ကသာမြို့ လေးထပ်ဘုန်းကြီးကျောင်းနှင့် ပန်းပဲကုန်းကို စစ်တပ်က လေယာဉ်ဖြင့် ဗုံးကျဲမှု သံဃာနှင့် စစ်ဘေးရှောင် ပြည်သူများ ထိခိုက်သေဆုံးမှုရှိ

ရန်ကုန်၊ မတ် ၂၀

စစ်ကိုင်းတိုင်း၊ ကသာမြို့ရှိ စစ်ဘေးရှောင်ပြည်သူများ ခိုလှုံနေသည့် လေးထပ်ဘုန်းကြီးကျောင်းနှင့် ပန်းပဲကုန်းရပ်ကွက်တို့ကို ယနေ့ မတ်လ ၂၀ ရက်နေ့တွင် စစ်ကောင်စီတပ်က လေယာဉ်ဖြင့် ဗုံးကျဲတိုက်ခိုက်ခဲ့ရာ သံဃာတော်များအပါအဝင် ပြည်သူအများအပြား ထိခိုက်သေဆုံးမှုများ ရှိနေကြောင်း ဒေသပြည်သူများထံမှ သိရသည်။

ယနေ့နံနက်ပိုင်းတွင် ကသာမြို့၊ ခြေလျင်တပ်ရင်း ခလရ – ၃၀၉ နှင့် တော်လှန်ရေးအင်အားစု (PDF) များ တိုက်ပွဲများဖြစ်ပွားကြောင်း၊ တိုက်ပွဲများမှာ ပန်းပဲကုန်းဘက်အထိပါ ကူးစက်သွားခဲ့ကြောင်း၊ ယင်းနောက် ယနေ့ နံနက် ၁၀ နာရီကျော်အချိန် စစ်တပ်က လေးထပ်ဘုန်းကြီးကျောင်းနှင့် ပန်းပဲကုန်းဘက်သို့ လေယာဉ်များဖြင့် ဗုံးများကျဲချခဲ့ကြောငး သိရှိရသည်။

“ရပ်ကွက် ၃ မှာ ရှိတဲ့ လေးထပ်ဘုန်းကြီးကျောင်းကို လေယာဉ်နဲ့ ဗုံးကျဲတာ။ သံဃာတွေရော ပြည်သူတွေရော သေဆုံးမှုရှိတယ်။ အတိအကျတော့မ သိရသေးဘူး။ မီးတွေလည်းလောင်တယ်။ ပန်းပဲကုန်းဘက်မှာလည်း အထိအခိုက်တွေရှိတယ်။ တိုက်ပွဲဖြစ်ပြီး လေယာဉ်နဲ့ စစ်တပ်က ဗုံးလာကျဲတာ။ မြို့ထဲမှာလည်း ပြည်သူတွေ ရှိနေတယ်” ဟု ကသာမြို့မှ ဒေသသတင်းရင်းမြစ်က ပြောဆိုသည်။

စစ်တပ်၏ လေယာဉ်ဖြင့် ဗုံးကျဲမှုကြောင့် ကသာမြို့ပေါ်မှ လူနေအိမ်များနှင့် ကျောင်းဆောင်များ မီးလောင်ကျွမ်းခဲ့ကြောင်း၊ အကျဉ်းထောင်ရှေ့ရှိ လေးထပ်ဘုန်း ကြီးကျောင်းအနီးဝန်းကျင်နှင့် သဖန်းကိုင်းဒေသတဝိုက်မှ ပြည်သူများမှာလည်း ဘေးလွတ်ရာသို့ ထွက်ပြေးတိမ်းရှောင်နေကြရကြောင်း သိရှိရသည်။

လက်ရှိတွင် ကသာမြို့အတွင်း၌ ဖုန်းလိုင်းနှင့် အင်တာနက်လိုင်းများ အဆက် အသွယ်ပြတ်တောက်နေသဖြင့် ဒေသခံပြည်သူများနှင့် မိသားစုဝင်များအကြား ဆက်သွယ်၍မရဘဲ စိုးရိမ်ပူပန်မှုများ မြင့်တက်လျက်ရှိသည်။

စစ်တပ်က စစ်ဘေးရှောင် ပြည်သူများရှိနေသည်ကို သိလျက်နှင့် အရပ်သားပစ်မှတ်များကို ရည်ရွယ်ချက်ရှိရှိ ဗုံးကျဲတိုက်ခိုက်ခဲ့ခြင်းဖြစ်သည်ဟု ဒေသခံများက ပြောဆိုကြသည်။