မြန်မာနိုင်ငံ မြောက်ပိုင်းရေအားလျှပ်စစ်စီမံကိန်းများ ပြီးစီးပါက ဓာတ်အားပေးပို့ ကွန်ရက်တည်ဆောက်ရေး အစီအမံနှင့် စီမံချက်ရေးဆွဲရန် တရုတ်နှင့် စစ်တပ် ဆွေးနွေး

ရန်ကုန်၊ ဧပြီ ၁၄

မြန်မာနိုင်ငံ မြောက်ပိုင်းရေအားလျှပ်စစ်စီမံကိန်းများ ပြီးစီးပါက ဓာတ်အားပေးပို့ ကွန်ရက်တည်ဆောက်ရေး အစီအမံနှင့် စီမံချက်ရေးဆွဲရန် တရုတ်နှင့် အကြမ်းဖက်စစ်တပ်တို့ ဆွေးနွေးကြောင်း စစ်တပ်က သတင်းထုတ်ပြန်ထားသည်။

မြန်မာနိုင်ငံ မြောက်ပိုင်းဒေသရှိ ရေအားလျှပ်စစ်စီမံကိန်းများ ပြီးစီးပါက တောင်ပိုင်းဓာတ်အားသုံးစွဲသည့် ဒေသများသို့ လျှပ် စစ်ဓာတ်အား ထိရောက်စွာ ပေးပို့နိုင်ရေးအတွက် ဓာတ်အားလိုင်းကွန်ရက်တည်ဆောက်ရန် ကြိုတင်အစီအမံများနှင့် စီမံချက်များ ရေးဆွဲသွားရန် အကြမ်းဖက်စစ်ကောင်စီ၏ လျှပ်စစ်နှင့်စွမ်းအင်ဝန်ကြီးဌာနနှင့် တရုတ်အစိုးရပိုင်ကုမ္ပဏီများအကြား ဆွေးနွေးခဲ့ကြသည်ဟု သိရှိရသည်။

အကြမ်းဖက် စစ်တပ်၏ လျှပ်စစ်နှင့်စွမ်းအင်ဝန်ကြီး ကိုကိုလွင်သည် ရုရှားနိုင်ငံသို့ သွားရောက်မည့်ခရီးစဉ်အတွင်း ဧပြီလ ၁၂ ရက်နေ့တွင် တရုတ်နိုင်ငံ၊ ကူမင်းမြို့သို့ ရောက်ရှိခဲ့ကြောင်း၊ ထိုသို့ရောက်ရှိစဉ် ယူနန်ပြည်နယ် ဒုတိယအုပ်ချုပ်ရေးမှူး Mr. Liu Yong အပါအဝင် တရုတ်အစိုးရပိုင် လျှပ်စစ်နှင့်စွမ်းအင်ကုမ္ပဏီများဖြစ်သည့် China Southern Power Grid၊ Yunnan Energy Group တို့မှ တာဝန်ရှိသူများနှင့် တွေ့ဆုံကာ လျှပ်စစ်ကဏ္ဍ ပူးပေါင်းဆောင်ရွက်ရေးကိစ္စများကို အမြင်ချင်းဖလှယ် ဆွေးနွေးခဲ့ခြင်းဖြစ်ကြောင်း သိရှိရသည်။

China Southern Power Grid နှင့် တွေ့ဆုံရာတွင် မြန်မာနိုင်ငံမြောက်ပိုင်း ရေအားလျှပ်စစ်စီမံကိန်းများမှ ထွက်ရှိလာမည့် ဓာတ်အားများကို တောင်ပိုင်းဒေသများသို့ ပေးပို့နိုင်မည့် ဓာတ်အားလိုင်းကွန်ရက် တည်ဆောက်ရေးစီမံချက်ကို ဦးစားပေးဆွေးနွေးခဲ့ကြသည်ဟု သိရှိရသည်။

ယင်းအပြင် တရုတ်-မြန်မာ နယ်စပ်ဖြတ်ကျော် ဓာတ်အားလိုင်း ဆောင်ရွက်နေမှု အခြေအနေများ၊ မြန်မာ-လာအို နယ်စပ် မဲခေါင်မြစ်ကြောင်းတစ်လျှောက်တွင် ရေအားလျှပ်စစ်စီမံကိန်းများ စူးစမ်းလေ့လာရန် စီမံထားရှိမှု၊ လာအို-မြန်မာ ဖြတ်ကျော်ဓာတ်အားလိုင်း တည်ဆောက်ရေးတွင် ပါဝင်ဆောင်ရွက်နိုင်မည့် အခြေအနေများကိုလည်း ဆွေးနွေးသည်ဟု သတင်းထုတ်ပြန်ထားသည်။

ထိုမျှသာမက ရန်ကုန်မြို့တွင်း ဓာတ်အားဖြန့်ဖြူးရာတွင် လေလွင့်မှုလျော့ကျစေရေးနှင့် EV Charging Stations များကို ဆိုလာစနစ်နှင့် ပေါင်းစပ်အသုံးပြုနိုင်မည့် System Design များ ဆောင်ရွက်ရေး၊ စွမ်းအင်ကဏ္ဍ အရှိန်အဟုန်မြှင့်တင်ရေးတို့ကိုလည်း ဆွေးနွေးသည်ဟု သိရှိရသည်။

အလားတူ Yunnan Energy Group နှင့် Union Resources & Engineering Co., Ltd. တို့နှင့် တွေ့ဆုံရာတွင်လည်း မြန်မာနိုင်ငံအတွင်း ဆောင်ရွက်နေသည့် နေရောင်ခြည်စွမ်းအင်၊ လေအားစွမ်းအင်၊ ရေအားနှင့် LNG သုံး ဓာတ်အားပေးစက်ရုံစီမံကိန်းများကို အရှိန်အဟုန်မြှင့်တင်ရန် ဆွေးနွေးခဲ့ကြကြောင်း သိရှိရသည်။

ထို့အပြင် Yunnan Xianshang Export and Import Co., Ltd. နှင့် တွေ့ဆုံရာ၌ မြန်မာနိုင်ငံအတွင်းသို့ စက်သုံးဆီများကို သက်သာသောနှုန်းထားဖြင့် ရေရှည်တင်သွင်းနိုင်ရေးကိစ္စရပ်များကိုလည်း ထည့်သွင်းညှိနှိုင်းခဲ့ကြောင်း သိရသည်။

အကြမ်းဖက် လျှပ်စစ်နှင့်စွမ်းအင်ဝန်ကြီးသည် ရုရှားနိုင်ငံနှင့် လျှပ်စစ်နှင့်စွမ်းအင်ကဏ္ဍ ပူးပေါင်းဆောင်ရွက်မှု မြှင့်တင်ရန်အတွက် ဧပြီလ ၁၂ ရက်မှ ၁၈ ရက်အထိ ခရီးစဉ် သွားရောက်နေခြင်းဖြစ်သည်ဟု သိရှိရသည်။