ရန်ကုန်၊ ဇူလိုင် ၂
မကွေးတိုင်း၊ မင်းဘူးမြို့နယ် ဥယာဥ်တံတားရှိ အကြမ်းဖက် စစ်တပ် ဂိတ်စခန်းကို တော်လှန်ရေးတပ်က တိုက်ခိုက်သိမ်းပိုက်ပြီး မီးရှို့ရှင်းလင်းခဲ့ကြောင်း မင်းဘူး-စကု ပကဖ က ထုတ်ပြန်ထားသည်။
ဇွန်လ ၂၈ ရက်နေ့ နံနက် အစောပိုင်း ၁၂ နာရီ ၂၀ မိနစ်ခန့်တွင် ဥယာဥ်တံတားထိပ်တွင်ရှိသော အကြမ်းဖက် စစ်တပ် ဂိတ်စခန်းကို တော်လှန်ရေး တပ်ဖွဲ့များက ဝင်ရောက် စီးနင်း တိုက်ခိုက်ခဲ့ကြောင်း ၊ ထိုတိုက်ခိုက်မှုသည် မိနစ် ၃၀ ကျော်ခန့်ကြာမြင့်ခဲ့ပြီး စခန်းကို သိမ်းပိုက်ရရှိကာ မီးရှို့ ဖျက်ဆီးနိုင်ခဲ့ကြောင်း သိရသည်။
ထို တိုက်ပွဲအတွင်း အကြမ်းဖက် စစ်တပ်ဘက်မှ ထိခိုက် ဒဏ်ရာရရှိမှုများပြားပြီး ပြန်လည် ဆုတ်ခွာသွားကြောင်း၊ တော်လှန်ရေးတပ်ဖွဲ့ဘက်မှလည်း မင်းဘူးမြို့နယ် ပကဖ ဒုတာဝန်ခံ ရဲဘော်ဖိုးသား တိုက်ပွဲအတွင်း ကျည်ထိမှန်ခဲ့ပြီး မစိုးရိမ်ရ ဒဏ်ရာရရှိခဲ့ကြောင်း သိရှိရသည်။
စခန်းသိမ်း တိုက်ပွဲတွင် ၅.၅၆ ကျည်တောင့်များ၊ အီနာဂါဗုံးသီးအချို့နှင့် စစ်ဦးထုပ် ၂ လုံးတို့ သိမ်းဆည်းရရှိခဲ့ပြီး စစ်သား ကိုင်ဆောင်သော လက်နက်ငယ်များသည် တံတားတစ်ဖက်ခြမ်းတွင် ကျန်ရှိခဲ့သောကြောင့် တော်လှန်ရေးတပ်ဖွဲ့များက နယ်မြေရှင်းလင်းရေး မလုပ်နိုင်ခဲ့၍ လက်နက်ကောက်ယူနိုင်ခြင်းမရှိခဲ့ကြောင်း သိရသည်။
အဆိုပါ တိုက်ခိုက်မှုကို မင်းဘူးမြို့နယ် ပကဖ နှင့် အတူ ချင်းကာကွယ်ရေးတပ် (အရှို) CDF (Asho)နှင့် လူဘောင်သစ်တပ်တော်(NSA)တို့ ပူးပေါင်းတိုက်ခိုက်ခဲ့ကြောင်း သိရှိရသည်။
မင်းဘူး၊ စကုမြို့နယ် ပကဖသည် စစ်အနိုင်တိုက်ရေးနှင့် ပြည်သူလူထု ငြိမ်းချမ်းစွာ နေထိုင်နိုင်ရေးကိုသာ ဦးထိပ်ထားသည့်တပ်ဖွဲ့ဖြစ်သည့်အတွက် အာဏာရှင်စနစ်ဇီဝိန်ချုပ်ငြိမ်းသည်အထိ အမြစ်ပြတ်တွန်းလှန် တိုက်ခိုက်သွားမည်ဖြစ်ကြောင်း အသိပေးပြောဆိုထားသည်။
