စစ်တပ်က ပြည်ပ ထွက်ခွာခွင့်များ တင်းကျပ်လာသည်နှင့်အမျှ ရန်ကုန်လေဆိပ်တွင် VIP Pass ဖြင့် ထွက်ခွာရန် လူ ၁ ဦးလျှင် သိန်း ၁၀၀ အထိ စျေးပေါက်နေပြီး စရဖ၊ စသုံးလုံး၊ လ၀က နှင့် လေဆိပ်ရဲများ နေ့စဉ် ဝင်ငွေ ထောင်ချီ တရားမဝင် ရရှိနေ

ရန်ကုန်၊ ဧပြီ ၃၀

ရန်ကုန်အပြည်ပြည်ဆိုင်ရာလေဆိပ်တွင် ပြည်ပသို့ ထွက်ခွာမည့် ခရီးသည်များထံမှ “VIP Pass” အမည်ခံ၍ လမ်းကြောင်းရှင်းခအဖြစ် တစ်ဦးလျှင် ကျပ်သိန်း ၁၀၀ အထိ အဆမတန် တောင်းခံကာ ဌာနဆိုင်ရာပေါင်းစုံမှ စနစ်တကျ အဂတိလိုက်စားမှုများ ပြုလုပ်နေကြောင်း ပြည်ပသို့ ထွက်ခွာခွင့်ရရန် ကြိုးစားလုပ်ဆောင်ခဲ့သူများနှင့် လေဆိပ်သတင်းရင်းမြစ်များထံမှ သတင်းရရှိသည်။

ရန်ကုန်လေဆိပ်ရှိ လေဆိပ်ရဲတပ်ဖွဲ့၊ လူဝင်မှုကြီးကြပ်ရေး (လ၀က)၊ အထူးစုံစမ်းစစ်ဆေးရေးဦးစီးဌာန (စသုံးလုံး) နှင့် စစ်ဘက်ရေးရာလုံခြုံရေးအဖွဲ့ (စရဖ) ဝန်ထမ်းများက ပြည်ပသို့ အလုပ်သမားစေလွှတ်သည့် ပွဲစားများနှင့် အချိတ်အဆက်ပြုလုပ်ကာ တရားမဝင် ဝင်ငွေများ ရှာဖွေနေကြသည်။ ၎င်းတို့သည် တရားဝင် ထွက်ခွာခွင့်လမ်းကြောင်းများကို ပိတ်ပင်ထားသယောင် ဖန်တီးကာ အဂတိလိုက်စားရန် လမ်းစရှာဖွေနေကြခြင်း ဖြစ်သည်။

ပြည်ပသို့ ထွက်ခွာလိုသူများအတွက် လမ်းကြောင်းရှင်းခအဖြစ် အနည်းဆုံး ကျပ်သိန်း ၃၀ မှ ၆၀ အထိ ပေးဆောင်နေရပြီး အခြေအနေပေါ်မူတည်ကာ ကျပ်သိန်း ၁၀၀ အထိ စျေးပေါက်နေသည်။

အထူးသဖြင့် လတ်တလော စစ်တပ်က ပိတ်ပင်ထားသော အရှေ့အလယ်ပိုင်းဖြစ်သည့် ဒူဘိုင်းနှင့် အိုမန်သို့ သွားရောက်မည့်သူများ၊ ဂျပန်နှင့်ကိုရီးယားသို့ သွားမည့်သူများကို ပုံစံမျိုးစုံဖြင့် ထွက်ခွာခွင့်ပြုကာ လမ်းကြောင်းရှင်းပေးနေခြင်းဖြစ်သည်။ လေဆိပ်မှ VIP Pass ဖြင့် ထွက်ခွာလိုသူများသည် အထောက်အထား မစုံလင်သူများပင်လျှင် ပွဲစားနှင့် ဝန်ထမ်းများ၏ အချိတ်အဆက်ဖြင့် ငွေပေးပါက လုံခြုံစွာ ထွက်ခွာနိုင်ရန် စီစဉ်ပေးနေသည်။

