ရန်ကုန်၊ မတ် ၂၇
ကရင်ပြည်နယ်၊ မြဝတီမြို့တောင်ဘက်၊ DKBA (ဒီမိုကရေစီအကျိုးပြု ကရင်တပ်မတော်) ထိန်းချုပ်နယ်မြေအတွင်းရှိ ကျားဖြန့် ကာစီနိုရုံတစ်ခုကို အကြမ်းဖက်စစ်တပ်က အသေခံဒရုန်း (Kamikaze Drone) များအသုံးပြု၍ ရည်ရွယ်ချက်ရှိရှိ ပစ်ခတ်တိုက်ခိုက်ခဲ့ရာ တရုတ်နိုင်ငံသား ၃ ဦး ပွဲချင်းပြီး သေဆုံးကာ ၁၃ ဦး ထိခိုက်ဒဏ်ရာရရှိခဲ့ကြောင်း ကရင်စစ်ရေးသတင်းရင်းမြစ်ထံမှ သိရသည်။
ယမန်နေ့ မတ်လ ၂၆ ရက်နေ့ ည ၁၁ နာရီ ၃၀ မိနစ်အချိန်ခန့် မြဝတီမြို့တောင်ဘက်၊ ဖလူးလေးကျေးရွာအရှေ့ဘက်ရှိ DKBA ထိန်းချုပ်ရာနယ်မြေအတွင်းမှ “ကျွန်းတောကာစီနိုရုံ” သို့ စစ်ကောင်စီဘက်မှ အသေခံဒရုန်းများ စေလွှတ်၍ ပစ်ခတ်တိုက်ခိုက်ခဲ့ခြင်းဖြစ်သည်။
အဆိုပါ တိုက်ခိုက်မှုကြောင့် ကျားဖြန့်ကာစီနိုရုံအတွင်း အလုပ်လုပ်ကိုင်နေသည့် တရုတ်နိုင်ငံသား ၃ ဦးမှာ ဗုံးစထိမှန်ကာ နေရာတွင်ပင် ပွဲချင်းပြီး သေဆုံးသွားခဲ့ရသည်။
ဒရုန်းဗုံး ကျပေါက်ကွဲမှုကြောင့် ကျားဖြန့်ရုံအတွင်းရှိ အခြားဝန်ထမ်းနှင့် ဧည့်သည် စုစုပေါင်း ၁၃ ဦးခန့်မှာလည်း ပြင်းထန်သော ထိခိုက်ဒဏ်ရာများ ရရှိခဲ့ကြပြီး အရေးပေါ် ဆေးဝါးကုသမှု ခံယူနေရသည်။
အသေခံဒရုန်း၏ ပြင်းအားကြောင့် ကာစီနိုရုံ အဆောက်အအုံအတွင်းပိုင်းနှင့် အသုံးအဆောင်ပစ္စည်းများလည်း များစွာ ပျက်စီးဆုံးရှုံးခဲ့ရသည်။
ယခုတိုက်ခိုက်မှုသည် DKBA နယ်မြေအတွင်းရှိ စီးပွားရေးလုပ်ငန်းများနှင့် အရပ်သားပစ်မှတ်များကို စစ်ကောင်စီက နည်းပညာသုံးလက်နက်များဖြင့် ပစ်မှတ်ထား တိုက်ခိုက်လာခြင်းဖြစ်သည်။
အထူးသဖြင့် DKBA နယ်မြေအတွင်းရှိ တရုတ်ကျားဖြန့်ဆိုက်များကို ဦးတည်တိုက်ခိုက်ခြင်းဖြင့် နယ်စပ်ဒေသ တည်ငြိမ်မှုပျက်ပြားစေရန်၊ DKBA ကို အကျပ်အတည်းဖြစ်စေရန် စစ်ကောင်စီက ရည်ရွယ်လုပ်ဆောင်လာခြင်းဖြစ်သည်ဟု ကရင်စစ်ရေးမြစ်က သုံးသပ်ပြောဆိုသည်။
လက်ရှိတွင် အဆိုပါ DKBA ထိန်းချုပ်ရာ ဖလူးဒေသတဝိုက်၌ စစ်ရေးအခြေအနေ တင်းမာလျက်ရှိပြီး ဒေသခံပြည်သူများက စစ်တပ်၏ လေကြောင်းတိုက်ခိုက်မှုနှင့် ဒရုန်းအန္တရာယ်ကို စိုးရိမ်ထိတ်လန့်လျက် ရှိနေကြကြောင်း သိရှိရသည်။
