မြိုင်မြို့နယ်အတွင်း စစ်ကြောင်း ထိုးလာသော စစ်တပ်ကို လိုက်လံတိုက်ခိုက်မှု စစ်သား ၅၀ ဦးထက်မနည်း သေဆုံးခဲ့ပြီး လက်နက်ခဲယမ်းများနှင့် စစ်သားအလောင်းများပါ သိမ်းဆည်းရရှိ

ရန်ကုန်၊ ဇွန် ၂၄

မကွေးတိုင်း၊ မြိုင်မြို့နယ်အတွင်း စစ်ကြောင်း ထိုးလာသော အကြမ်းဖက် စစ်တပ်ကို လိုက်လံတိုက်ခိုက်ရာ စစ်သား ၅၀ ဦးထက်မနည်း သေဆုံးခဲ့ပြီး လက်နက်ခဲယမ်းများနှင့် စစ်သားအလောင်းများပါ သိမ်းဆည်းရရှိခဲ့ကြောင်း Magway People’s Defence Force – Magway PDF မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဇွန်လ ၁၅ ရက်နေ့မှ စတင်ပြီး ပခုက္ကူ တပ်မ (၁၀၁) မှ ထွက်လာသော အင်အား ၄၀၀ ကျော်ပါ စစ်တပ် စစ်ကြောင်းသည် ပခုက္ကူမြို့နယ်တွင်းမှ မြိုင်မြို့နယ်တွင်းထိ စစ်ကြောင်းထိုးဝင်ရောက်လာစဉ် တော်လှန်ရေးတပ်ဖွဲ့များက လိုက်လံ တိုက်ခိုက်ခဲ့ကြောင်း၊ ထိုစစ်ကြောင်းသည် မြိုင်မြို့နယ် ၊ ကိုင်းတောမကျေးရွာအရောက်တွင် အထိနာ၍ တွင်းမပျူစခန်းသို့ ပြန်လည်ဆုတ်ခွာသွားကြောင်း သိရသည်။

ထိုတိုက်ပွဲအတွင်း အကြမ်းဖက် စစ်တပ်ဘက်မှ တပ်မှူးများ အပါအဝင် စစ်သား ၅၀ ထက်မနည်း သေဆုံးခဲ့ပြီး အများအပြားထိခိုက်ဒဏ်ရာ ရရှိကာ လက်နက် ခဲယမ်းအများအပြားနှင့် စစ်ဘက်ဆိုင်ရာ အသုံးအဆောင်ပစ္စည်းများ၊ ယာဉ်ယန္တယားများကို သိမ်းဆည်းရရှိခဲ့ကြောင်း သိရှိရသည်။

တိုက်ပွဲအတွင်း ထိခိုက် ဒဏ်ရာရသူများကို သယ်ဆောင်ရန် တွင်းမပျူစခန်းသို့ ဆင်းသက်လာသော Mi 17 လေယာဉ် ၁ စီးကိုလည်း တော်လှန်ရေး ပူးပေါင်းတပ်က အောင်မြင်စွာ တိုက်ခိုက် ပစ်ချ ဖျက်ဆီးနိုင်ခဲ့ကြောင်း သိရသည်။

အဆိုပါ တိုက်ခိုက်မှုကို မကွေးပြည်သူ့ကာကွယ်ရေးတပ်မတော်၊ မကွေးဖက်ဒရယ်ယူနစ်စစ်ကြောင်းများ၊ ဗမာပြည်သူ့လွတ်မြောက်ရေးတပ်တော်(BPLA)၊ KG တပ်ဖွဲ့၊ ပခုက္ကူခရိုင်ပကဖ၊ ပေါက်ပကဖ၊ မြိုင်ပကဖ ၊ ပခုက္ကူ ပကဖ၊ ရေစကြို ပကဖ ၊ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး(ABSDF)၊ ပခုက္ကူခရိုင် (၂/၆/၇/၁၂ /၁၄/၁၅/၁၇/၁၈ ) တပ်ရင်းများ၊ တိုင်းပကဖစစ်ကြောင်း(၄) ၊ ကမ္မတပ်ပေါင်းစု+ပြည်သူ့လုံခြုံရေးအင်အားစု(ကမ္မ) ၊ PLC တပ်ပေါင်းစု၊ အညာမြေတပ်ပေါင်းစု ၊ 8 + အင်အားစု နှင့် ဒေသတွင်းညီအစ်ကိုများက ညီညီညွတ်ညွတ် ပူးပေါင်းဖော်ဆောင်ခဲ့ခြင်းဖြစ်ကြောင်း သိရှိရသည်။

ယင်းစစ်ကြောင်းသည် ၎င်းတို့ စစ်ကြောင်းထိုးရာ လမ်းကြောင်းတလျှောက်ရှိ ကျေးရွာများကို မီးရှို့ခြင်း ၊ အပြစ်မဲ့ အရပ်သားပြည်သူများကို လည်လှီးသတ်ဖြတ်ခြင်းများကို ရည်ရွယ်ချက်ရှိရှိ လုပ်ဆောင်ခဲ့ပြီး စုစုပေါင်း အိမ်ခြေ ၄၀ ကျော် မီးရှို့ခံရကာ မသန်စွမ်းအမျိုးသား ၁ ဦးအပါအဝင် အရပ်သားပြည်သူ စုစုပေါင်း ၅ ဦးကိုလည်း ရက်စက်စွာ သတ်ဖြတ်ခဲ့ကြောင်း သိရသည်။

အကြမ်းဖက် စစ်တပ်သည် ယခုထက် ပိုမိုရက်စက်နိုင်သဖြင့် ပြည်သူများအနေဖြင့် စစ်ရေးသတိ၊ စစ်ရေးအသိဖြင့် နေထိုင်ကြပါရန်နှင့် မည်သည့်နည်းနှင့်မျှ အဖမ်းမခံရရေး ကြိုတင်သတိထားရှောင်ရှားကြရန် မကွေးပြည်သူ့ကာကွယ်ရေးတပ်မတော်က ပြောဆိုထားသည်