” PJ နဲ့ အလုပ်သွားလုပ်မယ့်သူတွေကို လေဆိပ်မှာ အရမ်းတင်းကျပ်ထားတော့ PV အမျိုးအစားနဲ့ထွထွက်ခွင့်ပေးပြီး ဟိုမှာပြန်ပြီးသက်တမ်းတိုးနေတာ။ ပွဲစားတွေနဲ့ လေဆိပ်ဝန်ထမ်းတွေ တိုက်ရိုက်ချိတ်ဆက်ထားတာ။ အခု အရှေ့အလယ်ပိုင်းစစ်ပွဲကြောင့် ဒူဘိုင်း၊ အိုမန်ကို ပေးမထွက်ဘူး ပိတ်ထားတယ်။ အဲဒါကို ဒူဘိုင်း အိုမန်ဖက်လူပို့တဲ့ ပွဲစားတွေနဲ့ လေဆိပ်ဝန်ထမ်းတွေ ချိတ်ဆက်ပြီး အထောက်အထားမစုံရင်လည်း VIP Pass နဲ့ ပေးထွက်ခွင့်ပြုတာ။ ပြီးရင် ပို့လိုက်တဲ့ လူဦးရေအလိုက် အားလုံးကြားမှာ ရာခိုင်နှုန်းအလိုက် ပိုက်ဆံပြန်ခွဲကြတာ။ သူတို့အဆက်အဆက်နဲ့လာတဲ့သူတွေဆို ဂိတ်တွေမှာကြိုချိတ်ထားကြပြီး လမ်းကြောင်းရှင်းပေးတယ်။ ဆိုလိုတာက သူတို့အချိတ်အဆက်နဲ့လာရင် လုံခြုံတယ်ပေါ့ လေဆိပ်က လှည့်ပြန်စရာမလိုဘူး။ အခု ခွင့်ပြန်တွေကိုလည်း အလုပ်သမားဝန်ကြီးဌာနဘက်က တင်းကျပ်ထားတော့ VIP Pass နဲ့ ထွက်ခွင့် လုပ်ပေးနေကြတာ။ ဝန်ကြီးဌာနက တင်းကျပ်လေ လေဆိပ်မှာ ဂွင်ကြီးပိုဖြစ်လေပဲ” ဟု လေဆိပ်သတင်းရင်းမြစ်က ပြောဆိုသည်။

လေဆိပ်မှ ဌာနဆိုင်ရာ ဝန်ထမ်းများ၏ တရားမဝင် နေ့စဉ်ဝင်ငွေမှာ ကျပ်သိန်းထောင်ချီ ရှိနေပြီး ၎င်းတို့၏ လက်ဝယ်တွင် ကျပ်ငွေများသာမက နိုင်ငံခြားငွေ ဒေါ်လာများပါ အမြောက်အမြား ရှိနေခြင်းဖြစ်သည်ဟု လေဆိပ်သတင်းရင်းမြစ်များက ဆိုသည်။

တစ်ဖက်တွင်လည်း လေဆိပ်ဝန်ထမ်းများက ပုံမှန်စာရွက်စာတမ်းဖြင့် ပြည်ပသို့ ထွက်ခွာမည့် သာမန်ပြည်သူများကိုမူ အပေါ်စီးမှ ဆက်ဆံခြင်း၊ ရစ်ပတ်ခြင်းနှင့် ငွေကြေးတောင်းခံခြင်းများ ပြုလုပ်နေသဖြင့် ပြည်သူများမှာ အဘက်ဘက်မှ အခက်အခဲများနှင့် ရင်ဆိုင်နေရသည်။

စစ်တပ်က ပြည်ပထွက်ခွာခွင့်များ တင်းကျပ်နေရာတွင် စစ်တပ်လက်အောက်ခံ အလုပ်သမားဝန်ကြီးဌာနသည် ပြည်ပရောက် မြန်မာအလုပ်သမားများ ခွင့်ဖြင့် ပြန်လာပြီးနောက် ပြန်လည်ထွက်ခွာမည့်ကိစ္စနှင့် ပတ်သက်၍ ပိုမိုတင်းကျပ်သည့် ညွှန်ကြားချက်ကို ဧပြီ ၂၈ ရက်စွဲဖြင့် ထုတ်ပြန်ခဲ့သည်။

ပြည်ပမှ ခွင့်ဖြင့် ပြန်လာမည့် မြန်မာအလုပ်သမားများသည် မြန်မာနိုင်ငံသို့ မလာရောက်မီ အလုပ်ရှင်ထံမှ ရရှိသည့် ခွင့်စာကို သက်ဆိုင်ရာနိုင်ငံရှိ မြန်မာသံရုံး/ကောင်စစ်ဝန်ရုံးများတွင် ပြသ၍ ထောက်ခံစာ ရယူလာရမည်ဖြစ်ပြီး ခွင့်ပြန်အလုပ်သမားများ၏ ဗီဇာနှင့် အလုပ်အချက်အလက်များ ပြောင်းလဲနေပါက မြန်မာနိုင်ငံသို့ ရောက်ရှိချိန်တွင် OWIC ကတ်ကို အသစ်ပြန်လည် လျှောက်ထားရမည်။

ယခုကဲ့သို့ တင်းကျပ်ရခြင်းမှာ အချို့သောအလုပ်သမားသစ်များက “ခွင့်ပြန်အလုပ်သမား” အယောင်ဆောင်၍ ထွက်ခွာရန် ကြိုးစားနေခြင်းကြောင့်ဖြစ်သည်ဟု ဝန်ကြီးဌာနက အကြောင်းပြထားသော်လည်း လေဆိပ်တွင် ဖြစ်ပေါ်နေသည့် အဂတိလိုက်စားမှုများကြောင့် ပြည်သူများအတွက် ပိုမို ဝန်ထုပ်ဝန်ပိုး ဖြစ်စေလျက်ရှိကြောင်း သိရှိရသည်။