ဘာသာ ဖန်တီးကြတော့”လို့ အမေရိကန်သမ္မတ ထရမ့်က ပြောဆိုသွားပါတယ်။
