ရန်ကုန်၊ မေ ၈
မကွေးတိုင်း၊ ဆိပ်ဖြူမြို့နယ်ရှိ ကာကွယ်ရေးပစ္စည်းစက်ရုံ မှ လေယာဉ်ကြဲဗုံးများနှင့် ခဲယမ်းများ လျှို့ဝှက် သယ် ဆောင်လာသည့် စစ်ကောင်စီစစ်ကြောင်းကို ဒေသကာကွယ်ရေးတပ်ဖွဲ့များက မိုင်းဆွဲတိုက်ခိုက်ခဲ့ရာ စစ်သား ၄ ဦး သေဆုံးပြီး စစ်အသုံးဆောင်ပစ္စည်းများ သိမ်းဆည်းရမိခဲ့ကြောင်း ဆိပ်ဖြူ ပြောက်ကျား တကိုယ်တော်ကျားဇိုး (LDF) မှ ကိုကျားဇိုးက ရှင်းပြသည်။
မေလ ၆ ရက်နေ့တွင် ကပစ စက်ရုံမှ ထွက်လာသော စစ်ကောင်စီစစ်ကြောင်းကို ပုသိမ်-မုံရွာလမ်း၊ ဆိပ်ဖြူ-ပေါက် လမ်းဆုံအနောက်ဘက်၌ တော်လှန်ရေးပူးပေါင်းတပ်ဖွဲ့များက မိုင်း ၃ လုံးဖြင့် မိုင်းဆွဲတိုက်ခိုက်ခဲ့ခြင်းဖြစ်သည်။ အဆိုပါတိုက်ခိုက်မှုအတွင်း စစ်ကောင်စီဘက်မှ ဒရုန်းမောင်းသမား မိုင်းထိမှန်သေဆုံးခဲ့ပြီး ၎င်းထိန်းချုပ်ထားသည့် ဒရုန်းများမှာ စစ်သားများအပေါ်သို့ ပြန်လည်ပျက်ကျကာ ဗုံးသီးများ ပေါက်ကွဲခဲ့ခြင်းဖြစ်သည်။
ဆိပ်ဖြူ ပြောက်ကျား တကိုယ်တော်ကျားဇိုး (LDF) မှ ကိုကျားဇိုးက “ဒရုန်းမောင်းတဲ့ကောင်က မိုင်းမိသွားပြီးတော့ မီးလောင်သွားတယ်။ သူတို့ ဒရုန်းက ထိန်းချုပ်မှုမရှိတော့ပဲနဲ့ ဒရုန်းပျက်ကျပြီးတော့ သူတို့ပေါ်တွေ ပြန်ကျတာပါ။ အဲဒီလိုပျက်ကျပြီးတော့ တော်တော်များများသေတယ်လို့ သိရတယ်။”ဟု ရှင်းပြသည်။
ယင်းတိုက်ခိုက်မှုကြောင့် စစ်သား ၄ ဦး သေဆုံးခဲ့သည့်အပြင် ဒရုန်း ၂ စီး မီးလောင်ပျက်စီးခဲ့ကာ တော်လှန်ရေးတပ်ဖွဲ့များက စစ်အသုံးဆောင်ပစ္စည်းများနှင့် ပျက်စီးနေသော ဒရုန်းတစ်စီးကို သိမ်းဆည်းရမိခဲ့သည်။
အဆိုပါ တိုက်ခိုက်ခံရသည့် စစ်ကြောင်းသည် ကပစ ၂၁ မှ မိတ္တီလာ ရှမ်းတဲလေတပ်စခန်းသို့ လေယာဉ်ဗုံးများ အထူးစီမံချက်ဖြင့် သယ်ယူပို့ဆောင်ရန် ထွက်ခွာလာခြင်းဖြစ်ကြောင်း စစ်ကောင်စီ၏ ပေါက်ကြားလာသော လျှို့ဝှက်စာအရ သိရသည်။
အဆိုပါစစ်ကြောင်းက ၂၅၀ ကီလိုဂရမ် လေယာဉ်ဗုံး ၃၀ လုံး၊ ၅၀၀ ကီလိုဂရမ် လေယာဉ်ဗုံး ၂၀ လုံး၊ထပ်ဆင့်ပေါက်ကွဲဗုံး ၁၀ လုံး တို့ သယ်ဆောင်လာကြောင်း သိရှိရသည်။
အဆိုပါယာဉ်တန်းကို ဗိုလ်ကြီး သူရိန်လင်းက အနီးကပ်ကွပ်ကဲရန် ညွှန်ကြားထားပြီး ၁၂ ဘီးတပ် HOWO ကားကြီး ၄ စီးဖြင့် သယ်ဆောင်နေခြင်းဖြစ်ပြီး လုံခြုံရေး အင်အား ၂၂ ဦး၊ ရှေ့ပြေးယာဉ်တွင် အင်အား ၆ ဦး၊ခဲယမ်း တင်ယာဉ် ၄ စီးပေါ်တွင် တစ်စီးလျှင် စစ်သား ၄ ဦးစီဖြင့် သယ်ဆောင်လာခြင်းဖြစ်ကြောင်း သိရှိရသည်။
“ရှေ့ပြေးကင်းယာဉ်သည် ပင်မယာဉ်တန်း မရောက်ရှိမီ လမ်းကြောင်း ကင်းထောက်မှု ပြုလုပ်ရန်၊ လမ်းကြောင်းပိတ်ဆို့မှုနှင့် ရန်သူ့နှောင့်ယှက်မှု အန္တရာယ်များအား ကြိုတင် ဖယ်ရှားရန်” ဟု စစ်ကောင်စီ၏ လျှို့ဝှက်ညွှန်ကြားချက်တွင် ပါရှိသော်လည်း လမ်းခရီးတွင် မိုင်းဆွဲတိုက်ခိုက်ခံခဲ့ရခြင်း ဖြစ်သည်။
ယခုတိုက်ခိုက်မှုကို ဆိပ်ဖြူ ပြောက်ကျား တကိုယ်တော်ကျားဇိုး LDF၊ ပေါက်မြို့နယ် ပကဖ နှင့် ကျေးရွာပကဖ အဖွဲ့များ ပူးပေါင်းလုပ်ဆောင်ခဲ့ခြင်းဖြစ်ပြီး တော်လှန်ရေးရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း သတင်းရရှိသည်။
